Read Kambera ETIRU 9 Bible Online

ETIRU 9 - Kambera bible

ETIRU 9

¹La hupu njàpuna toma-naka na tànggalu hakambulu tailu wulangu Andaru, na lodu pa-kawuku la pa-pahàra-nya na pareta hanganji la tau Yahundi. Na lodu nuna nedida-padua-nya paraï da muhu tau Yahundi la pabera-ha da tau Yahundi. Tàka hi tau Yahundi bia-i mabera-ha nyuda.

²La hau parai - hau paraingu da-pauhi kahau etingu da tau Yahundi la pa-hànjalu-ha mbuu ndàbada da tau mawuku-ya na hanggàmaru-da. Na banjaru la nggi - nggini da-mangàdatu-nja hi nda haàtu matoru mbeni pa-tumbaru-ha.

³Mbuu ndàba da tau bokulu la porupinihu, da nggumbunuru, da mbupati dàngu da ma-pangaba la pareta dandula-ha da tau Yahundi, ba da-mangàdatu ndàbanya i Morundikaï.

⁴La nggubulu tana pareta napinya tau ba dira pangaru-ya i Morundikaï dàngu ba hama huka bonjangu-na na kawaha-na.

⁵Tuna nuduka hi dawàngu eti da tau Yahundi la muhuda, da-hànjalu-nja hapanda hi da-pameti-ha.

⁶La Huhàngu na parai puhu pareta, tau lima ngahuya na pa-pameti tau Yahundi.

⁷La hongada, hakambulu-ha da anana i Hamàngu na anana i Hamandata, na muhu bokulu tau Yahundi. Nyuda nuda jiaha: i Pàruhandata, i Ndàlupungu, i Àhapata, i Porata, i Andàluya, i Arindata, i Pàramàtahu, i Arihai, i Arindai dàngu i Waihata. Tàka da tau Yahundi nda da-rambangu-a banda.

¹¹La lodu numa napanii-nya tau na hanganji, na danguna na tau pa-pameti la Huhàngu.

¹²Tàka na hanganji napanii-nya i Etiru, “La Huhàngu jua-a tau lima ngahuya na pa-pameti tau Yahundi, papohu-nja da hakambulu anana i Hamàngu. Rihi-amaka la porupini - porupinihu! Jàka nggi tu bia-naka na pawunda-da lai nu! Màla, nggàra-yaipa nàhu na pakarai-mu? Panii biaya, lupangu-ma ungalanya!” wànanya.

¹³Nahema i Etiru, “Jiaya jàka wàmu tamu umbu, ka pahia-kinja làti da tau Yahundi la Huhàngu haromu la mbaru pahili belinya na pawunda-da la lodu nàhu. Dàngu nu da metida da anana i Hamàngu ka tiwalu-nja la ai tiwalu,” wàna.

¹⁴Tàka na hanganji na-wuangu pareta pa-pahàra-nya na pakarai-na i Etiru; hi paluhu-ya na huratu pareta ndumana la Huhàngu dàngu da metida da hakambulu anana i Hamàngu hi tiwalu-nja la ai tiwalu.

¹⁵Tu dunaka la tànggalu hakambulu patu wulangu Andaru dahili pauhi da tau Yahundi la Huhàngu hi dahili pameti tau tailu ngahu la paraingu nuna. La rehi nu nda ana nggàrambu paramba-da.

¹⁶Da tau Yahundi la porupini - porupinihu da-pauhi-mbu hi dambeni torungu. Dabera-ha da muhuda hi da-pameti 75.000-ya na tau ma-karaü-nja eti. Tàka nda nggàra-a paramba-da.

¹⁷Nuna nu na-hàrangu la tànggalu hakambulu tailu wulangu Andaru. Hadangu harii, la tànggalu hakambulu patu, nda ningua pa-pameti-da, tàka dambabu mbaha etinya na lodu nuna.

¹⁸Tàka da tau Yahundi la Huhàngu dambabu-nya na tànggalu hakambulu lima, lodu bokulu-ya ba wàda, ba mbàda pameti-da muhu la tànggalu hakambulu tailu dàngu hakambulu patu, hi da-pànjangu la tànggalu hakambulu lima.

