Read Kambera LUHU 29 Bible Online

LUHU 29 - Kambera bible

LUHU 29

¹“Tuna nu ba katua-ha i Harungu dàngu da anana ka peku lumu-dangga Nyungga ba ratuha. Piti heu hapi mini kamboka-na dàngu dua ngiu mbimbi bumbu na manda ningu nyurangu.

²Welingu la kanguta marihi hàmu, pandoi pa-haürungu panda tungu muru. Hawiangu na pa-haürungu lupangu-ma ka pandoi roti patungu mina haitungu, hawiangui panda tungu mina, dàngu na rihina pandoi-ya kanguta pado - dohangu mina.

³Tuha la mbola ka mangeji-ngganja dàngu nuda da kameti hapi mini lupa da mbimbi bumbu dua ngiu.

⁴Paràha-nja i Harungu dàngu da anana ka damai la pindu Maünggu dàngu ka dabaha wikida.

⁵Panggàna-nja da paki ratu lai Harungu: kamenja, eputu, kalembi pahàla-ngu ma-pandàbi-nya na eputu, na nggàbi kuru dàngu na boru bànggi.

⁶Wotunya na tera lenju la katiku-na dàngu ka hindiku-nya na tabilu àmahu rara la tera lenjuna, na maningu huratungu, ‘Pa-panuda-nya ndumana i MIRI,’ ba wàna.

⁷Pitiya na mina pa-katua wàngu, kau burinya la katiku-na, kau katua-ya.

⁸Hàlaka nu, paràha-nja da anana ka da-hurungu, ka pahaunja kamenja

⁹dàngu ka paboru-nja boru bànggi, hàla ka wotunja tera lenju la katiku-da. Tuna nu na huri ba katua-ha i Harungu dàngu da anana. Nyuda dàngu da wàla wuana lupangu-ma dalumu-ngga Nyungga ba ratuha lundu nu - nu.

¹⁰Tunaka nu lupangu-ma kau ngàndiya na hapi mini la hangga Maünggu. Lupangu-ma i Harungu dàngu da anana da-padàmbaku-nja da limada la katiku-na nuna na banda.

¹¹Rupuya nuna na hapi la hangganggu, la pindu Maü.

¹²Piti hawiangu riana na hapi kau doha wànja limamu da kaduna na ngia pawotu maraku. Na rihina na ria lupangu-ma kau buriya la lumbu ngia pawotu maraku.

¹³Hàlaka nu piti ndàbaya na aparu-na na ma-palàmbaru-nya na ihi kambuna, hawiangu na marihi hàmu la etina dàngu da wua kadalu-na pa-kariangu mbokana, tu hàlaha nuda la pinu ngia pawotu maraku ka tunuha ka hunggu maraku-ha lai Nyungga.

¹⁴Na toluna, na manula-na dàngu na tanai-na nuna na hapi mini lupangu-ma ka tunuha hu lua la hambeli ngia pa-pamaüngu. Nuda jia-haka da hunggu maraku pa-jàmangu wàda da njalada da ratu.

¹⁵Tunaka nu pitiya na heu welingu la mbimbi bumbu da madua ngiuda. I Harungu dàngu da anana lupangu-ma da-padambaku-nja da limada la pinu katiku-na nuna na banda.

¹⁶Hàla rupuya nuna na mbimbi, pitiya na riana ka buriya la patu karaha-na na ngia pawotu maraku.

¹⁷Nuna na mbimbi bumbu lupangu-ma ka da - datuya. Na ihi kambuna dàngu na winjuna lupangu-ma ka bahaha dàngu ka tuha la pinu katiku-na dàngu la pinuda hawiangu da pambàda datu.

¹⁸Wotu hàlaya nuna na mbimbi bumbu la pinu ngia pawotu maraku ka tuya kameti maraku patunu. Na hiritu-na na hunggu maraku na hàmu wànya na etinggu.

¹⁹Hili pitiyai na heu na mbimbi bumbu, nu na mbimbi bumbu ndumana na lii katua. Paràha-nya i Harungu dàngu da anana ka da-padambaku-nja da limada la katiku-na na banda.

²⁰Rupuya nuna na mbimbi bumbu, piti hawutu riana na mbimbi ka perinya la ruu kahilu kawana-na i Harungu dàngu da anana, la wua lima bai kawana-da dàngu la wua wihi bai kawana-da. Na rihina na naria lupangu-ma kau buriya la patu karaha-na na ngia pawotu maraku.

²¹Piti hawutu ria na maninya la pinu ngia pawotu maraku dàngu hawutu mina pa-katua wàngu, hàla paiharu-nya i Harungu dàngu da anana, hamanai da pakida. Ba tuna nu na huri nuna i Harungu dàngu da anana hamanai da pakida ba pa-pahinggilu-haka ndumanggu Nyungga.

²²Pitiya na mbokana nuna na mbimbi bumbu, na kikuna na maningu mbokana, na aparu-na la pinu ihi kambuna, hawiangu na mahàmu halawàla welingu la etina, da wua kadalu-na pa-kariangu mbokana, dàngu na winju kawana-na.

²³Welingu la mbola roti na pambàda marakuda-ngga, piti hau roti welingu la hamata - hamatangu: hau na pa-pandoi wàngu mina haitungu, hau panda tungu mina dàngu hau kanguta.

²⁴Bànjalu-ha nuda mbuu ndàbada da pangangu la limana i Harungu dàngu da anana dàngu paràha-nja ka datema pahangga-nja nuda lai Nyungga ka tuha hunggu maraku patema.

