Read Kambera LUHU 21 Bible Online

LUHU 21 - Kambera bible

LUHU 21

¹Hàla panii-nanyaka i MIRI lai Muha, “Wuanja da tau Ihirailu da kalaratu yiada:

²Jàkai kei nyimi haàtu tau ata angu banjaru wikimi, lupangu-ma naràma lai nyimi la dalu nomu mbua ndaungu. La ndaungu papihu wàna lupangu-ma kai pahàla-ya dàngu àmbu nggàradu pa-mbayaru-na.

³Ngera hama tuna jàka kalimbu mini-yapa bau atanya, na papaha-na àmbu na-kikungu-du ba naluhu nyuna. Tàka ngera hama tuna jàka mbàda lalei-naka bau atanya, na papaha-na pekuna ba naluhu karia-nya.

⁴Jàka na mirina na ma-palalei-ya, ba napiti-nya haàtu kawini, hàla hi na-ngalangu ana, na papaha-na dàngu anana manguna na miri-nanya, nda peku-ana nyuda pakiku-nya nuna na ata ba pahàla-ya.

⁵Tàka ngera hama tuna jàka napanii nuna na ata ba nanamu-ya na papaha-na, da anana hamanai na mirina, dàngu nda na-mbuhangu ka pahàla-ya,

⁶na mirina lupangu-ma ka na-karia-nya la ngia pa-lumungu. Lai nu paràha-nya nuna na ata ka na-ndolaku haria la pindu jàka ndia la punduku pindu ngia pa-lumungu, tàka lupangu na mirina na-kajuku pandeha-nya la pindu ba na-kajuku-ya na kahilu-na nuna na ata. Nu ka ata-nanyaka lundu metina.

⁷Na haàtu na kawini Imbarani ka nadangga-nya hama tuna ata paraïna amana, na kawini nuna nda pahili pahàla-ayapa ba hàla panomu mbua ndaungu, jia ba tuna na-pahilitu dàngu na ngerana na ata mini.

⁸Jàka nda natuya na-pahàmu wànanya eti paraïna mirina na mawuku-ya la pa-kanoma-ya lupangu-ma nadangga belinya la ina amana. Nda ukua padangga-nya la tau hangàdangu nuna na kawini nadu ba mbàda panyonga-nanyaka paraïna mirina, na manda patutu-nya na paràndi-na.

⁹Jàka era ningu haàtu makei ata kawini, ka natu papaha-na na ananggu mini ba wàna, lupangu-ma na-anggaraa-ya nuna na ata kawini hama tuna na ana wikina.

¹⁰Jàka nahili lalei nuna na anana mini, pa-daingu ngera-mananya la pawua-nya pangangu dàngu pakina hamanai mbuu ndàbada da hàkuna hama tuna na pakàli wàngu la kawunga papaha-na.

¹¹Jàka nda na-patutu-nya nuna na wai ngerana, lupangu-ma na-pahàla-ya bàdi na papaha-na dàngu nda ningu pakeina pa-palohu wàngu,” wàna.

¹²“Nggamu mapalu tau hawiangu lupa nameti, lupangu pa-hukungu metiya.

¹³Tàka jàka na papalu dàngu nda hara wukuna dàngu nda nawuku-aya la pa-pameti-ya, pekuna ka napalai la hau pangia na pa-patuji-nggunggai napa, dàngu lai nu nyuna pa-kahiri-ya.

¹⁴Tàka na haàtu tau ma-mbumbaru karaü etina hi na-harawuku pa-pameti tau hawiangu, hàla ka napalai la ngia pawotu-ngga maraku ka kahiri-ka ba wàna, lupangu-ma papiti-ya na tau nuna welingu la ngia pawotu maraku dàngu ka huku pameti-ya.

¹⁵Nggamu na palu amana jàka ndia inana lupangu-ma pa-hukungu metiya.

¹⁶Nggamu na mapiti winingu haàtu tau, lupangu-ma pa-hukungu metiya, jàka mbàda dangga-nanya jàka ndia ka ninyakai la umana.

¹⁷Nggamu na ma-ràtungu amana jàka ndia inana, lupangu-ma pa-hukungu metiya.

