Read Kambera NAHEMIA 6 Bible Online

NAHEMIA 6 - Kambera bible

NAHEMIA 6

¹I Hànambalàtu, i Tombia, i Nggehimu hamanai da mu - muhu-maka hawiangu darongu-ya na hàlama paràma-ya na kangeli, dàngu ba pa-hulungu-haka da mambowa mbuu hàlada, jiapa-kai la rehi nu ndedia matuha da ndàbi pindu la pindu - pindu bokulu paraingu.

²Ka pangàndi-danggaka langu i Hànambalàtu dàngu i Nggehimu la palua pa-pahàmburu dànja la hau ndeha la Lolangu Onu. Na nyuna pi-manggunya ba himbu-dangga ka pa-hanggàmaru-ka.

³Jia ba tuna hi ku-pangàndi-nja huratu, “Nda peku lua-anggu maa ba ràma-nggunya paràma ma-paihikungu. Nda na-pairihungu-apa na paràma jàka kumàta-nya mulana na luanggu pa-hamburu-kai nyimi,” hi wànggunja ba kuhema-ha.

⁴Lupa da-pambatu wundangu la pa-pangàndi-ngga langu tungu nu, na hema-nggunja jia - jia-ma-aya.

⁵La palima wunda wàna nàmunyai na ata pa-palewa-na i Hànambalàtu, hi nawua-ngganya na huratu tawàlahu[12]

⁶naihi huratu tuna yia, “Ma-deningu-maya wàna i Nggehimu na kareuku parongu la ngilu welingu la ba - banjaru la winggiru-na lai yiahu, ba wuku-minya na patula ngganggangu nyumu dàngu mbuu ndàbana na tau Yahundi hi kiri pahàmu-minya na kangeli paraingu. Napanii-mbu ba mbuhangu-munya pawotu wikimu panjadi maràmba Yahunda,

⁷dàngu ba mbàda pindi-muka wunangu ma-katua-kau la Yeruhali. Nu na kareuku ngilu lupangu-ma duna natàka la kahilu maràmba. Jia ba tuna, umaiwa ka tabata-ya nuna,” wàna.

⁸Tàka nyungga hi ku-pangàndi-nja kareuku, “Mbuu hàla-naka na papanii-mu nu ma-kambàliku juaya dàngu kareuku pawulu-mu nyumu wiki-maaya,” wànggunya.

⁹Ka kamangu-danyaka la pa-mangà - ngàdatu-kama ka peku papànja-manya nuna na paràma. Hi ku-hamayangu, “Dou Ala, pa-kapàru-kika!” wànggu.

¹⁰La rehina nu, kulua la umana i Hamaya anana i Ndalaya dàngu umbuku-na i Mehitambeyilu, ba nda peku maina lai nyungga. “Maiwa nyuta pa-kadua-nda ka talaku pa-kapàndi la Umana i MIRI. Ka tabita hàlanja da pindu, maa ba ningu tau ma-mbuhangu pa-pameti-kau la rudungu nàhu,” hi wànangga.

¹¹Tàka kunapa-ya nyungga, “Nyungga yia nda jia-aka tau ma-mbuhangu papalai. Ba haàtu àtalu tauka nda ukua duku nyungga patama la Umana i MIRI, napa kumeti-du. Ndia-a, nda kubihu-a duku!” wànggunya.

¹²Ba kupata - tandanya nuna, ka pàda-nggunyaka ba nda welina lai Ala-a nu nawànda-nangga i Hamaya, paweli-na lai Tombia dàngu lai Hànambalàtu-a duna. Mbàda wua li hambeli-danyaka i Hamaya ka napanii-ya na manyura-na lai nyungga.

¹³Na pawuku-da ka ku mangàdatu ka peku tundu-nggunya na pawuku-da dàngu ka peku wundanggu manjala. Ka peku hungguda ànda la pa-paruha-ya na tamunggu hi na-kareuku pulungga tau.

¹⁴Ka hamayangu-nggunyaka, “Dou Ala, upatanda-kinya nu nggàraya na pa-palaku-da i Tombia dàngu i Hànambalàtu. Muhuku-kinja! Tuu-mbuna na wunangu kawini i Nuanja dàngu da wunangu hawiangu da ma-pamangàdatu-ka,” wànggu.

¹⁵Lima kambulu dàmbu lodu mandaina ba pahàmu-ya na kangeli, hi na-lundungu la tànggalu dua kambulu lima la wulangu Elulu.

¹⁶Ba darongu-yaka nu paraï da muhuma la honga banjaru lai nu, ka mangàdatu-danyaka pa-makia, maa ba napi hàla-dunyaka tau ba i Ala ma-pandulangu hi kiri palundu-manya nuna na paràma.

¹⁷Nu ba tuna da-maràngga pa-ngàndingu-ma huratu da liku uru tau Yahundi dàngu i Tombia.

¹⁸Dadangu da anguna nyuna i Tombia la honga tau Yahundi, maa ba layia-na i Hakanya anana i Aràhu-duya. Hamanai i Yuhanàngu, anana i Tombia, na-kanoma-ya na anana kawini i Mahulàmu anana i Mberikia.

¹⁹Jiapa-kai ba na-pangàndi mànungga huratu i Tombia ba na-pa-mangàdatu-ka, na nyuna da liku uru tau Yahundi datiki mànu biaya na hàmuna i Tombia la hangganggu. Hamanai da-patàka hàla-mbunyai lai nyuna, na kareuku-nggu mbuu hàlana.