Read Kambera ETIRU 3 Bible Online

ETIRU 3 - Kambera bible

ETIRU 3

¹Ndedi nggi tuna mandaina la hambeli-na nuna na Hanganji Ahaweru nawotu-ya i Hamàngu panjadi ngora amabokulu pareta. Nu i Hamàngu anana i Hamandata-ya welingu la ana umbuku-na i Anggàku.[4]

²Na hanganji nawua-nja pareta da panggawi-na mbuu ndàbada ka datembi-ya i Hamàngu ba wàngu pa-marubuku-nya. Mbuu ndàbada danunju-ya na pareta, hinggilu-na i Morundikaï.

³Da panggawi hawiangu la uma hanganji, da-paàra-nya nggikina hi napangga-ya na pareta hanganji,

⁴nimbihu loduma ba da-dàhiku-ya ka na-panamatungu, tàka nda nabihu-a parongu, “Nyungga tau Yahundi-ka; nda peku-ana ka ku-marubukungu tau,” wàna. Tàka nyuda hi da-patàka-nya i Hamàngu, ba da-mbuhangu papinya jàka nggikina wàna i Hamangu hanggangu lai Morundikaï.

⁵Hi dira mbeniya i Hamàngu ba napinya, ba nda nabihu i Morundikaï pa-karuduku-nya nyuna.

⁶Ba napinya-ka ba tau Yahundi-ya i Morundikaï, bota-nanyaka la pahuku-nya i Morundikaï, tàka nda didi-aya nyuna, nawuku-mbuya la pa-pamànji-ya mbutana na tau Yahundi la tana pareta Perihia.

⁷La ndaungu pa-hakambulu dàmbu wàna ba na-pareta i Hanganji Ahaweru, la kawunga wulangu la wulangu Nihàngu, i Hamàngu na-paràhangu patungu undi, “na purimu” ba wàdanya, ka pinya jàka nggàra lodu nggàra wulangu-ya na ma-jàngapu la pa-pahàra-nya na pawuku akatu-na. Kawuku-danyaka na tànggalu hakambulu tailu wulangu hakambulu dàmbu, na wulangu Andaru.

⁸Ka panii-nanyaka i Hamàngu la hanganji, “Tàmu umbu, wàna, ninya na hau banjaru panda jàngapu ma-tanyalangu la hau porupini - hau porupinihu tana pareta-nda. Na hurina haumaya welingu la banjaru hawiangu-ka. Nda da-panamatungu-a la uku pareta. Ba tuna, nahàmu-mapa làti tàmu umbu ka àmbu màtanja ba dawàngu etida.

⁹Jiaya jàka wàmu tàmu umbu, wuangu bàdi huratu pareta ka pamànji-ha. Jàkau pajia-ya na paniinggu tàmu umbu, kumàka-ma duku pa-patamangu 340.000 kilu àmahu bara la kanai bandamu tàmu umbu,” wàna.

¹⁰Ba narongu-yaka nu, na hanganji na-butuhu-ya na tawuru la limana na pakàli paki pahàpu wànja da lii pa-bobaru pareta, hi nawuanya i Hamàngu na muhu tau Yahundi.

¹¹Tàka na hanganji, “Nuna na banjaru dàngu da àmahu-na kuwua-nggauha nyumu. Wànguwa etimu lai nyuda,” wànanya.

¹²La tànggalu hakambulu tailu la kawunga wulangu, i Hamàngu na-paaunja da tau matanggu tulihu-nya na hanganji. Na-paràha-nja pa-tulihu huratu, nunjuya na papanii-nanja, hàlaka hi haleli-ya la mbuu ndàbana na hilu dàngu hi hili tulihu-ya hama tuna na tulihu-ka na pakàli wàngu la nggubulu tana pareta. Nu na huratu pa-tulihu-ya wànya na tamuna i Hanganji Ahaweru dàngu hi hàpu wànya na tawuru-na hi lu pangàndi-nja la ma-pareta, da nggumbunuru, da amabokulu la mbuu ndàba porupinihu. Na ihina jiaya na lii pareta, la tànggalu hakambulu tailu wulangu Andaru, mbuu ndàbada da tau Yahundi, ma-kaweda bidi tau, kawini anakeda, lupangu pameti-ha àmbu aï-duha, dàngu da banda malanja-da rambanja.

¹⁴Nu na pareta lupangu bobaru-ya la mbuu ndàba porupinihu, ka peku rimangu-na mbuu ndàbana la lodu pa-kawuku.

¹⁵Da pa-palewa-ka daluu laku palua patuha da huratu la mbuu ndàba porupinihu pareta. La hupu liina na hanganji, pa-bobaru-mbuya na pareta la Huhàngu, na parai puhu pareta Perihia. Hàlaka nu, mandapu-danyaka na hanganji dàngu i Hamàngu ba daunu wai angguru, kanggupuku-nanyaka la Huhàngu rukuna na lii nuna.