Read Kambera LUHU 19 Bible Online

LUHU 19 - Kambera bible

LUHU 19

¹Hàlaka nu na banjaru Ihirailu dunjaku-nanyaka na Rapindimu, la kawunga lodu wulangu tailu la hambeli dunjaku-danya na Mehiru, tàka-danyaka la maràda telangu Hinai. Dawulu maü terada la karaha Palindi Hinai,

³nyuna i Muha hei-nanyaka la pinu palindi pa-pahàmburu dànya i Ala. I MIRI napanii dànya i Muha welingu la palindi, hi na-paràha-nya pa-pakada-nya la tau Ihirailu, wàla wuana i Yakupu,

⁴“Nyimi mbàda ita-minyaka jàka nggàraya na pa-patumbu-nggu Nyungga hanggangu la tau Mehiru, dàngu jàka nggikina ba ku-karia-nggai lai Nyungga la pangia yiana ba kuwàngu mbiha manyola-nggu, hama tuna na mbaku ma-hawurungu na mangàndi anana la pinu kàpana.

⁵Nàhu jàkai karadaku lai Nyungga dàngu jàkai tuturu la pa-ràndingu-nggu, napa nyimi kutukai banjaru wikinggu. Na pa-nggubulu awangu mangunggu-nya, tàka nyimi napa jia-kaika mangu paaï namunggu,

⁶kukahau-nggai nduma wikinggu, dàngu nyimi napa ratu - ratu-kaika malumu-ngga Nyungga,” wàna.

⁷Ka puru-nanyaka i Muha hi napaau hàlanja da liku uru ka da-pauhi, hàla palara-nanjaka nyuda mbuu ndàbada da pa-pareta-na i MIRI lai nyuna.

⁸Nyuda mbuu ndàbada handàka tarànjaku-da ba dahema, “Ma-mbuhangu-ma duma nyuma na papanii-na i MIRI,” wàda; tàka na hema nuna, na-patàka-nya i Muha lai MIRI. Nanapa-ya i MIRI lai Muha, “Napa Nyungga kumai lai nyumu ba kuwàngu pa-kalumburungu karumangu timbi; na tau dangu darongu-ma ba ku-kareuku dànggau nyumu, jia-duyaka piti welingu nu hi dawai mànukau nyumu.

¹⁰Nàhu lua toma-hawa da tau nuda, kau paràha-nja ka da-hawanjiru wikida nàhu dàngu haromu la pa-lumungu. Lupangu-ma bàdi ka dabaha-ha da pakida.

¹¹Dua modungu màta ka mbàda hawanjiru hàlada. La lodu nuna napa Nyungga kupuru la pinu Palindi Hinai, la ngia papeku ita hàla-nangga tau.

¹²Tunya wiri la weli winggiru-na na palindi yiana ka jiaya na padira na panda panggana na banjaru. Hirinya na banjaru ka àmbu ningu mahei la palindi, la palihi-nya ndia-mbu. Nggamu mapangga-ya na padira, napa pa-hukungu metiya;

¹³na tau nuna lupangu-ma ka nàhaku-nya watu jàka ndia wàngu papana-ya, dàngu nda ukumbu pa-jonggaru-ya. Na larangu yiana nanggàna-ya na tau dàngu na bandambu; mbuu ndàbana na mapangga-ya na padira màta ka pa-hukungu metiya. La rehi rongu-danya na lingu pa-malaingu-na na taropitu, lupangu-ma da tau nuda da-kandekalu la palindi,” wàna.

¹⁴Tunaka nu puru-nanyaka i Muha welingu la palindi hi na-paràha-nya na tau la pa-hawanjiru ka lumungu. Napanii, “Dua modungu nyimi kai hawanjiru, dàngu ba talànga tuna nu àmbi paangu kàdi,” wànanja. Ka hawa - wanjiru-nanyaka na banjaru ba dabaha-ha da pakida.

¹⁶La lodu patailu wàna, la mba - mbaru, tungu-nanyaka na kanduruku dàngu na kabàla. Na karumangu timbi wuwa-nanyaka la pinu palindi dàngu rongu-danyaka na lingu taleli na mambana pa-hàdirungu. Mbuu ndàbana na tau la maü nda - ndàndada ba da-mangàdatu.

¹⁷Ka luhu karia-nanjaka paraïna i Muha la pa-pahàmburu dànya i Ala, hi da-ndolaku la karaha palindi.

¹⁸Nggubulu-na na Palindi Hinai na pa-nggàbalu-nya kawuu, nadu ba puru-nanyaka i MIRI dita la pinu ba napuru wàngu epi. Na kawuu nuna na-hadumbalu hama tuna na kawuu welingu la pàparu pahulu, dàngu nggubulu-na na palindi, na-kanggauhaku nda najaru.

¹⁹Na lingu taleli parukangu-mananya pa-pahàdirungu. I Muha napanii dànya i Ala, tàka i Ala nahema wàngu kanduruku.

²⁰I MIRI napuru dita la pinu Palindi Hinai, dàngu hi napaau-nya i Muha pamai dita la pinu palindi. Ka kandekalu-nanyaka i Muha,

²¹tàka i MIRI hi napanii dànya i Muha, “Purukau dàngu kau pekanja da tau ka àmbu dapangga-ya na padira la pamai pa-tàngaru-ka Nyungga. Jàka dapa-nggamayai napa nadangu da anguda da mameti.

²²Jiapa da ratu da ma-mbuhangu pa-mareni-ngga, da-hawari-mapa wikida bàdi; jàka ndia napa kuhuku-nja,” wàna.

²³Nanapa-ya i Muha lai MIRI, “Da tau nda peku hei-ada, nadu ba mbàda wuangu-muka pareta ba pangia pa-pamalilingu-ya yiana na palindi dàngu ma-hamata-ha da padira maweli winggiru-nya,” hi wàna.

²⁴Nahema i MIRI, “Puruwa nyuna, hàla kau beli yiahu kau karia-nya i Harungu. Na nyuna da ratu dàngu na rayatu àmbu dapa-nggaduya na padira la pamai lai Nyungga. Jàka dapangga-ya napa kuhuku-nja,” wàna.

²⁵Puru-nanyaka i Muha ba nalua tomaya na banjaru, hi na-patàka-nya na lii pa-patàkangu welingu lai MIRI lai nyuda.