Read Kambera NAHEMIA 9 Bible Online

NAHEMIA 9 - Kambera bible

NAHEMIA 9

¹La tànggalu dua kambulu patu la wulangu nunama, pauhi-nanyaka na rayatu Ihirailu. Darotu wikida ba da-paita-nya na tanda halaera-da la njalada. Mbàda kahika-daka wikida welingu la tau tàka mbuu hàlada. Da-kalambungu karungu, hi daburi-nja tana da katiku-da tanda handuka etida. Tunaka nu hi da-ndolaku papeka-ha mbuu ndàba da njalada dàngu njala boku la mangilu-da.

³Ràka tailu mbua njàmu mandaina, ba dihanja na Mbuku Ukuna i MIRI, na Alada, dàngu hi tailu mbua njàmumbui ba dapeka njalada. Hàlaka nu hi da-maràbaku pa-marubuku-nya i MIRI, na Alada.

⁴Lai nu ningu mimbaru nduma tau Lewi hi da-ndolaku ningu i Yehua, i Mbani, i Kàtumialu, i Hambanya, i Mbuni, i Haripuya, i Mbani dàngu i Kanani. Da-kaladaku ba da-hamayangu lai MIRI na Alada.

⁵Na ngera lumungu la loduna nu da pakiri-nya paraïda yiada da tau Lewi: i Yehua, i Kàtumialu, i Mbani, i Hahàpuniya, i Haripuya, i Hondia, i Hambanya dàngu i Patahia. Nyuda dapa-nii, “Indolaku-wa kai wotunya i MIRI na Alanda! Wotu haila-nyawa lundu nu - nu! Pa-wotungu-ya na tamuna na ma-kanjupu mangarangu, na tamu bunjuku-na, na marihi-nya mbuu-naka na wotu hailangu!” wàda.

⁶Tunaka nu hi tuna yia na hamayangu-na na tau Ihirailu, “Nyumu MIRI, jiakau Mahupu Kamehangu; Upadedi-ha da kandunu dàngu da kuru awangu-ka, hamanai na tehiku dàngu na pinu tana dàngu na ihi-naka mbuu hàlana, hiu paluri-ya hiu kulipu radanya. Da ngara da maninja la awangu da-maraku-nggau; da-karuduku-nggau dàngu da-patika la hanggamu.

⁷Nyumu jiakau Ala, MIRI Mahupu Kamehangu. Upindiya i Àmbaràmu welingu la padua banjaru-na. Natuu kajia-yaka na paraingu Uru la tana Mbambilu, maa ba Nyumu wikidu ma-kapipi-ya. Hiu tunya tamu bidina: Ambarahàmu-yaka, pa-kiringu la rehina nu.

⁸Uita-duya ba na-tuturu ba natànji la hanggamu. Hiu pamàndu-nya na lii tura lii njanjimu lai nyuna. Na tana Kanaàngu, Heti dàngu Amori, na tana Perihu, Yembuhu dàngu Nggiringgahi, mbuu ndàbada nu bau mbuhangu pawua hàlanya nyuna; la patuha tana ngia pa-ndàdiku-da da ana umbuku-naka mbuu hàlada. Tunaka nu hiu patutu-nya na njanjimu lai nyuna, maa bau tuturu bau tànjidu.

⁹Uitaya na mayila-da da boku la mangilu-ma la rehi na ma-làpahu; uronguya na hiida la tana Mehiru dàngu la Tehiku Timbiraü.

¹⁰Uwundanya na maràmba Mehiru na pa-hangàtarungu, dàngumbu hanggangu la panggawi dàngu na rayatu la tanana, maa bau pidunya na pa-mayila-danya na banjaru-mu. Hi nahunga na tamumu lupa tàka nàhu.

¹¹Ubikaya na tehiku hi peku ningu ànda ngia palina na banjaru-mu; upapala linja la lata tehiku manda mbaha. Da tau da-mayaulu-ha dameti mumuhu la wai lumbungu, hama tuna watu ma-tandaningu la tehiku pa-mangàdatungu.

¹²La lodu ukapipi wànja tandai kàmbangu. La rudungu upahambila wànya tandai epi na ànda ngia palida.

¹³Welingu la awangu upuru la pinu Palindi Hinai, hiu pa-banjaru dànya na banjaru wikimu. Uwuanja uku, kalaratu dàngu lii pareta matànji, ma-deningu dàngu maningu linguna.

