Read Kambera ETIRU 4 Bible Online

ETIRU 4 - Kambera bible

ETIRU 4

¹Ba narongu-yaka nu na matumbu i Morundikaï, bàriku-nahaka da pakina, hi na-kalambungu karungu tanda hawina-na. Natunya aü na katiku-na hi na-palunggamaingu la paraingu ba nahii padudurungu.

²La tuba pindu bokulu uma hanganji na-pànjangu, nadu ba nda peku-ana patama na tau ma-kalambungu karungu.

³Tuu mbuna la mbuu ndàba porupinihu da-padudurungu da tau Yahundi ba bobaru-yaka na pareta hanganji. Darotu wiki, dahii dàngu padudurungu-da, dangu ma-kalambungu karungu dàngu ma-tanggunggulu la tana.

⁴Ba da-patàka-nyaka i Tamu Ràmbu Etiru na pawunda-na i Morundikaï paraïda anakaria dàngu da pa-kahala bai malumu-nya, dira hawina-ya i Tamu Ràmbu Etiru. Na-pangàndi-nya paki i Morundikaï ka pahilu-nja da hinggi karungu-na, tàka nda nabihu-a pakeiha i Morundikaï.

⁵Tunaka nu, i Etiru hi napaau-nya i Hatàhu na haàtu welingu la honga pa-kahala bai pa-pangaba-na na hanganji la palumu-nya i Etiru. Na-paràha-nya i Hatàhu pa-paàra-nya i Morundikaï, jàka nggàra matumbu dàngu nggikina nyuna hi tuna nu.

⁶Lua-nanyaka i Hatàhu lai Morundikaï la mambila paraingu la tuba pindu bokulu uma hanganji.

⁷I Morundikaï napanii-ya na pambàda pina dàngu jàka pira àmahu panjanji-na i Hamàngu pa-patama-na la kanai banda hanganji, jàka hàlaka pa-pamànji-ya na tau Yahundi.

⁸I Morundikaï nawua-mbunya na haleli-na na huratu hanganji pambàda paluhu la Huhàngu na ma-ihingu pareta la pa-pamànji-ya na tau Yahundi. Na-paràha-nya i Hatàhu pawua-nya i Etiru na huratu, dàngu la pa-kaloka-ya na rukuna nuna, dàngu la pakarai-ya i Etiru palua la hanganji, pakarai-nya mila eti na banjaru-na.

⁹Ka lua-nanyaka i Hatàhu lai Etiru pa-patàka-nya na hupu liina i Morundikaï lai nyuna.

¹⁰Tàka i Etiru na-paràha belinya lai Morundikaï pa-patàka-nya,

¹¹“Na ta - tauka, miniya kawini-yakai, na majia lua ànga biana la hanganji, la talora uma hanganji, dàngu nda pa-paaungu-ya, lupangu-ma pahuku pameti-ya. Nuna nu kalaratu-maya dàngu mbuu ndàbana na tau piti welingu la amabokulu hanganji lupa rayatu porupini - porupinihu-ka dapinya nuna. Hangia jua-ana na pamara wàngu welingu la kalaratu, jia-duya jàka na-pajola-nya na toku àmahu rarana na hanganji la tau nuna. Jàka tunaka nu mara-duna-nyaka. Tàka hau wula-naka nàhu ba nda napaau-ngga paraïna hanganji,” wànanya.

¹²Tàka i Hatàhu na-patàka-nya i Morundikaï na pa-papanii-na i Etiru.

¹³Tàka i Morundikaï na-pangàndi-nya langu i Etiru, “Àmbu jia kaka-munyaka, bau rihipa pamara welingu la tau Yahundi hawiangu, rukuna bau ngiangu la uma hanganji!

¹⁴Jàka jia-yaka na tau Yahundi lupangu-ma duna na-ngalangu pa-ndulangu, nggàra ngara ngia-yakai hi lupangu damara. Tàka jàka ndi - ndii tu biamu nu nyumu, jiangu-ma napa umeti, ka njàpu-duna-nyaka na kawuku amamu. Talànga wanguna raï ai duna hi ndumana na rehi tungu nàhu-maka ihu, hi pindikau la panjadi tamu ràmbu!” wànanya.

¹⁵Ka pangàndingu-nanyaka langu i Etiru lai Morundikaï,

¹⁶“Pauhi ndàbanya na tau Yahundi la Huhàngu pa-hamaya-ngga ndumanggu. Àmbu ngangu àmbu ngunungu-du tailu mbua lodu tailu mbua rudungu. Nyungga duku dàngu da anakaria malumu-ngga puaha-mamanyai duma. La hambeli-na nu napa kulua la hanganji, jiapa-kai ka na-pahilitu la kalaratu. Jàka pameti wànggu-nyakai rukuna nuna, màta bia ka kumeti!” wàna.

¹⁷Laku-nanyaka i Morundikaï pa-pahàra-nya mbuu ndàbana na papanii-nanya paraïna i Etiru.