Read Kambera LUHU 25 Bible Online

LUHU 25 - Kambera bible

LUHU 25

¹I MIRI napanii-nya i Muha,

²“Paràha-nya na tau Ihirailu ka nangàndi hunggu maraku lai Nyungga. Nggamuya na ma-miripu la etina, nangàndi bàdi hunggu maraku

³nu da: àmahu marara, mabara, dàngu wudu;

⁴tera linangu tamainangu, tera hawulu kawuru, mbaü atu, rara dàngu tera welingu la wulu ihi kamàmbi,

⁵manula mbimbi bumbu pandongu, manula malijangu, ai akahia,

⁶mina palita, rungu patuu mina palumu wàngu lii, dàngu patuu dupa mbii kati,

⁷màtu - màtu watu mata tawuru da pa-wandalu la eputu[24] dàngu la ndàbi kuruna na Ratu Bokulu.

⁸Paràha-nya na banjaru ka nawulu-ngga maünggu, ka peku engangu-nggu la hongada nyuda.

⁹Na maü dàngu da pawàngu lai nu màta ka da-pandoi-ha tundunya na pambàda kaka hahanggu na pa-paita-nggunggau napa,” wànanya.

¹⁰“Pandoi hau pàti welingu la ai akahia, na nunjuna 110 hiti-metiru, na ndàbaru dàngu na janggana 66 hiti-metiru.

¹¹Apihu-ya na kuruna dàngu liuna wànya àmahu rara ihi mbàngina dàngu tunya halaya-na àmahu rara.

¹²Nduma ai paduku wànya pandoi-nya patu kara àmahu rara dàngu pakàna-nja la wihina ba patu mbunguda, dàmbu kara hapapa - hapapa la karaha-na.

¹³Pandoi-manya paduku wànya welingu la ai akahia dàngu apihu wànya àmahu rara,

¹⁴hàla puhiha nuda da ai paduku wànya la karaha-na hapapa - hapapa.

¹⁵Nuda da ai paduku wànya màta-manja ka da-padaingu lai nu la karana, dàngu àmbu butuhu-duha.

¹⁶Hàla daa la pàti lupangu-ma kau bànjalu-ha da dua mbàla watu pangia-da da lii pareta da pawua-nggunggau napa.

¹⁷Pandoi-nya ndàbina nuna na pàti welingu la àmahu rara ihi mbangi-na, na nunjuna 110 hiti-metiru-na dàngu na ndàbaru-na 66 hiti-metiru-na.

¹⁸Pandoi dàmbu patau awangu[25] welingu la àmahu rara patuku,

¹⁹hau la hupu pàti hapapa - hapapa. Nuda da kahala hada patau awangu lupangu-ma ka mbulungu-maada dàngu na ndàbi pàti,

²⁰dàngu ba pandoi-ha ka da-pahanggangu ba dàngu tawàlahu-da da ruu kàpada la pinu pàti.

²¹Bànjalu-ha nuda da watu ba dàmbuda daa la pati dàngu ka patanga-nya na ndàbina.

²²La pangia lai nu duka napa ba ku-pahàmburu dànggau nyumu, dàngu welingu la pinu ndàbina, la manggawa-da da dàmbu patau awangu, napa nyumu kuwua-nggaunja da ukunggu ndumana na banjaru Ihirailu,” wàna.

²³“Pandoi hau menja ai akahia na nunjuna 88 hiti-metiru, na ndàbaru-na 44 hiti-metiru, dàngu na janggana 66 hiti-metiru.

²⁴Apihu wànya àmahu rara ihi mbangi-na dàngu tumanya halaya àmahu rara weli winggiru-na.

²⁵Pandoi-nya halinggi-na na menja, na ma 7,5 hiti-metiru mbàlaru-na, dàngu tunya padira àmahu rara la weli winggiru-na na halinggi-na.

²⁶Pandoi-nya patu mbua kara àmahu rara, tuha la patu mbua kabihu la wihina, la lihi hingina.

²⁷Nuda da karana jia-haka da mapàtu-ha da ai paduku wànya ka peku dukuya na menja.

²⁸Da ai paduku wànya lupangu-ma ka pandoi-ha welingu la ai akahia dàngu ka kamburu wànja àmahu rara.

²⁹Pandoi-ha da kawinga, da kaba wai, da kadihi dàngu da moku nduma hunggu maraku wai angguru. Mbuu ndàbada da pawàngu la menja pa-pandoi welingu la àmahu rara ihi mbàngi-manaha bàdi.

³⁰Na menja nuna tuya la hangga Pàti Pa-ràndingu, dàngu la pinuna nuna na menja ningu padua bàdi roti pa-payemangu,” wàna.

³¹“Pandoi tandai palita welingu la àmahu rara ihi mbàngi-na. Na latana dàngu na kaleki-na àmahu rara patuku-maha bàdi; da wàla ai pa-manandangu wàna, jia ndàbaha da kapunju dàngu da tanga wàlada lupangu-ma ka da-mbulungu ndàba dàngu na latana dàngu lupa na payàpa wànguya.

³²La ngia payàpa wànya tunya bàdi nomu mbua kahanga, tailu mbua kahanga hapapa - hapapa.

³³La nimbihu kahanga-na lupangu-ma pandoi-nja pa-manandangu wàda tailu wàla mbandàmu mangu kapunju dàngu da tanga wàlada.

³⁴La ngia payàpa wànya lupangu pandoi-nya tunya pa-manandangu wàna patu wàla mbandàmu mangu kapunju dàngu tanga wàlada.

³⁵La lumbu hamawa kahanga-na lupangu-ma pandoi-nya hau kapunju.

³⁶Nggubulu ndàbana na tandai palita mangu kapunjuna dàngu da kahanga-na lupangu-ma pa-pandoi-ha welingu la hakadipu àmahu rara ihi mbàngi patuku.

³⁷Pandoi pihu mbua palita la hau tandai palita, paketi pa-jàngapu-nya hi lupa na handaraku-na natuba-nya la hangga.

³⁸Pandoi ngepi pa-payarahu wàngu humbu dàngu na pa-pandemangu wàngu welingu la àmahu rara ihi mbàngi-na.

³⁹Wàngu tailu kambulu lima kilu àmahu rara ihi mbàngina pa-pandoi wànya na tandai palita dàngu mbuu ndàbada da pamàtu wàna.

⁴⁰Manggangu ka pekuna ba pandoi-ya nuna na tandai palita ka nunju-maya na ngerangu na pa-paita-nggunggau la pinu palindi yiana,” wànanya.