Read Kambera ETIRU 5 Bible Online

ETIRU 5 - Kambera bible

ETIRU 5

¹La lodu patailu wàna na puaha-na, wotu-nahaka da paki tamu ràmbuna i Etiru, hi nalua la talora dalu uma hanganji hi na-ndolaku la tuba pindu hanamba. Na hanganji mandapu-nanya la kanjàka pareta la tubana nu na pindu.

²Ba naita-yaka ndolaku-na la hambeli i Tamu Ràmbu Etiru, naaï namuya hi na-pajola-nya na toku àmahu rarana. Hurungu-nanyaka i Etiru hi na-jonggaru-ya na hupu tokungu.

³Hi na-paàrangu na hanganji, “Nggàra ehimu, dou na papaha-nggu duku? Nggàra pambuha-mu? Panii biaya! Jiapa ka peradua-na na tana pareta-nggu, kuwua-mbunggaunya,” wànanya.

⁴Nahema i Etiru, “Jiaya jàka wàmu làti tamu umbu, la rudungu taï, nyumu tamu umbu dàngu i Hamàngu kai lua la mbabu pa-paloku-nggu-nggamu,” wàna.

⁵Paau-nanyaka i Hamàngu paraïna na hanganji ka naluu maiya ka pahàra-nya na pakarai-na i Etiru. Ka lua-danyaka la mbabu pa-paloku-na i Etiru.

⁶Ba talànga unuda wai angguru, na-paàrangu na hanganji, “Nàhu panii-yawa jàka nggàra pambuha-mu. Nggàra bia pakarai-mu kuwua-manggau duku, jiapa ka paradua-na na tana pareta-nggu!” wànanya.

⁷Nahema i Etiru,

⁸“Jàkau pajia-ya na pakarai-nggu tamu umbu, kai hili maiki làti tamu umbu haromu la rudungu, nyumu dàngu i Hamàngu la mbabu pa-paloku-nggu. Napa la mbabu nuna kupanii-ya na pakarai-nggu lai tamu umbu,” wàna.

⁹Dira mbaha etiya i Hamàngu ba nabeli welingu la mbabuna i Tamu Ràmbu Etiru. Tàka la pindu bokulu uma hanganji naita-ya i Morundikaï ba nda na-hadangu la patembi-ya nyuna, dira karaü-ya na etina.

¹⁰Na nyuna ba tuna, na-roputu wikina hi nabeli la umana. Ba natàka-ka napaau-nja da anguna ka damai, dàngu nakarai-mbuya i Herihu na papaha-na pa-mandapu dànja nyuda.

¹¹Tàka i Hamàngu napanii abungu ba napeka wuluna, nadangu-da da anana mini, na papingi-na na mandapu-na na pangala-na la hanganji, dàngu na pànggatu-na na manda najaru rihina welingu la panggawi hawiangu.

¹²Dàngu napanii-mbu, “Na padunda-na la mbabu i Tamu Ràmbu Etiru didia-kama na hanganji dàngu nyungga, haromu rudu hili dundana-nggama, wàna.

¹³Mbuu ndàbada nuda nda ningua linguna jàka kuita-mayapa i Morundikaï, na tau Yahundi, ba na-mandapu la pindu bokulu uma hanganji,” wàna.

¹⁴Ba darongu-ya nuna paraïna papaha-na dàngu da anguna-ka, “Paràhangu bia pa-pandoi ai tiwalu dua kambulu dàmbu metiru janggana. Hàlaka, haromu la mbaru karai paramihi la hanganji ka tiwalu-nya i Morundikaï nu la ai tiwalu. Tuna nuduka bàdi hi peku luamu la mbabu dàngu mambiru etimu,” wàdanya. Na kareuku nuna dira nggànaya la etina i Hamàngu, tuna nu duka hi naluu paràhangu pa-pandoi ai tiwalu.