Read Kambera ETIRU 8 Bible Online

ETIRU 8 - Kambera bible

ETIRU 8

¹La lodu numa na Hanganji Ahaweru nawua-nya i Tamu Ràmbu Etiru mbuu ndàbada da pawulu-na i Hamàngu na muhu bokulu tau Yahundi. I Etiru napanii-nya na hanganji ba na-paana-miniya i Morundikaï, piti welingu la rehi nu i Morundikaï pa-pahiangu-ya palua la hanganji jiapa ka nda pa-paaungu-ya kadu.

²Na hanganji naàli-nya na tawuru-na na pambàda piti belina welingu lai Hamàngu hi nawua-nya i Morundikaï. Tàka i Etiru nawotu-ya i Morundikaï la pa-hamata-ha da pawulu-na i Hamàngu.

³Hàlaka nu i Etiru nahili lua la hanganji. Na-marubuku pa-kariangu hiina hi na-kamahi-nya na hanganji ka na-hikalu-ya na pawuku akatu pambàda lakunda-na i Hamàngu la tau Yahundi.

⁴Na hanganji na-pajola-nya na toku àmahu rarana lai Etiru, hi na-hadangu i Etiru,

⁵“Jiaya jàka wàmu tamu umbu, dàngu jàkau namu-duka, upaluhungu huratu pareta làti ka yila beliha da huratu-na i Hamàngu da ma-ihingu pareta pa-pamànji-ya mbutana na tau Yahundi la tana kuru pareta yiana.

⁶Nggiki hama torungu-ngguka paita-ya na banjaru dàngu da kalembi-nggu ba hambàli pambuta-ha?” wàna.

⁷Tàka na Hanganji Ahaweru, “Mbàda tiwalu-nggunyaka i Hamàngu ba nawuku-ya pa-pameti-ya na tau Yahundi, tàka da pawulu-na mbàda wua-ngguhaka lai Etiru.

⁸Tàka na huratu pambàda tulihu la tamu hanganji dàngu patungu hàpu hanganji nda peku-ana payila beliya. Ba tuna, ku-pahia-nggai pa-tulihu huratu rukuna na tau Yahundi, nggàra bia na mahàmu bai kakaya. Tulihu-yawa na huratu la tamunggu dàngu tunya hàpu pareta,” wànanja i Etiru dàngu i Morundikaï.

⁹La lodu numa, la tànggalu 23 wulangu tailu, na wulangu Hiwàngu, i Morundikaï napaau-nja da tau matanggu tulihu-nya na hanganji hi na-paràha-nja pa-tulihu-ya na huratu-da da nggumbunuru, da mbupati dàngu da amabokulu-ka la 127 porupinihu, piti welingu la Inindia lupa la Hundangu. Nuda da huratu pa-tulihu-ha la hilu dàngu la tulihu wikida da porupinihu-ka. Tàka nyuna wiki na-pangàndi-nya huratu na tau Yahundi la hilu dàngu la tulihu Yahundi.

¹⁰Nuda da huratu tanda limana i Morundikaï-ha la tamuna na Hanganji Ahaweru hi tunya hàpu pareta. Tàka i Morundikaï hi na-paràhangu tau palua patuha da huratu la porupini - porupinihu pareta ba lii la njara mbangatu-na na hanganji.

¹¹Da huratu nuda dapanii-ya: na hanganji na-pahia-nja da tau Yahundi la hau parai - hau paraingu ka da-kahaungu ba da-manggangu wikida. Jàka na-hànjalu-ha tau mambinu madàka-na nggàra tau biaya dàngu welingu la nggi porupinihu biaya, pekuna nyuda ka da-pa-tumbarungu dàngu ka da-pameti-ha da tau da ma-hànjalu-ha dàngu papaha dàngu anada; pekuna ka da-hambàli-ha da papada lundu mbutada dàngu la paramba-nja da pawulu-da.

¹²Nu na pareta lupangu pahàra-nya la nggubulu tana pareta Perihia la lodu pambàda kawuku-na i Hamàngu la pa-pameti-ha da tau Yahundi, la tànggalu hakambulu tailu wulangu hakambulu dàmbu, na Wulangu Andaru.

¹³Na huratu nuna lupangu ba paluhu huratu kalaratu-nya dàngu ka pakada-nya la tau mbuu ndàbana la mbuu ndàba porupinihu, ka na-rimangu na tau Yahundi pa-tumbaru-ya na muhu jàka jia-yaka na loduna.

¹⁴Ka laku-danyaka da papalewa ba da-kaliti njara hanganji. Tuumbuna la Huhàngu na parai puhu pareta, pa-bobaru-ya nuna na pareta.

¹⁵Hàlaka nu laku-nanyaka i Morundikaï welingu la uma hanganji dàngu wotu-naha da paki tau bokulu-na ma-kawuru dàngu mabara, kalembi malai mbaü atu welingu la tera linangu tamainangu dàngu tubuku àmahu rara ma-kanjupu manandangu-na. Da ihi parai Huhàngu dawara mbaha eti.

¹⁶Da tau Yahundi da-hangilu mbaha eti, da-paohangu wiki dàngu da-hamemu.

¹⁷La hau parai - hau paraingu-mbu dàngu la mbuu ndàba porupinihu-ka, la nggini bia ngia pambaha-ya na huratu pareta hanganji, da-hawola mbaha eti hi dambabu da tau Yahundi. Lundu ningumbu tau matama pa-Yahundi paraï pa-mangàdatu-nya nuna na banjaru.