Read Kambera LUHU 18 Bible Online

LUHU 18 - Kambera bible

LUHU 18

¹I Yituru, ama yerana i Muha, na ratu la Mindiangu, narongu hàla-yaka na pa-patumbu-na i Ala ndumana i Muha dàngu banjaru Ihirailu, ba nairu ngàndiha paluhu welingu la tana Mehiru.

²Ka lua-nanyaka i Yituru pa-tadalu-ya i Muha, na-karia-nya i Hipora, papaha-na i Muha ba jiapa-yapa la Mindiangu,

³lupa i Nggerihomu[19] dàngu i Eliyehiru, da anana mini da madua. Na kawunga anana na-patamu-nya Nggerihomu, nadu napanii i Muha, “Nyungga duku tau tàkaka la tana tau,” wàna;

⁴na ana padua wàna na-patamu-nya Eliyehiru,[20] nadu napanii i Muha, “I Ala na palumu-da da boku la mangilu-nggu mbàda ndula-nanggaka hi na-pamara-ka hi lupa nda na-pametika paraïna hanganji Mehiru,” wàna.

⁵I Yituru namai karia-nja na papaha-na i Muha dàngu da anana da madua la maràda telangu ngia pa-pamaüngu-da la lihi palindi matua.

⁶I Muha pa-pekangu-mayaka ba nàmunja,

⁷ka luhu-nanyaka pa-hàmburu-ha. Ka maràbaku-nanyaka la hànggana i Yituru dàngu hi na-puduku-ya. Da-kawàra paàrangu jàka nda nggàra ehida haàtu - haàtu, hàla tama-danyaka la maüna i Muha.

⁸I Muha na-palara-nya la ama yerana mbuu ndàbada da pa-patumbu-na i Ala hangganya na hanganji dàngu na banjaru Mehiru ka pamara-ya na tau Ihirailu. Na-palarambu-nya rukuda da ma-kalutu na pa-hanggana na banjaru Ihirailu nàmu la ànda, dàngu jàka nggi - nggikina i MIRI ba na-pamara-ha nyuda.

⁹Narongu hàla-yaka nuna, i Yituru na-nggaüru wànya na etina

¹⁰hi napanii, “Pa-wotungu-ya i MIRI na ma-pamara-kai welingu la limana na hanganji dàngu na banjaru Mehiru! Pa-wotungu-ya i MIRI na ma-pahàla-ya na banjaru Ihirailu welingu la paata!

¹¹Nàhu nyungga pi-nggunyaka ba i MIRI-a na marihi bokulu welingu la mbuu ndàba marapu, nadu ba na-patumbu-ha nuda mbuu ndàbada ba jiaya na-paluangu-da lima da tau Mehiru la tau Ihirailu ba dawàngu jangga etida,” wàna.

¹²Tunaka nu i Yituru ngàndi-nanyaka kameti maraku patunu dàngu kameti parupu ba jiaha da pawotu-na lai Ala. I Harungu dàngu mbuu ndàbada da liku uru tau Ihirailu damai hàla hi dangaa pambabu dànya i Yituru lai nu ba ninya i Ala.

¹³Hadangu harii mandapu-nanyaka la batangu i Muha ba na-patanda-nja ngera da tau ma-pahili la honga tau Ihirailu. Na paràma nuna na-mehangu rehi piti welingu mbaru lundu rudungu-na.

¹⁴I Yituru naita hàla-yaka na paràma-na i Muha, hi na-paàra-nya, “Ngga - nggàra-haka nu da paràma-mu ndumana na banjaru yiana? Nyumu meha-maka nu maràma hàlaya nuna, hi lupa jàka paàrangu-danya lii pairu-ngàndingu-amu, hi dawàngu pa-ndolaku-maaka piti weli mbarungu lundu rudungu-na?” wànanya.

¹⁵Nahema i Muha, “Da tau yiada maida lai nyungga la pa-patingi-nya na pawuku-na i Ala.

¹⁶Jàka ningu pahili-da damai lai nyungga hi kubota-ya na palakara-da dàngu hi ku-patàka-nja da pareta-na dàngu da Ukuna i Ala,” wàna.

¹⁷Napaya i Yituru, “Nda nahàmu-a ba tuna nu.

¹⁸Ba wàngu patumu nu pa-njilingu-munya wikimu, hamanai nuda da tau. Na paràma nuna lalu danguna jàka haàtu-a.

¹⁹Patingi-nya na lii pairu ngàndingu-nggu nyungga, dàngu napa i Ala nandula-makau duna. Nahàmu-maka nu ba nyumu mangaru-nya na banjaru yiana la hanggana i Ala dàngu ma-patàka-nya na rukuda nyuda la hanggana Nyuna.

²⁰Nyumu mu-papeka-nja bàdi da pareta na i Ala dàngu kau pa-kaloka-nja na huri luri na mahàmu dàngu jàka nggàraya ka bàdi na pawàda.

²¹Hinggilu-naka nuna mupindi-maka bàdi tau mapira tau mini ma-manggàna, kau tuha liku uru nduma tau harata, tau hangahu, tau lima kambulu dàngu tau hakambulu. Tau ma-mangàdatu dàngu ma-karadaku lai Ala-mahaka bàdi, dàngu tau ràka pawai dàngu manda mbuhangu pakei li kajia-ha.

²²Paràha-nja ka jiaha nyuda da hakimu la banjaru yiana, nimbihu-da nduma kalibaru-da. Nuna na wai ngerada màta ka na pa-nuangu ba da-palaku-ya. Da palakara da ma-mbàtingu pekuna ka dawotu-ha lai nyumu, tàka na ana pahili hakudu - hakudu màta ka da-palànyapu wiki-danyaka duda. Ba tuna nu mu-halimu-ka nyumu, nadu nyuda ba angu-mika la patanggu hema.

²³Jàka muwànya na matuna nu, dàngu na ngerana nuna ka nawua-nggau pareta i Ala, napa mumàka pa-palaku-ya na wai tanggumu,” wànanya.

²⁴I Muha natundu-manya na lii pairu ngàndingu-na i Yituru,

²⁵na pindiha da tau manggàna la honga banjaru Ihirailu. Na tuha liku uru la tau harata, la tau hangahu, la tau lima kambulu dàngu la tau hakambulu.

²⁶Nyuda da-palaku-ya na wai ngerada ba hakimu-ha la banjaru Ihirailu. Da palakara da ma-mbàtingu dangàndi-ha lai Muha, tàka da ana pahili hakudu - hakudu pa-lànyapu wiki-madaha duda.

²⁷Tunaka nu i Muha pulina-nyaka na ama yerana palaku, ka beli-nanyaka i Yituru la tanana.