Read Kambera LUHU 12 Bible Online

LUHU 12 - Kambera bible

LUHU 12

¹I MIRI napanii dànja i Muha dàngu i Harungu la tana Mehiru. Napanii-nja,

²“Na wulangu yiana jia-yaka na kawunga wulangu welingu la ndaungu pa-katutu-mu.

³Patàka-nya na pareta yiana la banjaru Ihirailu nggubulu-na: La lodu pa-hakambulu wàna na wulangu yiana, nimbihu-na na mini màta ka narupu heu ana mbimbi, ka dangaa ukurungu dàngu kuru umana.

⁴Jàka nda nadangu na kuru umana ràka mahàla-ya nuna na ana mbimbi ba heuna, ka da-pahamangu dàngu kuru uma angu ngiangu-da la lihida ka dangaa ukuru-nya nuna na ana mbimbi. Na toluna na ana mbimbi màta ka paberi-nya tundunya na danguna na angu kuru uma.

⁵Kai pindi mbimbi jàka ndia kamàmbi, na nyuna bumbu bàdi, mahau ndauna, dàngu àmbu ningu nyurana.

⁶Màta kai biliya lundu la lodu pa-hakambulu patu wàna na wulangu. La lodu nuna la malingu, mbuu ndàbana na banjaru Ihirailu màta ka darupu ana mbimbi tungu nu.

⁷Na hawutu na riana lupangu-ma kai perinya la punduku dàngu la pàlaku ditana na pindu la uma ngia pangangu-da.

⁸La rudungu nunama na tolungu nuna màta ka handara-nya dàngu ka nga wànya rii mapaita dàngu roti panda tungu tai wolu.

⁹Nuna na ana mbimbi lupangu handara ndàba-manya bàdi, màtu ndàbada na katiku-na, da wihina dàngu na ihi kambuna. Nganya na toluna na pambàda handarangu, àmbu ningudu pangaa matangu jàka ndia pa-manahu wai.

¹⁰Àmbu ningu pabili ana hawutu welingu la tolungu nuna lundu la mbaru; jàka ningu rihina, màta katunu pambuta-ya.

¹¹Nu bai ngangu lupangu-ma ka mbàda màtu paki-mika la palaku, dàngu halapa la wihimi dàngu tokungu la limami. Màta kai nga pare - renggangu-ma. Nuna-duyaka nambabu-nya na Paha la patembi wàngga Nyungga, MIRI.

¹²La rudungu nuna njada-nggunyaka na tana Mehiru nggubulu-na, hi ku-pameti-ha nimbihu-da da kawunga ana mini, ka tauya, ka banda-yakai. Napa Nyungga kuhuku-nja mbuu ndàbada da marapu la Mehiru, nadu Nyungga ba MIRI-ka.

¹³Na ria na maninya la pindu umami, jia-yaka na tandada da uma ngia pa-ngiangu-mi. Jàka kuita-yaka na ria nuna, kulaku lànganggai dàngu nda ku-patàlaru-akai la rehi huku-nggunya na Mehiru.

¹⁴Lupangu-ma mi-pangàda-nya na lodu nuna ba lodu bokulu-na i MIRI-ya. Na pangalangu-na lupangu kai reminya nimbihu ndaungu na lodu nuna,” wàna.

¹⁵Napanii i MIRI, “Pihu mbua lodu mandaina ba nda uku nyimi pangangu roti patungu tai wolu. La lodu kawunga-na mbuu ndàbada da tai wolu lupangu-ma kai paluhu-ha welingu la umami, nadu nu la dalu pihu mbua lodu, jàka ningu haàtu mangangu roti patungu tai wolu, nyuna nda peku-anapa la pareki-ya ba anggota banjaru-nggunya.

¹⁶La lodu kawunga, hamanai la lodu papihu wàna, màta kai pauhi la palumu-ngga. La lodu nuna àmbu nggàradu paràma-mi hinggilu-na ba mi-paloku pangangu.

