Read Kambera LUHU 24 Bible Online

LUHU 24 - Kambera bible

LUHU 24

¹Tunaka nu i MIRI napanii-nya i Muha, “Heiwa kau hurungu la hangganggu, nyumu angumi i Harungu, i Nandàpu dàngu i Ambihu, lupa da tau pihu kambulu da liku uru banjaru; dàngu kai patika bai marubuku-ngga welingu la mamarau.

²Mbulungu didi-akau nyumu mapeku palihi-ngga Nyungga. Hawiangu àmbu datika pa-mareni, dàngu àmbu jia kandekalu duna la palindi yiana na rayatu,” wànanya.

³Ka lua-nanyaka i Muha hi na-pakada-nya na banjaru mbuu ndàbana na lii pareta-na dàngu na kalaratu-na i MIRI. Mbuu ndàbada handàka tarànjaku-da ba dahema, “Nyuma ma-mbuhangu-ma duma pawànja mbuu ndàbada da lii pareta-na i MIRI,” wàda.

⁴Hàlaka nu i Muha hi na-tulihu hàlaha mbuu ndàbada da lii pareta-na i MIRI. Hadangu harii la mba - mbaru, pahada-nanyaka na hau na ngia pawotu maraku dàngu da hakambulu dua reti andungu la karaha palindi; nimbihu andungu tunggu hau kabihu Ihirailu-ya.

⁵Hàla i Muha hi na-paràha-nja ba mapira-ha da bidi mini, tàka nyuda hi dawotu kameti maraku patunu lai MIRI dàngu hi darupu-ha ba pira ngiuda da hapi nduma kameti maraku pa-papeku wàngu.

⁶I Muha napiti hawiangu riada nuda da hapi hi na-paihi-nja da tobungu. Tàka hawiangu hi naburi-ha la pinu ngia pawotu maraku.

⁷Tunaka nu piti-nanyaka na mbuku pa-ràndingu na ngia pa-tulihu-ha da lii pareta-na i MIRI, hi na-pakodungu ba nadiha-nya nuna na banjaru. Napaha nyuda, “Ma-mbuhangu-ma duma pa-karadaku lai MIRI dàngu la panunju-ha da lii pareta-na mbuu ndàbada,” wàda.

⁸Ka piti-nanjaka i Muha da wai ria da maninja daa la to - tobungu hi na-paiharu-nya na rayatu hi napanii, “Na ria yiana pamàndu-nanyaka na pa-ràndingu na pa-jorutu-na i MIRI lai nyimi palata-nja da lii pareta-na,” wànanja.

⁹Tunaka nu i Muha, i Harungu, i Nandàpu dàngu i Ambihu lupa da pihu kambulu liku uru kandekalu-danyaka la palindi,

¹⁰tàka nyuda hi daita-ya na Ala Ihirailu ba ndolaku-nanya la pinu lata watu nilamu, dàngu na-kawuru hama awangu ma-yarahu-ya.

¹¹Ba hapajia-ha da liku uru Ihirailu mbàda ita-danyaka i Ala; jiapa-kai ba tuna nda na-patàlaru-aha nyuda. Hàlaka nu ngangu ngunungu-danyaka.

¹²Tunaka nu i MIRI napanii-nya i Muha, “Hurungu-wa lai Nyungga la pinu palindi. Lai nu napa kuwua-nggaunja da dua mbàla watu na ngia pa-tulihu-nggunja da ukunggu. Mbuu ndàbada nuda da ukunggu da pawua-nggunggau jiaha da pa-papeka wànya na banjaru,” wànanya.

¹³Ka hawanjiru-danyaka i Muha dàngu i Yuhua na ma-karaha-ya tàka hi na-kandekalu[23] i Muha la palindi pangia-na i MIRI.

¹⁴I Muha na-bànjalu-manjaka panii ba hapajia-ha da liku uru Ihirailu, “Mi-patiangu-ka nyimi lai yiahu la maü ka lupa mabeli. I Harungu dàngu i Huru nimànja da ma-angunggai. Nggamu maningu ma-kalutu-nya, lua lai nyuda ka da-palànyapu-ya,” wàna.

¹⁵Ka kandekalu-nanyaka i Muha la Palindi Hinai, hi na panggàbalu-nya ha-kalibuku karumangu.

¹⁶Na handaraku ba ninya i MIRI napuru dita la pinu palindi, tàka da tau Ihirailu daita-maya ba hama tuna epi rokaya dita la pinu palindi. Nomu mbua loduna na karumangu ba na-pandàda-nya nuna na palindi, tàka la lodu papihu wàna i MIRI napaau-nya i Muha weli dalungu la karumangu.

¹⁸Ka kandekalu pangalangu-nanyaka i Muha hi lupa natama daa la karumangu. Patu kambulu lodu patu kambulu ruduna i Muha ba hanina lai nu.