¹⁴Na lodu Hangahu matua lupangu-ma ba dambabu-nya, dàngu la ngaruna i Muha bau pakata-nja na Ukumu.

¹⁵Ba damanjuu dàngu ba nanjaka-nja pangangu, upapuru-nja roti welingu la awangu. Hamanai welingu la kaba watu màndungu, kapingatu dàngu katàraku upa-tapanjiru-nja wai mapali madau. Uparàha-nja pa-mandapu-nya na tana na panjanji-munya wàngu harangu.

¹⁶Na nyuna dajangga etida, dàngu da-tongguru etida da boku la mangilu-ma; nda dabihu-a pa-tuturu-nja da lii pareta-muka.

¹⁷Nda da-manundu-a, daromba-nya na hàmu-muka mbuu hàlana, dàngu mbuu hàla-naka na pa-hangàtarungu pa-pajiliku-mu na-mbulangu-ma-a la kanandingu-da. Wàngu jangga etida dapindi haàtu matanggu ulingu, da-mbuhangu pabeli la tana Mehiru, pahili njadi ata. Tàka Nyumu dumu Ala ma-paaïngu-kau, ma-lerangu eti-nanggau, ma-màjangu-kau dàngu ma-bokulu pa-namungu-kau. Na pa-namungu-mu marihi langatàka-ya; maa ba ndau mbuhangu-du patuu kajia-ha.

¹⁸Dawulu marapu-da ma-pahada hapingu. Hi dapanii, ‘Yiana-yaka na Alami, na mairu ngàndikai paluhu welingu la Mehiru, la ngia padedi-mi ata,’ wàda. Ba tuna Nyumu wikima pa-pawawa-da, ou Ala!

¹⁹Na nyuna ndau tuu kajia-aha la maràda telangu, maa ba ma-bokulu pa-namungu-makau dumu. Ba ndau yila beli-maya na tandai kàmbangu dàngu na tandai epi, na ma-paita-nja ànda la lodu hamanai la rudungu.

²⁰Upanau wànja mbiha manyola-mu na mahàmu. Ba dira nganguha màna ba dira ngunungu-ha wai.

²¹La ngala patu kambulu ndauda la maràda telangu, upamàtu-manja nduma lurida. Da pakida nda dakarii-a, da wihida nda dahidu-a, nda dambua-mbu,

²²Muwua-nja patalu wàngu la pa-maràmba dàngu la banjaru dangu la padira tanada nyuda. Da-uhuku-nya la Hehimbungu na tanana i Maràmba Hihungu; dangia-nya la Mbahàngu na tanana i Maràmba Onggu.

²³Mu-paworu-ha da wàla wuada hi hama kandunu la awangu-ha danguda. Uwuanja tana ka da-ngiangu ningu, na tana pambàda njanjimu la boku la mangilu-da.

²⁴Da wàla wuada da-pakàku-ya na tana Kanaàngu; na tau na mangia-nya na tana nuna hiu panyàku-ya. Upuli bianya na banjaru-mu pa-palaku-ya na pambuha etina hanggangu la ba - banjaru Kanaàngu dàngu la maràmba - maràmba-naka.

²⁵Na banjaru-mu dawàhi-ha da ngia pa-torungu, da tana kamboka dàngu da uma ma-mbinungu pawulu wàngu. Dawàhi-ha da humuru dàngu da matawai-da, da woka angguru, da pingi haitungu dàngu da wua - wua ai hawiangu-ka. Da-panjànji-ma maa ba dangangu kikungu pambuha etida. Mbuu ndàbada da mahàmu pawua-munja dapàda-nja hàmuda.

²⁶Na nyuna da-katadaku dàngu nda da-tuturu-anggau paraï banjaru-mu, nda da-ihili-anya na Ukumu dàngu na kalaratu-muka, da-pameti-ha da wunangu ma-panamu-nja, dàngu da ma-paràha-nja pabeli lai Nyumu, Alada. Dou MIRI, hili paaka-madanggau paraï da nyuda,

²⁷ka puli-munjaka nyuda la lima muhuda da mawàngu mbana etida ba da-roduku-nja dàngu ba da-kapidihu-ha. Na nyuna la harui mayila ma-roduku-nja, dawara-nggau la pakarai pa-ndulangu. Ka katàmbalu patingi-munjaka welingu la awangu; hiu hema wànja pa-namungu rihimu. Bau pangàndi-nja liku uru dàngu ma-kaborangu ma-pahàla-ha welingu la papada.

