Read Kambera LUHU 13 Bible Online

LUHU 13 - Kambera bible

LUHU 13

¹I MIRI napanii-nya i Muha,

²“Wotu ndàba-nggaha Nyungga da anakeda mini ma-kawunga dedi. Nimbihu-da da anakeda mini la Ihirailu ma-kawunga dedi dàngu nimbihu-da da banda mini da ma-kawunga dedi, mangunggu Nyungga-ha,” wàna.

³I Muha napanii-nya na banjaru Ihirailu, “La lodu nàhu i MIRI na-pahàla-kaika wàngu kuaha bokulu, hi lupa peku luhumi welingu la Mehiru, la ngia paata ningumi. Jia-duya, pangàda-nyawa na lodu yiana. Àmbi ngangudu roti patungu tai wolu.

⁴La lodu yiana, la tànggalu kawunga wulangu Ambipu jàka ndia wulangu kawunga, dunjaku-minyaka na tana Mehiru.

⁵Nawàngu pa-harangu i MIRI ba nàrandi-ha da boku la mangilu-mi la pawua-nggainya nyimi na tana tau Kanaàngu, tau Heti, Amori, Hewi dàngu Yembuhu. Ba nahàla-ka i MIRI pa-karia-nggai la tana na mawulu dàngu na ma-kamboka, nimbihu ndaungu la wula Ambipu, lupangu-ma kai patumbu-ya na pamangu yiana.

⁶La dalu pihu mbua lodu màta kai ngangu roti pànda tungu muru, tàka la lodu na papihu wàna màta kai patumbu-ya na remi la pa-maraku-nya i MIRI.

⁷La dalu pihu mbua lodu nyimi nda uku pangangu roti patungu tai wolu, dàngu la nggubulu tanami àmbu ningudu tai wolu jàka ndia ana ngga - nggàra maningu tai wolungu.

⁸La kawunga pakiri-minya na remi, lupangu-ma kai pekanja da anami mini, nuda mbuu ndàbada hi mi-paloku-ha rukuda mbuu ndàbada da pa-patumbu-na i MIRI lai nyimi, ba jiaya na-dunjaku-minya na tana Mehiru.

⁹Na mbabu yiana, jia-yaka na pa-panamu wànggai nyimi, hama tuna na tanda la karanja pungumi dàngu na katàtu la kaba matami. Na remi yiana panamu wànanggai kai tiki pangala-nya dàngu la pa-papekangu welingu la Ukuna i MIRI, nadu ba i MIRI na ma-paluhu-kai welingu la Mehiru wàngu mbiha manyola-na.

¹⁰Reminya na lii yiana nimbihu ndaungu la rehi pa-kawuku,” wàna.

¹¹I Muha napanii-nja na banjaru Ihirailu, “Napa i MIRI na-karia-nggai la tana Kanaàngu na paràndi-na ba nawàngu harangu lai nyimi dàngu la boku la mangilu-mi. Jàka mimangu-nyaka nuna na tana,

¹²lupangu-ma kai maraku wànja da kawunga anami mini, hamanai da ana bandami mini da ma-kawunga dedi. Mbuu ndàbada manguna i MIRI-ha,

¹³tàka da ana kalandai mini da ma-kawunga dedi papuru-manja bàdi welingu lai MIRI ba wàngu pawotu-nya kameti maraku heu ana mbimbi hiluna. Jàka ndai bihu pa-papuru-nya nuna na kalandai, lupangu-ma kai poraku-ya na nggoruna. Nimbihu-da da anami mini da ma-kawunga dedi lupangu-ma kai papuru-nja bàdi welingu lai MIRI.

¹⁴Tai la lodu malamiri jàka da-paàrangu da anami, nggàra wànaka nu mbuu ndàbana, màta kai hema timinja yia, ‘Nawàngu mbiha manyola-na i MIRI ba nakaria-nda paluhu welingu la tana Mehiru, la ngia pa-paata-ta.

¹⁵Tàka ba na-malihu katiku-na na hanganji Mehiru dàngu ba nda nabihu pa-pahàla-nda palaku, i MIRI na-pameti hàlaha da anakeda mini da ma-kawunga dedi la Mehiru, ka ana tauya dàngu ka ana banda-yakai, tàka na nyuna nimbihu-da da kawunga ananda mini tahilu-ha ka papuru-nja,’ wàminja.

¹⁶Na huri nuna màta ka hama tuna karanja pungu-ndanya dàngu katàtu kaba mata-ndanya. Ba tunda nu jia hi tanamu mànuya ba i MIRI-maka na mambàda paluhu-ta welingu la Mehiru ba nawàngu mbiha manyola-na,” wàna.

¹⁷Ba napuli-nyaka palaku na banjaru Ihirailu paraïna hanganji Mehiru, nda na-karia-anja pali ningu la ànda na mali la tana Pilitingu paraïna i Ala, jiapa-kai ka jiaya na ànda na ma-dànggitu halawàla. Na pa-kanandi-na i Ala, “Napa da pekadu hàla era da tau nuda jàka daita-ya ba pabera-maipa bàdi, ka lupa beli-danyaka la Mehiru,” wàna.

¹⁸Jia-duyaka i Ala hi na-karia-nja pali la ànda ma-pawinggirungu, na mali la maràda telangu na ma-hanggangu la Tehiku Tibuhala.[11] Nu ba da-hadangu ba da-dunjaku-nya la Mehiru, da tau Ihirailu hawaritu-madanya madàka hama tuna malaku pa-pabera-maha.

¹⁹I Muha nangàndi-maha da riina i Yuhupu, nadu ba naluri-pa i Yuhupu, na-paràha-manjaka da tau Ihirailu pa-harangu, màta ka tumi nu ba wànanja. Tuna yia na hupu liina i Yuhupu, “La rehi pahàla-nanggai i Ala, mingàndi-maha bàdi da riinggu welingu lai yiahu,” wànanja.

²⁰Da tau Ihirailu da-dunjaku-nya la Hukutu, hi da-pamaüngu la paraingu Etàmu, la halinggi maràda telangu.

²¹La lodu i MIRI nalaku mangilu-nja la lumbu tandai karumangu tàka la rudungu na mangilu-nja la lumbu tandai epi hi daita àndada. Tuna nu hi peku lakuda la lodu la rudungu.

²²Piti weli mbaru lundu malingu na tandai karumangu ba hanina la hanggana nuna na banjaru tàka la rudungu lundu waihangu na tandai epi ba nalaku karia-nja.