¹⁷La lodu nuna mbuu ndàbana na banjaru-mi ku-karia-nya paluhu welingu la Mehiru. Jia-duya na pangalangu-na la nimbihu ndaungu lupangu-ma kai pangàda-nya na lodu nuna ba lodu bokulu-ya.

¹⁸La wula kawunga, pakiri welingu la lodu pa-hakambulu patu wàna la rudungu, lundu la lodu dua kambulu hau la rudungu, nyimi àmbi ngangudu roti patungu tai wolu. Nu la dalu pihu mbua lodu paluhu hàlaha da tai wolu welingu la umami. Na tau Ihirailu jàka ndia na tau tàka, ba talànga remi nu, ka nangangu roti patungu muru, nda pareki-ayapa ba anggota banjaru-nggunya,” wàna.

¹⁹

²⁰

²¹I Muha napaau-nja mbuu ndàbada da liku uru Ihirailu, hi napanii-nja, “Iluawa kai piti nduma kuru umami heu ana mbimbi paremi wàndanya na Paha.

²²Pitiwa ha-yubulu hihupu, kai hàbuya la tobungu maningu[10] wai riana na mbimbi, hàla kai perinya la punduku hapapa - hapapa dàngu la pàlaku ditana na pindu umami. Lupa la mbaru àmbu ningudu haàtu la hongami maluhu welingu la umami.

²³La rehi njada-nanya yiana na tana i MIRI la pa-pameti tau Mehiru napa naita-ya na ria la punduku dàngu la pàlaku dita pindu umami napa nalaku lànganya na umami; nda na-pahia-anya patama na Papalewa Ma-pameti la umami pa-pameti-kai.

²⁴Lupangu-ma nyimi dàngu da anami kai karadaku-nya yiana na pareta lundu nu - nu.

²⁵Jàka mitama-nyaka na tana na paràndi-na i MIRI lai nyimi lupangu-ma mi-paloku-ya bàdi na lii yiana.

²⁶Jàka da-paàrangu da anami, ‘Nggàraya duna na ihina na lii yiana?’ jàka wàda.

²⁷Lupangu-ma kai hema, ‘Yiana jia-yaka na kameti maraku Paha ka tembi wànya i MIRI, nadu i MIRI ba nalaku lànganja da uma tau Ihirailu la Mehiru, la rehi pameti-nanja da kawunga ana mini tau Mehiru, tàka nyuta hi na-pahia-nda paluri ka wàmi!’ ” wànanja. Ka maràbaku-danyaka da tau Ihirailu ba da-maraku-nya i MIRI.

²⁸Ka laku-danyaka hi da-paloku-ya na lii pareta-na i MIRI lai Muha dàngu i Harungu.

²⁹La mandalora i MIRI na-pameti hàlaha da kawunga ana minina na banjaru Mehiru, piti welingu la ana hanganji lupa la anada da tau pa-tahangu la uma kapàtangu. Mbuu ndàbada da banda da ma-kawunga dedi pa-pameti-mbuha.

³⁰La rudungu nuna, na hanganji, da maningu wai ngabada dàngu mbuu ndàba na tau Mehiru, da-pawàla hàla. La nggubulu tana Mehiru parongu-ya na mahii kaladaku, nadu ba nda ningu hau uma manda ningu ma-mameti haàtu anakeda mini.

³¹La rudungu nunama na hanganji ba napaau-nya i Muha dàngu i Harungu hi napanii, “Ilaku ndàbawa welingu yiahu! Dunjaku-nya na tananggu! Lakuwa kai maraku-nya na Alami hama tuna na pakarai-mi.

³²Ngàndi-hawa mbuu ndàbada da hapimi, da mbimbimi dàngu da kamàmbi-mi kai laku! Karai àrungga duku kanyuru ndumanggu!” wànanja.

³³Da tau Mehiru da-runggatu-ha da tau Ihirailu ka da-parenggangu palaku dunjaku-nya nuna na tana. Dapanii, “Mameti hàlaka napa jàka ndai laku!” wàdanja.