¹⁸Jàka ningu tau ma-pahànggangu, na haàtu ka napalu-ya na tau haàtu ba nawàngu watu jàka ndia kawudu limana, na nyuna nda na-pameti-ya, nyuna nda pahuku-anya. Nuna na tau na papalu ka na katuda wànya na ruku palu,

¹⁹tàka la malamiri peku hadanguna dàngu peku pangga wànguna tokungu, màta na tau na mapalu-ya ka na-anggaraa-ya lupa na-mandangu dàngu ka nahilu-ha da pamburina ba dalu hiduna.

²⁰Nggamu na mapalu atana mini jàka ndia kawini hi lupa nameti memangu nuna na ata, huku-manya bàdi.

²¹Tàka nuna na ata jàka nda nameti wànya la hau lodu dàmbu lodu, na mirina nda pahukua-nya. Da pamburi-na ba na-maromba nuna na atana jia-mayaka na hukungu-na.

²²Jàka tau mapira-ha da tau mini da ma-pahànggangu, tàka ninya na haàtu welingu la hongada na matuya na pa-hanggàri wàna na haàtu kawini na maningu ihi kambungu hi lupa namunju wàla, tàka nda ningu papàda hauna la ihina, lupangu-ma na-palohu-nya tundunya na pa-karuhi-na na mini leina dàngu jàka da-pajia-ya paraï da hakimu.

²³Tàka jàka narihi mbotu na hanggàri-na nuna na kawini, ndumana na ma-akatu tungu nu na hukungu-na jiaya na luri hilu wànya luri,

²⁴mata hilu wànya mata, ngàndu hilu wànya ngàndu, lima hilu wànya lima, wihi hilu wànya wihi,

²⁵manua hilu wànya manua, halubuku hilu wànya halubuku, mbua hilu wànya mbua.

²⁶Nggamu na mapalu-ya na matana na atana hi lupa napoki, lupangu-ma ka na-pahàla-ya na atana, nuna nu palohu-mana-nyaka ndumana na matana.

²⁷Na haàtu na tau ka napalu-ya na atana hi lupa nambàpu na ngànduna, na tau ata nuna pahàla-ya bàdi nuna nu palohu-mana-nyaka ndumana na ngànduna,” wàna.

²⁸“Na heu na hapi mini rombangu ka nahiku-ya na haàtu hi lupa nameti, na hapi nuna pameti-ya bàdi ba wàngu pa-nàhaku-nya watu, na toluna àmbu ngaa-dunya, na nyuna na mangu hapingu nda pahuku-anya.

²⁹Na hapi mini rombangu nuna jàka nakàli pahiku, tàka na mangu hapingu mbàda paniingu-mayaka, tàka nda namangga-anya nuna na banda, hàla jàka nahiku pameti tau nuna na hapi, lupangu nàhaku pameti wànya watu nuna na banda, tàka na mamangu-nya lupangu-ma pahukungu metiya.

³⁰Ba tuna jàka pa-pahiangu-ya na mangu hapingu pa-palohu, màta ka na-wuangu hama tuna na pa-karuhi la pa-palohu hiluya na lurina.

³¹Nu na mameti ka anakeda miniya jàka ndia ka anakeda kawini-ya, jia-mayai na kalaratu nuna na pawàngu.

³²Nuna na pa-pameti jàka ata miniya jàka ndia ata kawini-ya, nu na mangu hapingu lupangu-ma ka na-wuangu tailu kambulu àmahu bara la mangu atangu, dàngu nuna na hapi lupangu-ma ka nàhaku-nya watu ka nameti.

³³Nggamu na mapiti-ya na ndàbina na hau humuru jàka ndia na maàki humuru tàka nda natunya ndàbina, hàla na heu na hapi mini rombangu jàka ndia kalandai ka na-kanabu daa la humuru,

³⁴nuna na mangu humurungu na-wuangu hilu runggina na mangu bandangu, na nyuna pekuna ba napiti-ya nuna na banda na mameti ndumana nyuna.

³⁵Na heu na mini romba hapi tau ka na-pameti-ya na mini romba hapi haàtu, màta nuda da mangu hapingu ka dadangga-nya na hapi na maluri, da wilina ka da-paberi-nya la dua wikida. Dàngumbu lupangu-ma da-paberi-nya la dua wikida na toluna na hapi na mameti.

³⁶Tàka jàka papingu-mayaka nuna na hapi mini rombangu ba nakàli ndamangu pa-pahiku, tàka na mamangu-nya ka nda na mangganya, nyuna na-wuangu bàdi hiluna maluri, tàka pekuna ka napiti-ya nuna na hapi na mameti nduma wikina,” wàna.