Read Kambera LUHU 27 Bible Online

LUHU 27 - Kambera bible

LUHU 27

¹“Pandoi hau ngia pawotu maraku wàngu ai akahia. Na hadana na-palara ka-patungu, na nunjuna dàngu na ndàbaru-na hama-mada nimbihu-da 2,2 metiru, tàka na janggana 1,3 metiru.

²La nimbihu pinu tundu kabihu-na lupangu-ma ka pandoi-ha da kadu da ma-panuangu la ngia pawotu maraku. Nggubulu-na tapunya wudu.

³Pandoi-ha da kawalu, da huru, da moku, da njàkapu dàngu pangia epi. Mbuu ndàbada nuda da pawàngu pa-pandoi welingu la wuduha.

⁴Pandoi lulu wudu pa-jilungu dàngu tuha da kara ba patuda ndumada da ai duku la mbara wawada da patu tundu kabihu-na.

⁵Na janggana na lulu wudu pa-jilungu na-paradua-ya na janggana na ngia pawotu maraku. Nuna na lulu wudu pa-jilungu lupangu-ma ka remba wànya na ngia pawotu maraku mbara wawa.

⁶Pandoi dua mbungu ai duku welingu la ai akahia na pa-kamburungu wudu,

⁷dàngu ka pahaunja daa la kara da maninja la karaha ngia pawotu maraku jàka dukuya nuna na ngia pawotu maraku.

⁸Na ngia pawotu maraku pa-pandoi wàngu kapambalu-ya dàngu tunya rowana daa, tundunya na pakaka hahangu na pa-paita-nggunggau la pinu palindi yiana,” wànanya.

⁹“Pandoi-nya talora weli winggiru-na na Maünggu, na paoka wàngu liru tera linangu tamainangu. La mbara luru na malaina na liru 44 metiru-na,

¹⁰pàtu wànya dua kambulu kandutuku wudu, nimbihu-da la lata wuduha, da ketu dàngu da pa-kànangu-da àmahu baraha.

¹¹Pandoi tuna numai la mbara diana.

¹²La patama lodu, na malaina na liru 22 metiru-na, hakambulu punduku dàngu hakambulu latana.

¹³La pahunga lodu, na maningu pindungu, na malaina na liru 22 metiru-mbuna.

¹⁴La kalai la kawana na pindu tumanyai bàdi liru, nimbihu-da 6,6 metiru malaina dàngu punduku tailu mbungu la pinu tailu latana.

¹⁶La pinduna lupangu-ma tunya tera dimbaku 9 metiru, tera linangu tamainangu na patinu wàngu lulu kamba hawulu kawuru, mbaü atu dàngu lulu kamba rara, dàngu ka pa-mananda wànya pa-hikungu. Ka pàtu wànya na tera pindu lupangu-ma pandoi patu mbungu punduku dàngu patu latana.

¹⁷Mbuu ndàbada da kandutuku da maweli winggiru-nya na talora màta ka da-pandetungu dua wikida wàngu pakànangu àmahu bara; da ketuda lupangu-ma àmahu baraha tàka da latada wuduha.

¹⁸Na liru la winggiru-na na talora 44 metiru malaina, na mbàlaru-na 22 metiru-na tàka na janggana 2,2 metiru-na. Na liruna pa-pandoi welingu la tera linangu tamainangu-ya tàka da latana wuduha.

¹⁹Mbuu ndàbada da pawàngu ba paloku daa la Maü, mbuu ndàbada da kandutuku-na na Maü dàngu ndumana na liruna lupangu-ma pa-pandoi welingu la wuduha,” wàna.

²⁰“Paràha-nya na tau Ihirailu ka nangàndi mina haitungu manda ningu koruna dàngu mahàmu halawàla ndumana na palita la Maünggu, ka peku pakehi-nya dàngu ka naroka pangalangu.

²¹I Harungu dàngu da anana màta ka da-paloku-ya na palita piti weli malingu lundu la mbaru la pangia ngia paningga Nyungga, la hambeli tera papahàngalungu la hangga Pàti Pa-ràndingu. Na pareta nuna nawà-manya bàdi lundu nu - nu paraï tau Ihirailu dàngu wàla wuana,” wàna.