²⁸Tàka ba nahili lànyapu belika na tanada, ka hili wunda beli-danyai manjala. Jia ba tuna ka hili puli-dumunjai la pa-kapidihu-ha muhuda. Na nyuna, ba dahili pàdangui-ka njalada hi dapeka halaera, dawara-nggau Nyumu pakarai pa-ndulangu. Ka hili patingi-dumunjai welingu la awangu, hiu ndula mànuha, maa bau mila-dunja eti, bau namu rihi-duha.

²⁹Uhàngganja ka peku tuturu-danya na lii panau papekangu-mu, tàka nyuda duda da-jukaru wànya jangga eti na ukumu. Làti duna, jàka da-palaku-ya na kalaratu-mu, lupangu-ma daluri lànyapu. Nyuda da-katiku watu dàngu da-tongguru eti, nda da-mbuhangu parongu, nda dabihu pa-tundungu.

³⁰Nimbihu ndaungu bau panamu mànunja; la ngaruda da wunangu, na Ngahumu na-kareuku dànja nyuda. Tàka na banjaru-mu dabita-ma-anja da kahilu-da, hiu pulinja la ba - banjaru la ngara tanaka.

³¹Tàka na pa-namungu-mu ba nda ningu hama bokulu-na, ndau tuu kajia-aha, ndau pa-làjaru-aha. Langatàka, Ala manda ningu menjangu-kau; na-bokulu na pa-namungu-mu, narihi na màjangu-mu!

³²Dou Ala, Alama ma-àtalu kapàru! Ala ma-bokulu dàngu ma-hawiru! Wàngu tuturu-mu uyàpa pamàndu-manja mbuu ndàbada da panjanji-mu; mbuu ndàba-naka na pambàda njanjimu, bau patutu-manja dàngu bau palaku-maha. Pa-kiringu na-kapidihu-na-nggama na maràmba Ahuru lupa tàka nàhu, nadangu na harui mayila pahunggu-ma. Da maràmba-ma, da ratuma, da wunangu-ma dàngu da mini pangora-ma, hamanai da boku la mangilu-ma dàngu da rayatu, dapàda hàlangu harui mayila. Àmbu romba-dunja mbuu-naka na harui mayila-da! Àmbu pambula-dunya la kanandingu-mu!

³³Ma-deningu-maya na pawunda-mu, bau huku-nggama tau njala; daingu-mamu bau tuturu jiapa-kai nda ma-tuturu-nggau.

³⁴Da boku la mangilu-ma, da maràmba-ma, da ratuma dàngu da mini la ngorama, dapangga-ya dàngu da-pa-halimu-ya na ukumu. Mbuu ndàba-naka na lii pareta-mu dàngu na lii panau pa-pekangu pawua-munja, ba nda da-ihili-nya, nda da-mbuhangu-mbu parongu-ya.

³⁵Muwua-nja maràmba da ma-pareta-ya na banjaru-mu, ba jiaya na-ngiangu-da la tana lerangu ma-kamboka na pawua-munja. Tàka nda dawàru-manya na luri akatu-da, nda da-mbuhangu-ma pa-pawawangu wikida dàngu paluri lumunggau Nyumu.

³⁶Ka dedi-manyaka nàhu ata la tana pa-pamangu-mu-nggama la pakangeha-nya. Na tana ma-kamboka, na mambinu ihina, làti ba lupangu mapàda-nya.

³⁷Mbuu ndàbada da ihi paraïma yia la tana ba lupangu-ma mawotu-ha la maràmba - maràmba da pawotu-mu. La pa-kawaha-ya na banjaru-mu, ba jiaya na hukungu ruku njalama lai Nyumu. Ka pareta-da-nggamaka kikungu pambuha eti wikida lai nyuma dàngu la banda-makai. Jia ba tuna ka mayila-manyaka nàhu, dira harui handuka-kama!” wàna.

³⁸Palata-nya na matumbu-ka nu mbuu ndàbana, nyuma rayatu Ihirailu tura-manyaka pa-njanjingu ma-karàngi pa-tulihu dàngu hi datunya hàpu paraï da liku uruma, da tau Lewi dàngu na haàtu ratuma.