Read Kambera LUHU 28 Bible Online

LUHU 28 - Kambera bible

LUHU 28

¹“Paaunya i Harungu, ayamu, dàngu da anana i Nandàpu, i Ambihu, i Eliahàru, dàngu i Itamàru, leha-maha nyuda ka daratu, matanggu lumungga Nyungga.

²Pandoi-nya paki ratu i Harungu, ka pekuna ba ràka patembi-ya ba itaya.

³Paau ndàbanja da mapingu pautu da pambàda wuanggu pamàhi wàngu. Paràha-nja ka dautu-nya pakina i Harungu, ka lehaya la palumu-ngga Nyungga ba ratuya.

⁴Paràha-nja ka da-pandoi nggàbi kuru, eputu, kalembi pahàlangu, kamenja pa-pahikungu, tera lenju dàngu boru bànggi. Nuda da paki ratu lupangu-ma da-pandoi-ha ndumana i Harungu ayamu dàngu da anana, ka peku lumu-dangga ba ratuha.

⁵Nuda da paki lupangu-ma ka da-pandoi-ha welingu la tera hawulu kawuru, mbaü atu dàngu rara, lulu àmahu rara dàngu linangu tamainangu. Hinggilu-na nu lupangu-ma na eputu ka pa-mananda wànya pa-hikungu.

⁷Dua walangu liku kundu pa-hawaritu wànya na eputu utu-maya la hingina.

⁸Hawalangu boru bànggi patinu ma-tànahu, na hamana na tera nuna ka utunya la eputu ka da-pambulungu.

⁹Piti dàmbu watu tawuru ndalima. Himbu matuku àmahu, na mamàhi la pa-huratu la watu nuda da tamuda da tau hakambulu madua da anana i Yakupu tundunya na pa-ndàkingu dedida, nomu tamu la nimbihu watu. Hàla da watu tawuru nuda ba dàmbuda tunya nggàpi àmahu rara ka tuha la liku kunduna na eputu ka jiaha da tanda panamu wànja da hakambulu dàmbu kabihu Ihirailu. Ba tuna nu nyuna i Harungu ngàndi-nanjaka da tamuda la kunduna, hi lupa Nyungga, MIRI, naingu-na padua nanamu-nggunja nyuda.

¹³Hinggilu-da nuda da nggàpi àmahu rara ba dàmbuda

¹⁴lupangu pandoi-mbu bàdi dua walangu halaku lulungu àmahu rara ihi mbàngina paputi likungu, ka tuha nuda la nggàpi àmahu rara,” wàna.

¹⁵“Pandoi-nya na Ratu Bokulu hau nggàbi kuru na papaki-na la rehi ka kupi wànya na pawuku-na i Ala jàka wàna. Na pawàngu ba utuya dàngu na pahikungu-na na nggàbi kuru màta ka hamada da pawàngu ba utunya dàngu na pahikungu-na na eputu.

¹⁶Na hadana na-palarangu dàngu pa-làpitu padua-ya, na nunjuna dàngu na ndàbaru-na 22 hiti-metiru-na.

¹⁷Tunya patu ndalaru watu mata tawuru na nggàbi kuru. La ndalaru kawunga watu ndalima, watu topahu dàngu watu bainduri ma-paninu.

¹⁸La ndalaru padua wàna watu njàmurutu, watu nilamu, dàngu watu itangu.

¹⁹La ndalaru patailu wàna watu lanjuandiru, watu akiku dàngu watu wàla mbunguru.

²⁰La ndalaru papatu wàna watu piruhu, watu yakutu dàngu watu ràtuna wingiru wàla. Nuda da watu da ma-hakambulu dàmbuda lupangu-ma ka hondu wànja àmahu rara.

²¹La nimbihu watu mata tawuru lupangu-ma huratu-nya tamuna na haàtu anana i Yakupu ka jiaha da tanda panamu wànja da kabihu - kabihu Ihirailu.

²²Pandoi-nya nuna na nggàbi kuru dua walangu halaku lulungu àmahu rara ihi mbàngina na-paputi likungu.

²³Pandoi-mbunya dàmbu kara àmahu rara ka tuha la hupu ditana hapapa - hapapa na nggàbi kuru

²⁴hàla patama-nja nuda da halaku lulungu àmahu rara la kara àmahu kawai.