¹⁹Tuna nuduka da tau Yahundi la parai - paraingu makudu da-pangàda-nya na tànggalu hakambulu patu wulangu Andaru ba lodu mbaha etiya, lodu mbabu hawola ba da-maràngga pa-wuangu ngara pangangu.

²⁰Hàlaka nu i Morundikaï natuha la huratu nuda da matumbu-ka hi na-pangàndingu huratu la mbuu ndàba tau Yahundi la nggubulu tana pareta Perihia la mamarau dàngu la ma-mareni.

²¹Na ihi huratu, jiaya na pareta ka mbabunya na tànggalu hakambulu patu dàngu hakambulu lima wulangu Andaru nimbihu ndaungu.

²²Ba la lodu nudadu dabera-ha da muhuda, hi lupa na-pambeli-ya hawola dàngu hamemu, na hawina dàngu na mayila-da. Tuna nuduka hi lupa dambabu-nja da lodu nuda wàngu remi dàngu ngaa pa-mbabungu dàngu da-maràngga pa-wuangu pangangu dàngu da-paberingu hunggu la tau mila.

²³Da tau Yahundi danunju-ya na pareta-na i Morundikaï, tuna nuduka na mbabu nuna hi kàli wànya hau ndau - hau ndaungu.

²⁴I Hamàngu anana i Hamandata, ana umbuku-na i Anggàku, na muhu bokulu tau Yahundi, mbàda tungu-naka undi na “purimu” ba wàda-mbunya la pa-kawuku-ya na lodu hambàli-ya na tau Yahundi; mbàda lakunda-mana-nyaka ka pamànji-ha.

²⁵Tàka i Etiru nalua la hanganji, hi na-wuangu pareta pa-tulihu na hanganji, hi lupa na wulu aka akatu-na i Hamàngu, nanggàna niya na wikina nyuna, hi kiri tiwalu-nja, nyuna dàngu da anana la ai tiwalu.

²⁶Tuna nuduka da lodu bokulu nuda Purimu hi wàdanya. Na huratu-na i Morundikaï dàngu mbuu ndàbana na pahunggu ràngga nauna na tau Yahundi,

²⁷na-pawiti-nya hi kiri tuda kalaratu nduma wikida, nduma ana umbuku-da dàngu nduma mbuu ndàbana na matama pa-Yahundi. Pa-namatu-nya na kalaratu nuna nimbihu ndaungu lupangu-ma dambabu-nja da dàmbu lodu nuda da pa-kawuku-na i Morundikaï.

²⁸Pa-kawuku-mbuya, da lodu Purimu nuda ba lupangu-ma da-pangàda-nja dàngu dambabu-nja paraï da tau Yahundi-ka la handidiku-handalaru lundu nu - nu, la nimbihu porupinihu dàngu paraingu.

²⁹La perana nuna, karia-na na huratu-na i Morundikaï, i Tamu Ràmbu Etiru anana i Ambihaïlu na-tulihu huratu padua mbàla wàna, ma-pakaràngi-ya na huratu-na i Morundikaï rukuna na Purimu.

³⁰Na huratu nuna pa-pangàndingu-ya la mbuu ndàba tau Yahundi, tàka na haleli-na, pa-pangàndingu-ya la 127 porupinihu tana pareta Perihia. Na huratu nuna pa-kariangu lii hamayangu, ka pa-daingu mambiru dàngu mandangu-na na tau Yahundi.

³¹Na huratu nuna na-kamahi-mbunja nyuda dàngu da ana umbuku-da ka da-pangàda-nja da lodu Purimu la loduna, hama tuna ba da-pangàda-nya na rehi puaha dàngu na rehi handuka-da. Nuna duyaka na ihi huratu-na i Morundikaï dàngu i Tamu Ràmbu Etiru.

³²Na lii pareta-na i Etiru na ma-kawuku-ha da kalaratu Purimu, pa-tulihu-ya la mbuku.