Read Kambera ETIRU 7 Bible Online

ETIRU 7 - Kambera bible

ETIRU 7

¹Pandua wànaka na hanganji dàngu i Hamàngu pangaa dànya i Etiru.

²Ba talànga ununa wai angguru, hili paàra-nanyaka i Etiru paraïna hanganji, “Dou na papaha-nggu duku, nggàra pambuha-mu? Panii-yawa! Lupangu-ma duku kuwua-nggau, jiapa kau karai-yakai na peradua-na na tana pareta-nggu,” wànanya.

³Nahema i Tamu Ràmbu Etiru, “Jiaya jàka wàmudu tamu umbu, karai-nggunya ka peku luringgu, nyungga dàngu banjaru-nggu.

⁴Nadu, nyungga dàngu banjaru-nggu pa-danggangu-kamaka ka pameti-kama. Ngera hama tuna, jàka dangga-nggama ka tuukama ata-a, pàdi wànggu bia làti, nda ku-paamba-akau.[6] Tàka nàhu, napa pa-pameti-kama dàngu pa-pamànji-kama!” wàna.

⁵Ka paàrangu-nanyaka i Hanganji Ahaweru lai Tamu Ràmbu Etiru, “Nggamu na matoru mbeni pawunda-ya nuna? Nggiya nu na tau?” wànanya.

⁶Nahema i Etiru, “Yiana i Hamàngu na ma-akatu, jiaya na muhu dàngu na ma-pajàra-kama!” wàna. Kanjupu mangàdatu-ya i Hamàngu ba na-tàngaru-ha na hanganji dàngu i Tamu ràmbu.

⁷Kanjupu karaü-ya na etina na hanganji hi na-hadangu welingu la menja hi naluhu la hambeli la woka ngia pambawa uma hanganji. Napinya i Hamàngu ba mbàda bota-nanyaka paraïna hanganji la pahuku-nya nyuna, tuna nuduka hi na-ndàdiku lai Tamu Ràmbu Etiru pa-kamahi-nya, ka pamara-ya.

⁸Wàngu mbota monungu-na i Hamàngu na pa-talàpu wikina la nggalana i Etiru ba na-pamilangu wikina, la rehi nu jia pàkuyai na belina na hanganji. Ba naita-ya paraïna hanganji ba tuna nu i Hamàngu, kaoka-nanyaka, “Nggàra ulana? Natoru mbeni pa-rumbaku-ya i Tamu ràmbu yiahu la hangganggu dàngu la uma wikinggu?” wàna. Ba panii tunaka nu na hanganji, lu mai-danyaka da ma-pawaingaba hi da-palumburu-nya na katiku-na i Hamàngu.

⁹Tàka i Hàrambona na haàtu welingu la hongada da ma-pawaingaba, “La umana i Hamàngu ningu ai tiwalu dumu tamu umbu, dua kambulu dàmbu metiru janggana. Na-pahada-nya nuna paraïna i Hamàngu ka tiwalu-nya i Morundikaï, na mambàda pamara-ya na lurimu dumu tamu umbu,” wàna. Tàka na hanganji, “Tiwalu-nya i Hamàngu la ai nuna!” wàna.

¹⁰Tuna nuduka hi tiwalu-nya i Hamàngu la ai pambàda pahada-na ndumana i Morundikaï. Hina-duka hi na-wadaru na karaü etina na hanganji.