²⁵Da hupu hapapa-da da halaku lulungu lupangu-ma pahondu-ha la nggàpi da madàmbu-da, ka peku panua-nya na nggàbi kuru la liku kundu eputu la hangga.

²⁶Hili pandoiki-nya dàmbu kara àmahu rara, hàla tuha la nggàbi kuru la hupu wawa mangia dalu manggàna-ya na eputu.

²⁷Hàlaka nu, pandoi-kinya dàmbu kara àmahu rara dàngu tuha la hangga dua walangu liku kunduna na eputu la ngia pa-pahàmburu-na na utuna, la dita boru bànggi tera tamainangu.

²⁸Da karana na nggàbi kuru lupangu-ma ka panua wànya liku kawuru la karana na eputu ka peku pa-daingu-na na nggàbi kuru la dita boru bànggi dàngu ka àmbu na-pahàlangu.

²⁹La rehi tamana i Harungu la pangia matua, lupangu-ma natama ngàndiha da tamuda da hakambulu dàmbu kabihu Ihirailu da pa-huratu la nggàbi kuruna, ka pekuna Nyungga, MIRI, ba kunamu mànuya na banjaru-nggu.

³⁰Tuha da Urimu dàngu Tumimu[29] daa la nggàbi kuru na papaki-na i Harungu jàka na-hurungu lai Nyungga. La re - rehi tungu nu lupangu-ma napàki mànu nggàbi kuru, ka peku pi wànanya na pawuku-nggu la banjaru Ihirailu,” wàna.

³¹“Na kalembi pahàlangu na papaki la pinu eputu lupangu-ma mbuu ndàbana ka pa-pandoi welingu la tera hawulu kawuru-ya.

³²Na mbowa nggoruna pautu patapu-nya tera pa-tinungu ka àmbu namuda pa-kahira.

³³La halinggi winggiru wawana tunya pa-manandangu wàna ba hama wua ndalima-ha welingu la tera hawulu kawuru, mbaü atu dàngu rara, pahena - pahenaku-nja ana katàngu àmahu rara.

³⁵Na kalembi pahàlangu nuna lupangu ka napaki-ya i Harungu jàka talànga paloku-nanya na paratu wàna. La rehi hurungu-na la hangganggu la Rowa Matua dàngu jàka jiaya na rapa luhuna welingu lai nu, napa parongu-mahaka duda da linguda da ana katàngu, ka àmbu nameti.

³⁶Pandoi hau tabilu àmahu rara ihi mbàngina dàngu lai nu ka huratu-nya, ‘Pa-panuda-nya ndumana i MIRI,’ ka wàna.

³⁷Hondu wànya liku kawuru nuna la tera lenju.

³⁸Na tabilu àmahu rara nuna màta ka natuya i Harungu la kaba matana, ka pekuna Nyungga, MIRI, la paorangu panggepi-ha da hunggu maraku mbuu hàlada da pangàndi-na na tau Ihirailu lai Nyungga, jiapakai ka mbàda wundada manjala nu ba dangàndi hunggu maraku.

³⁹Na kamenja-na i Harungu lupangu-ma ka tera patinu wàngu linangu tamainangu-ya. Pandoi-mbunya hawàla tera lenju welingu la linangu tamainangu dàngu boru bànggi pa-hikungu.

⁴⁰Pandoi-nja kamenja, boru bànggi dàngu tera lenju da anana i Harungu, màta ba itaha ka ràka patembi-ha.

⁴¹Panggàna-nja da paki nuda lai Harungu angumu paluhu dàngu da anana. Katua wànja mina haitungu; ba tumunja nu pa-katua-haka dàngu pa-pahinggilu-haka la palumu-ngga Nyungga ba ratuha.

⁴²Hàla utunja hakalaki kababa tera linangu, na malaina welingu la bànggi lundu la winju ka da-pandàbingu da ihida da ràka panda ita.

⁴³Da hakalaki nuda màta ka dapaki mànuha la rehi tamada la Maünggu jàka ndia ba dalihi-nya na ngia pawotu maraku ba da-paloku-ya na pa-lumungu na ngera ratuda la Rowa Matua, ka àmbu da meti wànya ba itaha da ihida da ràka panda ita. Na kalaratu yiana na-padaingu ba nawànya i Harungu lupa da wàla wuana,” wàna.