Read Kambera ETIRU 1 Bible Online

ETIRU 1 - Kambera bible

ETIRU 1

¹La Huhàngu, na parai puhu pareta Perihia, i Ahaweru na-katangu pareta ba hanganji-ya. Na pa-hanganji-na hangahu dua kambulu pihu porupinihu-ya, piti welingu la Inindia lupa la Hundangu.

³La patailu wàna na ndaungu pareta-na, na Hanganji Ahaweru na-paloku mbabu bokulu nduma mbuu ndàba-da da tau dàngu da panggawi-na. Da tanatara Perihia dàngu da tanatara Mendia nii-mbunja nu la mbabu, hamanai da nggumbunuru dàngu da tau bokulu la porupinihu.

⁴Nomu mbua wulana mandaina na hanganji ba na-pajiliku-nja da pawulu-na la umana dàngu na bunjuku-na dàngu na pa-bokulu wàna na pa-hanganji-na.

⁵Hàlaku nu hi paloku-nanyai mbabu na hanganji ndumana na rayatu la Huhàngu, da mawulu hamanai da mamila. Nu na mbabu hau minggu titapu-na, pa-paloku-ya la woka ngia pambawa uma hanganji.

⁶Na talora uma hanganji pa-pamananda wàngu dindi tera linangu kawuru dàngu mabara-ya, pahondu wàngu la muditu linangu dàngu hi pahaunja la kara àmahu bara da pa-pakànangu la kambaniru pualamu. La wawana patuha da nggala àmahu rara àmahu bara la lata pa-pamananda wàngu pualamu bara, hambuluru rara, kaba mutiara kajilaku dàngu watu piruhu kawuru.

⁷Na hanganji na-pandengingu wai angguru dira matiki da patuu la ma - màtu kaba wai àmahu rara.

⁸Na ariyaa nda pa-padira-anya unungu-na wai angguru jàka ndia nda pa-ruwatu-aya pa-unungu. Na hanganji mbàda wua-nanjaka pareta da maràma la umana, mbutana na ariyaa pakeinya kikunya na pambuha-na haàtu - haàtu.[1]

⁹La rehi nu i Tamu Ràmbu Wàtihu mbabu-mananyai duna dàngu da kawini la uma hanganji.

¹⁰La lodu papihu wàna, dira unungu dàngu dira hawola-ya na hanganji, jia-duyaka hi napaau-nja da mapihu da pa-kahala bai da malumu pa-ihiku-nya; nyuda nu jiaha i Mahumangu, i Mbihuta, i Hàrambona, i Mbikita, i Ambàkata, i Hetàru dàngu i Kàrakàhu.

¹¹Na-paràha-nja nyuda pa-karia-nya la hanggana, i Tamu Ràmbu Wàtihu dàngu tubuku pareta la katiku-na. I Tamu ràmbu dira manandangu-ya, tàka na hanganji na-mbuhangu pa-pajiliku-nya na manandangu-na la tau bokulu-na dàngu la mbuu ndàbada da ariyaa-na.

¹²Tàka ba da-patàka-nyaka na pareta hanganji lai Tamu ràmbu paraï da papalewa, nda nabihu-a pamai i Tamu Ràmbu Wàtihu, hi dira mbeniya na hanganji.

¹³Kàli wànguna na hanganji ba nakarai timbangu rukuna na uku dàngu na kalaratu. Jia-duyaka hi napaau-nja da amabokulu-na da mapinya jàka nggàraya na pawàngu la matuna nu.

¹⁴Da amabokulu da pakàli paau mànuna na hanganji jiaha: i Kàrahena, i Hetàru, i Àtamata, i Tàrihu, i Merihu, i Màraheina dàngu i Mamukàngu. Nyuda ma-katangu pareta-ha la Perihia dàngu la Mendia da mahupu majangga la pareta.

¹⁵Tàka na hanganji, “Mbàda palewa-ngguhaka da malumu-ngga lai Tamu Ràmbu Wàtihu ka namai lai nyungga. Tàka nda nabihu-a. Pa-namatu-nya na uku nggiki wànda-nyaka bàdi?” wànanja nu da mapihu.

¹⁶Tàka i Mamukàngu, “Ba tuna nu nda didi-aya na hanganji na-papawawa-na i Tamu Ràmbu Wàtihu, tàka mbuu ndàba-mbuda da panggawi-na i Tamu umbu dàngu mbuu ndàba-mbuna na mini la tana yiana!

¹⁷Nadu na-pawunda-na i Tamu ràmbu napinya paraï mbuu ndàbada da kawini, dàngu hi nda da-wàrihu-ha da leida haàtu - haàtu. Napa nyuda dapanii: I Tamu umbu na-paaunya i Tamu Ràmbu Wàtihu, tàka i Tamu ràmbu nda nabihu-a pamai wàda.

¹⁸Jia-duya jàka darongu-ka da papaha-da da tau bokulu la Perihia dàngu la Mendia rukuna nuna, jiangu-ma daluu paniinja da leida. Na rukuna nuna, napa da kawini papaha da-patarangu la leida, tàka da mini lei hi dambeni-nja da papaha-da.

¹⁹Ba tuna ma-kamahingu ka nabota-ya paraïna i Tamu umbu, i Tamu Ràmbu Wàtihu àmbu namai-dupa lai tamu umbu. Nu na botangu ka nanjadi kalaratu Perihia dàngu Mendia, ka àmbu pekuna payila beliya. Hàlaka nu na ngia pa-mandapu-na i Tamu Ràmbu Wàtihu wuaya la kawini haàtu marihi hàmu welingu lai nyuna.

²⁰Na botangu-na i Tamu umbu, jàka nakada-nya la nggubulu tana pa-pareta na ma-lerangu yiana, napa da kawini papaha datembi-ha da leida, ka tau wuluya dàngu ka tau mila-yakai,” wànanya na hanganji.

²¹Nu na paniina i Mamukàngu na-patunju-ya paraïna na hanganji dàngu da tau bokulu-na hi naluu pahàra-nya.

²²Napangàndingu lii pareta la mbuu ndàbada da porupinihu pareta-na, la hilu dàngu la tulihu wikida nuda da porupinihu. Na linguna na pareta[2] la hau uma - hau uma jiaya na mini lei na katiku kuru uma, na mangera-nya na botangu la mbuu ndàbana, wàna.