Read Kambera NAHEMIA 8 Bible Online

NAHEMIA 8 - Kambera bible

NAHEMIA 8

¹La wulangu pihu ndàdiku-nanyaka na tau Ihirailu la paraina haàtu - haàtu. La tànggalu hau la wulangu nuna da-pauhi ndàba nyuda la Yeruhali, la talora la hangga Pindu Bokulu Wai. Dakarai-ya i Ratu Ehira papita-ya na Mbuku Uku, nyuna haàtu tau manggàna-ya la kalaratu-na i MIRI na pa-patàka-na i MIRI la tau Ihirailu la ngaruna i Muha.

²Ka ngàndi-nanyaka i Ehira nuna na mbuku la hangga kabungguru, mini, kawini hamanai da anakeda da mambàda matua kanandingu-da la patanda-ya na pulungu.

³Tunaka nu, diha-nanyaka na Uku nyuna i Ehira, piti welingu la mbaru lupa la tidu lodu. Da-katàmbalu patingi pahàmu-manya nyuda mbuu ndàbada.

⁴Na-ndolaku i Ehira la mimbaru ai na pa-pandoi ndumana nu na pauhi. La kawana-na na mimbaru da-ndolaku yiada da tau: i Matiha, i Hema, i Anaya, i Uria, i Hilikia dàngu i Maaheya; tàka la karaha kalaina hi da-ndolaku: i Pandaya, i Mihailu, i Màlakia, i Hahumu, i Hàhambandana, i Hakaria dàngu i Mahulàmu.

⁵Nu na kaheli ngia pa-ndolaku-na i Ehira, narihi janggapa welingu la tau dangu, hi peku ita hàla-danya. Ba hinapa na-bunggahu-ya na mbuku, ka hadangu-danyaka pa-ndolaku.

⁶Napanii i Ehira, “Wotu-nyawa MIRI, na Ala ma-hanggula!” wàna. Nggubulu-na na rayatu na-wulaku pa-janggangu limana hi dahema, “Amingu, amingu!” wàda. Hi da-maràbaku pa-marubuku-nya i Ala.

⁷Hàlaka nu hi da-hadangu pa-ndolaku la pangia-da haàtu - haàtu, tàka hawiangu da tau Lewi da-pakaloka-nya na uku lai nyuda. Nu da tau Lewi jiaha: i Yehua, i Mbani, i Haripuya, i Yamingu, i Akupu, i Hambitaï, i Hondia, i Maaheya, i Kalita, i Aharia, i Yuhambàtu, i Hanàngu dàngu i Palaya.

⁸Da-haleli-ya na Ukuna i Ala[14] hanggàji - hanggàji hi da-kaloka-ya,[15] hi na-jàngapu-ya rayatu nu na padiha.

⁹Ba darongu-yaka nu na uku na padiha, dira hawina-ha da tau hi dahii. Tàka i Nggumbunuru Nahemia dàngu i Ratu Ehira na ma-tanjiku la uku, hamanai da tau Lewi da ma-kaloka-ya na uku, hi dapanii-nya na rayatu, “Na lodu yiana lodu pa-kawàri-mayaka ndumana i MIRI Alami, jia ba tuna àmbi hawina, àmbi hii-du.

¹⁰Màtawa nàhu kai beli; ngangu ngunungu-wa wàngu mbaha eti. Ipaberi-njawa hawiangu da pangami dàngu da angguru-mi la tau manda patoma lurina. Yiana na lodu, lodu pa-kawàri-yaka ndumana na MIRI-nda, jia ba tuna àmbi handuka-du. Màtawa na mbaha eti na pawua-nanggai i MIRI ka na-pamàndu-nja da etimi,” wàdanya na tau dangu.

¹¹Da tau Lewimbu da-kareuku pamanda hili weli - hili welinya na rayatu, “Àmbi hawina-du yia la lodu pa-kawàri ndumana i MIRI,” wàda.

¹²Ka beli-nanyaka pangangu pa-ngunungu na rayatu mbuu ndàbana hi dapabe - berinya pangangu hawiangu na tau. Dambaha eti maa ba dapi-manyaka na ihina na pulungu padiha na parongu-da.

¹³Hadangu harii pauhi-danyaka mbuu ndàbada da ngora kabihu, da ratu dàngu da tau Lewi, hi dalua lai Ehira la pa-papeka-nya na lii pa-pekangu-na na Ukuna i MIRI.

¹⁴Ka hunggu-danyaka daa la Uku pawua-na i MIRI lai Muha ba na-paràha-nya na tau Ihirailu Nyuna i MIRI la patodu daa la kawarungu ba talànga remi-danya na lodu remi Maü Ma-paraungu.

¹⁵Jia ba tuna la nggubulu Yeruhali-ka, la parai - paraingu dàngu la nde - ndeha da-bobaru-ya na pareta:[16] “Iluawa la palindi, kai piti lai kajiu, lai haitungu, lai ai karanu, ruu wola hamanai la - lai ai hawiangu-kai, la pawulu wàngu kawarungu hama tuna na maninya la Mbuku Uku,” wàdanya na tau ba dawua-nya pareta.

¹⁶Ka laku-nanyaka na rayatu papiti lai ai. Ka wulu-danyaka kawarungu la toku ndidu ndidaru umada, la talora umada, la talora hanamba Umana i MIRI, la mambila la lihi Pindu Bokulu Wai dàngu la Pindu Bokulu Epuraïmu.

¹⁷Mbuu ndàbana na tau na mabeli welingu la tanawangu, dawulu kawarungu hi datodu ningu. Hina wàngu nu hi palaku-ya yiana piti welingu ba talànga luri-napa i Yuhua anana i Nungu. Ka dira hàmu-haka da etida mbuu ndàbada.

¹⁸Pihu mbua lodu mandaina ba daremi. Nimbihu lodu, nyuna i Ehira nadiha-nja Ukuna i MIRI. La lodu pawalu wàna hi dawunda lii pabita wànya nu na remi, kikunya na huri Uku.