Read Kambera LUHU 2 Bible Online

LUHU 2 - Kambera bible

LUHU 2

¹La rehi nuna ninya na haàtu na mini la kabihu Lewi, na kanoma-ya na haàtu na kawini angu kabihu-mada.

²Ka paana-nanyaka nuna na kawini, haàtu anakeda mini. Ba naita-yaka nuna na ana rara ba nahàmu matana, wini-nanyaka tailu mbua wulangu mandaina.

³Tàka na ana rara nuna nda peku-anapa la pawini mandai - ndainya. Ka piti-nanyaka hau ana pàti tibuhala na inana, hi na-apihu-nya teru ka àmbu natama-nya wai ba wàna. Na-bànjalu-ya nuna na ana rara daa la ana pàti, hàla hi nangàndi-ya la Luku Nilu dàngu hi natuya la wuku tibuhala la hingi luku.

⁴Na ayana kawini nuna na ana rara na-ndolaku marau hakudu la pa-hamata-ya jàka nggàra ehina na erina.

⁵Tàlanga tunaka nu tàka-nanyaka na ana maràmba kawini. Puru-nanya paihu laluku, tàka da ata karia-na wenangu-danya la hingi luku. Hi jia ita bia-nanya na ana pàti la wuku tibuhala paraïna na ana maràmba, ka paràha-nanyaka na haàtu na atana papiti-ya.

⁶Ba na-bunggahu-yaka nuna na ana pàti paraïna na ana maràmba ka ita-duna-nyaka daa ba ningu ana rara, tàka nuna na ana rara hii-nanya. Ka mila-nanyaka na etina na ana maràmba, “Ana tau Imbarani-yaka yia,” hi wàna.

⁷Ka mai-nanyaka na ayana na ana rara, hi na-paàra-nya na ana maràmba, “Mumbuhangu nu Tamu Ràmbu kudu ka himbu-nggau haàtu kawini Imbarani ka na-pahuhu-ya nana na ana rara?” wànanya.

⁸“Hàmudu,” hi wàna na ana maràmba. Ka lua-nanyaka nuna na bidi kawini la papaau-nya na ina wikina.

⁹Tàka na ana maràmba hi napanii-nya na nuna kawini, “Ngàndiya yiana na ana rara kau pahuhu-ngganya; napa ka kuwua-nggau ka wunda pahuhu-mu,” wànanya. Ka ngàndi-nanyaka hi na-pahuhu-ya.

¹⁰Ba nangeri matua-ka nuna na ana rara, ngàndi-nanyaka paraïna inana, hi nawua-nya na ana maràmba kawini. Nyuna na ana maràmba kawini tu-nanyaka nganggu anana nuna na anakeda. “Ku-patamu-nya Muha[2] wàna, ba papiti-nggu la waiya,” wàna na ana maràmba kawini.

¹¹Ba na matua-ka i Muha, lua-nanyaka pa-tadalu-ya na angu banjaru-na. Ka ita-nahaka ba dira huta-daha paràma ma-kanjupu mbotu halawàla. Naita-ya na haàtu tau Mehiru ba na-pameti-ya na haàtu na tau Imbarani.

¹²I Muha na-nggilaku la winggiru-na, tàka ba naita-ya ba nda ningu mapanau-ya, ka pameti-madua-nanyaka nuna na tau Mehiru, tàka na metina hi nawini-nya la wara.

¹³Hadangu harii hili lua-nanyai i Muha, ka ita-nanjaka da tau madua tau Imbarani da ma-pahànggangu. Tàka i Muha, “Ka nggikina hiu paluya na angumu?” wàna ba na-paàra-nya na tau na manjala.

¹⁴Nahema nuna na tau, “Nggamu mawotu-kau nyumu la paliku uru-nggama dàngu la patimba-nggama ngerama? Ka kuhili pameti-ya nyuna wàmuka nu, hama tuna kangeu bau pameti-ya na tau Mehiru?” wàna. Ka mangàdatu-nanyaka i Muha, hi napanii la etina, “Ai-inai hanggàmaru-yaka! Mbàda ninguka mapiinya na paruku-nggu,” wàna.

¹⁵Ba narongu-ka na hanganji na rukuna nuna, himbu-nanyaka uku la pa-pameti-ya i Muha. Tàka i Muha palai-nanyaka hi na pa-engangu la tana Mindiangu. Na ratu la Mindiangu, na ma-tamungu Yituru, da pihu da anana kawini. La hau na lodu, ba na-mandapu i Muha la lihi humuru, tàka-danyaka ba dapihu da anana kawini i Yituru la pataku wai dàngu la pa-paihi-nja wai da karaba ngia paunu-da da kamàmbi dàngu da mbimbina na amada.

¹⁷Tàka ba mapira-ha da mini pawangu, dawàngga-maaha nuda da bidi kawini. Ka mai-nanyaka i Muha pandula-ha hi na-paunu-nja wai da bandada.

¹⁸Ba dabeli-ka, paàra-nanjaka paraïna amada, “Nggikina hi mbàda beli hahangu-mi la lodu nàhu?” wànanja.

¹⁹Danapa-ya nyuda, “Ninya na haàtu na tau Mehiru na ma-kahiri-kama welingu la tau pawangu da ma-hihiku-kama. Malai ba nataku-nggama wai nyuma dàngu hi na-paunu-mbunja wai da bandanda,” hi wàda.

²⁰“Ka nggiyaka nu nyuna?” wànaka i Yituru ba na-paàra-nja da anana. “Nggikina nyimi hi dunjaku meha bianya na tau nuna? Luawa nu kai wàndaya ka namai pangangu,” wànanja.

²¹Nyuna i Muha na-orangu pa-ndàdiku lai nu. Tunaka nu i Yituru papohu-nanjaka na anana i Hipora dàngu i Muha.

²²I Hipora na-paana-nya haàtu-na na anakeda mini. Na anakeda nuna na-patamu-nya Nggerihomu,[3] paraïna i Muha, nadu na pa-kanandi-na, “Nyungga ba tau nàmu-aka duku lai yiahu,” wàna.

²³Pi - pira-naka na ndaungu na malàpahu meti-nanyaka na hanganji Mehiru. Tàka na banjaru Ihirailu jiapa-yapa ba dahali urada, nadu ba pa-paata-ha, hi lupa da-warangu pakarai pa-ndulangu. Na kaladaku-da natoma-ka lai Ala.

²⁴I Ala narongu-maha, dàngu nanamu-ya na paràndi-na lai Ambarahàmu, i Ihàku dàngu i Yakupu.

²⁵Naita-mahaka da tau Ihirailu ba paata-ha, jia-duya hi nabota-ya la pandula-ha.[4]