Read Kambera LUHU 1 Bible Online

LUHU 1 - Kambera bible

LUHU 1

¹I Yakupu, i Ihirailu ba wàda-mbunya, nalaku la Mehiru dàngu da anana lupa da kuru umada nimbihu-da. Da anana i Yakupu jiaha:

²i Rumbingu i Hamiungu i Lewi i Yahunda

³i Ihakàru i Hembulungu i Mbanyamingu

⁴i Ndàngu i Nàputali i Nggàtu i Ahiaru.

⁵Da wàla wuana i Yakupu nggubulu-da tau pihu kambulu-ha. I Yuhupu ni mangilu-manyaka duna la Mehiru.

⁶Mandai - ndaika nàhu i Yuhupu dàngu da anguna paluhu meti-danyaka, hamanai da tauka da angu rànjada.

⁷Na nyuna da wàla wuada, da tau Ihirailu lalu paana umbuku padangu-ha jia hi narengga ailulu pa-pabonjangu na danguda hi lupa nyuda-maka mapinu-ya la tana Mehiru.

⁸Tunaka nu ninya na haàtu na hanganji bidi na ma-katangu pareta la Mehiru, na manda tandaya i Yuhupu.

⁹Na hanganji napanii-nja da rayatu-na, “Da tau Ihirailu jiaha ka napa da pa-hanggàmaru wànda, nadu nyuda ba lalu danguda dàngu darihi kapàru-pa welingu lai nyuta.

¹⁰Jàka era tumbuna na pabera, napa peku-naka ba da-kapuli karia-nja da muhu la pa-papanda nyuta, hàla palai dunjaku-danyaka[1] na tana yiana. Tahimbu-njaka bàdi ànda ka àmbu dahili bonjangu padangu,” wànanja.

¹¹Da tau Mehiru dawotu tau ma-hamata-ha da tau Ihirailu ka pa-rajaku wànja paràma pa-mbangatungu ka paharui-ya na lurida. Dahàni-ha pa-pahada-nja da paraingu Pitumu dàngu na Raàmihu ndumana na hanganji Mehiru ka tuha ngia pa-pahàmu banda malanja.

¹²Tàka ba manaü kapidihu dànja paraï tau Mehiru, hili parukangu maada-nya pa-bonjangu na danguda da tau Ihirailu, dàngu parukangu-maada-nya pa-wewaru pinuya nuna na tana, hi lupa da-mangàdatu-nja tau Mehiru.

¹³Tunaka nu wàngu mbana etida da kapidihu-ha da tau Ihirailu,

¹⁴dàngu hi da-pamayila-ha. Ba dàngu nda pa-aïngu-da dahàniha paràma pa-mbangatungu la paràma ba pahadangu paraingu dàngu la paràma la woka.

¹⁵Tunaika nu na hanganji Mehiru nawua-nja pareta i Hipura dàngu i Pua, da kawini patika da makàli patika-ha da kawini Imbarani da ma-habola.

¹⁶Napanii na hanganji Mehiru, “La rehi luami pa-patika-ya na kawini Imbarani ma-habola, màta kai namu-maya yiana: Jàka anakeda miniya na madedi, pameti-maya! Jàka anakeda kawini-ya, màta-nyaka ka naluri,” wànanja.

¹⁷Tàka na nyuna nuda da tau madua ma-patika tau ma-mangàdatu-nya i Alaha. Nda dabihu-a panunju-ya na pareta hanganji hi da-pahia-nja paluri da anakeda mini.

¹⁸Tàka na hanganji napaau-nja nuda da tau madua ma-patika, “Nggikina hi mi-pahia-bianja paluri da anakeda mini?” wànanja.

¹⁹Dahema nyuda, “Da kawini Imbarani nda hama-ada da kawini Mehiru. Namuda nyuda la pa-habola. Ndedi matàka-mbu nyuma mbàda habola-daka duda,” wàda.

²⁰Na-pakanyuru-ha da tau madua ma-patika nuda paraïna i Ala dàngu nawua-nja wàla wuada ruku tembi-danya i Ala. Tàka da tau Ihirailu manaü kapingatu-mada.

²²Tunaka nu na hanganji hi nawua-nya pareta nggubulu-na na rayatu-na, “Nimbihu-da da anakeda mini tau Imbarani da mabidi dedi wàru-manja bàdi la Luku Nilu, tàka mbuu ndàbada da anakeda kawini màta-njaka ka daluri,” wàna.