³⁴Da tau Ihirailu dapiti-ha da kanaingu maningu kanguta pa-haürungu pànda tungu tai wolu, da-kawuhuku wànja tera, hi daduku-ha.

³⁵Nyuda danunju-mayaka na papanii-na i Muha, nu la pakarai ngaü àmahu marara mabara dàngu paki welingu la tau Mehiru.

³⁶I MIRI najuju-ha da etida da tau Mehiru, hi damila-nja eti da tau Ihirailu, hi lupa dawua hàlanja da pakarai-daka. Ba tuda nu da tau Ihirailu luhu ngàndi-danjaka da banda pawulu-da da tau Mehiru welingu la tana nuna.

³⁷Ka hadangu-danyaka da tau Ihirailu, ba dali la wihi welingu la paraingu Raàmihu dalaku la paraingu Hukutu. Nggubulu-da tau 600.000 (nomu ngahu rata)-ya danguda, hinggilu-da da tau kawini dàngu da anakeda.

³⁸Nyuda dangàndi padangu hapi, mbimbi dàngu kamàmbi. Hau daa-madai da tau hangàdangu da ma-tundungu.

³⁹Datunu roti pànda tungu muru, welingu la kanguta pa-haurüngu da pangàndi-da welingu la Mehiru. Ba lalu harabàndangu-na ba dayaulu-ha, hi nda ningu pekuna la pa-paloku bàlangu-da.

⁴⁰Na banjaru Ihirailu mbàda 430 mbua ndau-daka ngalada pa-ngiangu la Mehiru.

⁴¹La lodu njàpuna na ndaungu 430 wàna, pajurungu hàla-nanyaka na banjaru-na i MIRI ba da-dunjaku-nya na tana Mehiru.

⁴²La rudungu nuna rimangu-na padua i MIRI ka iru ngàndiha nyuda paluhu welingu la Mehiru. Nu jia-duyaka la rehi malamiri na rudungu nuna ba rudungu pawotu lai MIRI-ya ka rudungu pa-ngàdangu-ya. Nu la rudungu tungu nu lupangu-ma na-pawàla bàdi na banjaru Ihirailu.

⁴³I MIRI napanii-nja i Muha dàngu i Harungu, “Yiana-yaka na kalaratu Pamangu Paha. Na tau hangàdangu nda ukua la pangangu tolu mbimbi na pa-maraku wàngu la lodu Paha.

⁴⁴Na nyuna na tau ata pakei pekuna pangangu, mili mbàda hàla pakàri-ya.

⁴⁵Na tau tàka jàka ndia na tau pa-wuangu hewa àmbu natundungudu pangangu.

⁴⁶Mbuu ndàbana na toluna na mbimbi nganya la umama bàdi nda uku pangàndi-ya la hambeli. Àmbu ningudu hapungu rina papata.

⁴⁷Mbuu ndàbana na banjaru Ihirailu lupangu-ma naremi-nya na pamangu nuna.

⁴⁸Na tau manda kàri nda uku la panganya na pangangu la pamangu nuna. Na tau hangàdangu na mambàda pa-engangu la hongami jàka na-mbuhangu paremi-nya na Paha la pawotu-ngga Nyungga, MIRI, lupangu-ma mbuu ndàbana na mini la kuru umana ka kàri pàkuha bàdi. Hàlaka nu pareki-ha nyuda ba tau Ihirailu memangu-haka, nu peku-naka nyuda la patama-mbu la pamangu Paha.

⁴⁹Na kalaratu hama-mana na pawàngu la tau Ihirailu memangu dàngu na tau hangàdangu na ma-paengangu la hongami nyimi,” wàna.

⁵⁰Mbuu ndàbana na tau Ihirailu da-karadaku dàngu danunju hàla-maya na pa-pareta-na i MIRI lai Muha dàngu i Harungu.

⁵¹La lodu nuna i MIRI na-karia hàlanya na banjaru Ihirailu paluhu welingu la Mehiru.