Read Kambera LUHU 26 Bible Online

LUHU 26 - Kambera bible

LUHU 26

¹“Wulungga Maü[26] ndumanggu, wulu wànya hakambulu mbàla tera linangu tamainangu, patinu wàngu wulu ihi mbimbi kawuru, mbaü atu dàngu rara. Pahiku-nya nggàmbaru patau awangu[27] nuna na tera.

²Nimbihu-da lupangu da-pahama bàdi da hukutu-da, da malaida hakambulu dàmbu metiru dàngu da mbàlaru-da dàmbu metiru-da.

³Lima mbàla tera utu panua-nja hi hawàla liruna, da lima mbàla hama-manai ba tuna nu.

⁴Pandoi-nya pa-pakàna wànya welingu la tera kawuru la hingida nuda da liru ba dua mbàlada,

⁵lima kambulu pa-pakànangu wàngu la nimbihu-da nuda da liru.

⁶Pandoi lima kambulu ketu àmahu rara pa-pahàmburu wàda nuda da liru ba dua mbàlada hi da-pambulungu.

⁷Na patuu toku ndiduna na Maü pandoi hakambulu hawàla tera wulu ihi kamàmbi.

⁸Nimbihu-da pahama-manja hukutu-da, na malaida hakambulu tailu metiru dàngu da mbàlaru-da dàmbu metiru.

⁹Da lima mbàla utu pa-jàmburu-nja ka hawàla liruda, tàka hawiangu da nomu mbàla jia-mayai ba tuna nu. Na pa-jàmburungu na panomu wàna màta kalàpitu padua-ya jia-yaka na pa-pandàbi wànya la hanamba Maü.

¹⁰Tunya lima kambulu pa-pakànangu wàngu la hingi liru kawunga, hi lima kambulu pa-pakànangu wàngu la liru padua wàna.

¹¹Pandoi lima kambulu ketu wudu ka pakàna-nya la ngia pa-pakànangu ka peku pa-nuangu-da nuda da liru ba dua mbàlada na patuu tuku ndiduna na Maü.

¹²Na hakadipu na tera na marihi jia-yaka na pa-pandàbi wànya la kajia Maü.

¹³Na rihi tera ba lima kambulu hiti-metiru-na na mbàlaru-na lupangu-ma biliya ka pandàda wànya na hingina na Maü.

¹⁴Pandoi-nya ndàbina dua mbàla la liuna na Maü, na hawàla manula mbimbi bumbu pandongu-ya, tàka na hawàlai manula malijangu-ya.

¹⁵Pandoi-nya kapambalu-na na Maü ma-ndolaku tinjangu ai akahia.

¹⁶Nimbihu-da da kapambalu na janggada patu metiru-da, tàka na mbàlaru-na 66 hiti-metiru-da.

¹⁷La nimbihu kapambalu tunya dàmbu kandutuku da ma-hamawa-da, hi peku pekeingu-da da kapambalu nimbihu-da.

¹⁸Nduma karaha mbara luruna na Maü, pandoi-nya dua kambulu kapambalu

¹⁹dàngu patu kambulu latana àmahu bara, dàmbu la pingi hapungu kapambalu ndumada da dàmbu kandutuku-na.

²⁰Nduma karaha mbara diana na Maü pandoi-nya dua kambulu kapambalu

²¹dàngu patu kambulu latana àmahu bara, dàmbu la pingi hapungu kapambalu.

²²Ndumana la kajia Maü la patama lodu, pandoi-nya nomu kapambalu,

²³dàngu dua mbungu kapambalu la kabihu - kabihu-na.

²⁴Da kapambalu la kabihu màta ka panua-nja la wihina, pangala-manja lundu hu dita. Da kapambalu ba dua mbunguda da matunya kabihu-na tuda numai.

²⁵Nu ba tuna, walu mbunguda mbuu ndàbada da kapambalu, dàngu hakambulu nomuda da lata àmahu bara, dàmbu la pingi hapungu kapambalu.

²⁶Pandoi hakambulu lima mbungu talaru ai akahia, lima ndumada da kapambalu la hau karaha Maü,

²⁷lima la hapapa hau, tàka limamai ndumana na karaha la kajia la patama lodu.

²⁸Na ai talaru la padua lupangu-ma la padeni paduangu kapambalu-ya welingu la hau hupu lupa la hupu hauna na Maü.

²⁹Da kapambalu-na na Maü dàngu da ai talaru-na lupangu-ma ka apihu wànja àmahu rara. Da karada da papàtu wànja nuda da ai lupangu-ma pandoi-ha welingu la àmahu rara.

³⁰Pahada-nya na Maü tundunya na pa-pakaka hahangu na pa-paita-nggunggau la pinu palindi yiana.

³¹Pandoi hawàla tera pindu, tera linangu tamainangu na patinu wàngu lulu kamba hawulu kawuru, mbaü atu dàngu na marara. Pahiku-nya nuna na tera tunya nggàmbaru patau awangu.[28]

³²Tiwalu-nya nuna na tera pindu la patu punduku ai akahia na pa-kamburungu àmahu rara maningu ketu àmahu rarangu dàngu da patuu la patu lata àmahu bara.

³³Tuya nu na tera la lumbuda da ketu da ma-pandalurungu la tuku ndidu Maü. La hambeli-na nuna na tera lupangu-ma ka bànjalu-ya na Pàti Pa-ràndingu na ngia pa-paihi-nja da watu. Nuna na tera na-padira-nya na Rowa Matua dàngu na Rowa Mahupu Matua.

³⁴Bànjalu-ya na ndàbina na Pàti Pa-ràndingu la pinuna na pàti.

³⁵Na menja ngia pawotu maraku lupangu-ma patuya la hambeli Rowa Mahupu Matua mbara dia, tàka na tandai palita la mbara luruya daa la Maü.

³⁶Pandoi-nya tera dimbaku-na na pindu Maü wàngu tera linangu tamainangu, na patinu wàngu lulu kamba hawulu kawuru, mbaü atu dàngu na marara, pa-pamananda wànya pa-hikungu.

³⁷Ndumana na tera dimbaku lupangu-ma ka tunya lima punduku ai akahia na pa-kamburungu àmahu rara dàngu na pa-pandetungu wàngu lima ketu àmahu rara. Tunja lima mbua lata wudu ndumada da punduku nimbihu-da,” wàna.