Read Kambera LUHU 15 Bible Online

LUHU 15 - Kambera bible

LUHU 15

¹I Muha dàngu da tau Ihirailu wunda-danyaka yiana na ludu ba daludu wotunya i MIRI, “Ludunya i MIRI wànggu, nadu ba na-mehangu talu manàra. Da njara dàngu ma-kaliti-ha na-bubulu-nja la libu muru.

²I MIRI ma-kahiri-ka na-kapàru; Nyuna-maka na ma-pamara-ka. Nyuna Ala-nggunya ka kuwotu-nya Nyuna wànggu, i Ala na palumu-da da bokunggu la mangilu, ku pa-mangunju-ya.

³I Ala mambeni hanggangu na-kaborangu, MIRI-ya na tamuna.

⁴Da tanatara Mehiru dàngu da kareta-da na-kawuka wàrunja la tehiku. Da parawira da ma-kaborangu halawàla da-mumuhu la Tehiku Tibuhala.

⁵Nyuda na kawàluku-nja libu muru, hama tuna watuha ba da-tandaningu la kiri dehi.

⁶Na kapàru-mu na-pamaratangu, dou MIRI, hi lupa mu-pamija mauya na papamu.

⁷Wàngu bokulu mangunju-mu, bau pa-tàlaru hàlaya na mapapa-nggau. Na hànggamu na-kandulangu hama tuna epi hiu tunuha nyuda hama tuna rembi.

⁸Muhapui-ya na tehiku hi na-hangguluru pa-janggangu, hi na-ndolaku tinjangu hama tuna kangeli, hi peku li ningu la kiri libu muru.

⁹Napanii na muhu, ‘Napa kuyaulu-ha hi kuyàpa-ha, ku-butuhu hapanda-nggu dàngu ku-pambuta-ha. Hàla hi kuwàhi ndàbaha da bandada, kupabe - berinja hi ku-malanja wànja lundu hodanggu,’ wàna.

¹⁰Tàka i MIRI nawàngu kayeku handàkangu-a, ba na-patàka-nya lodu hanggàmaru na Mehiru. Da-tandaningu hama tuna tambura na mambotu, la kawunggaru nda najaru-na na wai.

¹¹Nggi Ala-kiya na menjamu Nyumu, dou MIRI Mahupu-mangarangu dàngu ma-matua? Nggamu na mamàka patuu pa-hangàtarungu dàngu ma-patumbu ma-bokulu hamana i MIRI?

¹²Mu-pajola-nya na lima kawana-mu, hi na-molungu na papamu ba na-kawàluku-nya tana.

¹³Mu-kapipi-ya na banjaru na pambàda pamara-mu yiana, nadu bau tuturu la patura la panjanji-mu. Wàngu kodi màkamu bau opanja nyuda, hi mulonda limaha la tana matua-mu.

¹⁴Darongu ndàba da banjaru hi da-kandàndaku; na banjaru Pilitingu dàngu da liku uru Endumu da-kanggupuku. Da tau Muapu kaborangu da-nggairidu, da tau Kanaàngu da-kadukungu da etida.

¹⁶Kanjupu mangàdatu-ha nyuda, ba daita mataya na kodi màkana i MIRI. Ba nàhunya na banjaru-mu nda datara papàtu-ya paraï muhu; ka laku pangalangu-nanyaka na banjaru pa-pahàla-mu.

¹⁷Hi mu-karia-nya na Ihirailu, la pa-ngiangu na papindi-mu patuu ngia pa-ngiangu-mu. Nu hi da-paengangu la tandula matua-mu, la Uma na pawulu wikimu.

¹⁸Nyumu dumu MIRI-kau, Hanganji-kamu ma-katangu pareta lundu nu - nu,” wàna.

¹⁹Ba dapala tehiku da tau Ihirailu da laku li ningu la latana na mamàdu. Tàka ba datama-ka la tehiku da kareta Mehiru dàngu da njara hamanai da ma-kaliti-ha, i MIRI na-palaku beliya na wai ba na-pambulu-nya hi lupa da-mumuhu hàla.

²⁰Hàla i Miriyàmu, na wunangu kawini, ayana i Harungu, piti-nanyaka na lamba ha-kapapa-na dàngu mbuu ndàbada da kawini anguna da-tundungu-mbu lamba ha-kapapa ba dàngu renjada.

²¹I Miriyàmu naludu-nja nyuda, “Wundanya ludu i MIRI, nadu ba mbàda talu manàra-naka. Mbuu ndàbada da njara dàngu da ma-kaliti-ha na-kawuka wàrunja la libu muru,” wàna.

²²Tunaka nu i Muha na-karia-nya na banjaru Ihirailu welingu la Tehiku Tibuhala hanggangu la maràda telangu Hiuru. La ngala tailu mbua lodu ba dalaku-nya na maràda telangu nda ana ngalangu-da wai.

²³Nu ka tàka-danyaka la hau pangia na ma-tamungu Mara,[14] na nyuna na wai lai nu paita nda ukuya, hi nda peku la paunu-nya. Jia-duya Mara hi wàdanya lai nu, paita, wàna-duka nu.

²⁴Ka panii hoputu-nanyaka tau i Muha, hi da paàra-nya, “Nggàraka paunu-nda yia?” wàdanya.

²⁵Ka hamaya pa-mbanangu-nanyaka i Muha, tàka i MIRI hi na-paita-nya na ha-katiri na ai. Na ai nuna nanduha-ya i Muha daa la wai, ka kàba-nanyaka na wai, hi peku ununya. La pangia lai nu i MIRI ba nawua-njaha da kalaratu dàngu lai numbu ba nakama-nja.

²⁶Napanii i MIRI, “Karadaku weli etingu-wa lai Nyungga, dàngu wunda-hawa da mahàmu ba wànggu; nunju-hawa mbuu ndàba da hupu liinggu. Jàka timi nu, nyimi napa nda kuhuku wa-ànggainja da panyaki da pa-panggàna-nggunja da tau Mehiru. Nyungga duku MIRI-ka ma-pamàlaru-kai nyimi,” wànanja.

²⁷Tunaka nu tàka-danyaka la hau pangia, na ma-tamungu Elimu. Lai nu ninja ba hakambulu dàmbuda da matawai dàngu hi pihu kambulu-da da pingi kuruma. Dawulu maüda la lihi matawai.