²⁵Hàla pitiha nuda da roti welingu lai nyuda ka tunuha la pinu ngia pawotu maraku, la pinuda da kameti maraku patunu. Na hiritu-da nuda da hunggu maraku nahàmu wànya na etinggu.

²⁶Pitiya na kakauna na mbimbi bumbu dàngu ka maraku-ngganya tuya hunggu maraku patema lai Nyungga. Nuna jia-yaka na ndumamu.

²⁷Nu la lii katua ratu, na kakauna dàngu na winjuna na mbimbi bumbu na pawàngu la lii nuna lupangu-ma ka maraku wànja ka maraku patema-ha lai Nyungga dàngu ka kahika-ha ndumada da ratu.

²⁸Yiana-ya na botangu-nggu na panda peku pa-panjilu-nya: Ba jiaya na hurungu-na na banjaru-nggu pangàndi kameti maraku papeku, na kakauna dàngu winjuna na banda jia-haka da ndumada da ratu. Nuna-duyaka na hunggu maraku-na na banjaru-nggu lai Nyungga.

²⁹Da paki ratuna i Harungu lupangu-ma ka pamangu-nja da anana, ka peku paki-danya la rehi katua-ha.

³⁰Na anana i Harungu na maratu hiluya na amana dàngu na matama la Maünggu la pa-paloku-ya na pa-lumungu la Rowa Matua lupangu napaki-maha bàdi da paki nuda la dalu pihu mbua lodu.

³¹Pitiya na toluna na mbimbi bumbu na pawàngu la lii katua-ha i Harungu dàngu da anana, manahu-ya nuna na tolungu la hau pangia matua.

³²Na tolungu nuna lupangu dangaa-manya bàdi la ngaru pindu Maünggu, ka dangaa wànja da roti da marihi la mbola.

³³Lupangu dangaa-manja bàdi da pangangu da pa-maraku wàngu la lii jàmangu njala nu la rehi katua. Mbulungu da ratua da mapeku pangaa-nja da pangangu da pambàda panuda-ngga Nyungga.

³⁴Jàka ningupa marihi nuda da tolungu dàngu da roti hadangu harii, nuda da marihi lupangu tunu pambuta-maha bàdi dàngu nda ukua pangaa-nja ba mbàda pa-pahinggilu-haka.

³⁵Na lii katua-ha i Harungu dàngu da anana lupangu la dalu pihu mbua loduma bàdi ba paloku-ya, hama tuna na pareta pambàda wua-nggunggau.

³⁶Nimbihu lodu lupangu-ma bàdi ka hunggu maraku wàngu heu hapi mini nduma pa-jàmangu wàngu njala. Wànya na kameti maraku nuna ba pa-matua-ya na ngia pawotu maraku. Hàla na ngia pawotu maraku kau pamina wànya mina haitungu ka panuda-ngganya ndumanggu Nyungga.

³⁷Paloku tuna nu nimbihu lodu la dalu pihu mbua lodu. Jia-duyaka hi na-matua nggubulu-na na ngia pawotu maraku, nggàra biaya na ma-hanggàna-ya nuna na ngia pawotu maraku lupangu puli-manya bàdi lai MIRI, tàka jàka nggamu biaya na ma-jonggaru-ya, napa na-hanggàmaru wànya ruku mbangatu-na na matua-na,”[30] wàna.

³⁸“Nimbihu lodu lundu nu - nu la pinu ngia pawotu maraku lupangu-ma ka wotu hunggu maraku dua ngiu mbimbi mahau ndauda.

³⁹Na heu ndumana na hunggu maraku mbaru, tàka na heui ndumana na hunggu maraku malingu.

⁴⁰Karia-na na ana mbimbi na hunggu maraku mbaru, lupangu-ma wotu hunggu maraku hau kilu taringgu mahàmu halawàla pa-pakorungu hau litaru mina haitungu manda ningu koruna. Hinggilu-nai nuna hau litaru angguru-mbu.

⁴¹Na ana mbimbi nduma hunggu maraku malingu, lupangu-ma na huri maraku-nya ka hama-manai, ba pa-karia-nya taringgu, mina haitungu dàngu angguru. Na hiritu-na na hunggu maraku patunu na hàmu wànya na etinggu.

⁴²Na pangalangu-na lundu nu - nu, nuna na hunggu maraku patunu lupangu-ma pawotu-ya la hangganggu la pindu Maünggu. Lai nu Nyungga ba ku-pahàmburu dànya na banjaru-nggu dàngu ba ku-pabanjaru dànggamu nyumu.

⁴³Lai nu Nyungga ku-pahàmburu dànya na banjaru Ihirailu, na handaraku-nggu ba ningga lai nu, jiaya na ma-pamatua-ya na pangia nuna.

⁴⁴Napa Nyungga ku-pamatua-ya na Maünggu dàngu na ngia pawotu maraku. I Harungu dàngu da anana napa ku-pahinggilu-ha welingu la tau hawiangu, ka dalumu-ngga Nyungga ba ratuha.

⁴⁵Napa Nyungga nimangga la honga banjaru Ihirailu, tàka hi da Alangga Nyungga.

⁴⁶Napa nyuda dapinya ba Nyungga na MIRI Alada nyuda na ma-karia-nja paluhu welingu la Mehiru, ka peku ngiangu-nggu la padua-da nyuda, Nyungga-maka MIRI Alada nyuda,” wàna.