Read Kambera LUHU 3 Bible Online

LUHU 3 - Kambera bible

LUHU 3

¹La rehina nuna nyuna i Muha pawa-nanja da mbimbina dàngu da kamàmbi-na i Yituru, ama yerana, na ratu la tana Mindiangu. Nu ba talànga weli-nanjaka da banda la hapapa maràda telangu, tàka-nanyaka la Palindi Hinai, na palindi matua.

²Lai nu na papalewa-na i MIRI na-pajilikungu wikina lai nyuna weli dalungu la padua wuku rii paketu. I Muha naita-ya na rii paketu ba naduru, tàka nda na-mutungu.

³“Nda ningu hamana,” wàna la kanandingu-na. “Na rii paketu nda na-mutungu-a! Hàmu ka kulua pa-tàngaru lihinya,” wànaka.

⁴I MIRI naita-ya i Muha ba na-mareni-nya nuna na pa-ngiangu, ka wara-nanyaka welingu la wuku rii paketu, “Muha! Muha!” wànanya. “Yiangga MIRI,” hi wàna ba nahema.

⁵Ka panii-nanyaka i Ala, “Àmbu tika pa-mareni. Bunggahu-ha da halapa-mu, nadu na tana na padili-mu ba tana matua-ya.

⁶Nyungga Alada da boku la mangilu-mu, Alada i Ambarahàmu, i Ihàku dàngu i Yakupu,” wànanya. I Muha na-palumburu-nya na matana, ba nda natara pa-tàngaru-ya i Ala.

⁷Ka panii-nanyaka i MIRI, “Nyungga kuita-yaka na mayila-na na banjaru-nggu la Mehiru, dàngu kurongu-mayaka na kaladaku-da, ba dakarai ka pahàla-ha welingu la tau ma-kapidihu-ha nyunda. Langatàka kupi hàla-manya duku na mayila-da.

⁸Jia-duyaka nu hi kupuru la pa-pahàla-ha welingu la lima tau Mehiru dàngu ka karia-nja paluhu welingu la tana lai nu hanggangu la hau tana ma-nggailaru. Na tanana na-mbokaru na kamboka, nàhu na pangia-da da banjaru Kanaàngu, Heti, Amori, Perihu, Hewi dàngu Yembuhu.

⁹Na kaladaku-na na banjaru Ihirailu kurongu-mayaka, dàngu kuita-mbuyaka jàka nggikina ba na-kapidihu-ya paraï banjaru Mehiru.

¹⁰Nàhu palewa-nggunggauka pa-hurungu la hanganji Mehiru, ka pekuna nyumu la pairu ngàndiya na banjaru-nggu palaku welingu la tana nuna,” wànanya.

¹¹Tàka nanapa-ya i Muha lai Ala, “Nggamu-akaka duku nyungga yia, hi jia màka bia-ngguka pa-hurungu la hanganji dàngu hi karia-nya na tau Ihirailu paluhu welingu la Mehiru?” wàna.

¹²Nahema i Ala, “Nyungga duku napa mandula-kau. Dàngu jàka mu-karia-nyaka paluhu na banjaru welingu la Mehiru, napa nyimi kai lumungga la palindi yiana. Nuna-duya na mbutina na papalewa wànggunggau,” wànanya.

¹³Nanapa-ya i Muha, “Tàka jàka kulua tomaha da tau Ihirailu dàngu jàka kupanii-nja, ‘Na Alada da boku la mangilu-mi na ma-palewa-ka lai nyimi,’ jàka wànggunja, tàka napa da-paàrangu-maka duda, ‘Nggaya na tamuna?’ jàka wàdangga. Ka nggiki wànggu-aka ba kuhema-ha?” wàna.

¹⁴Tàka i Ala, “Nyungga jiaka, I NYUNGGA NINGGA.[5] Yiana-ya kau pekanya na banjaru Ihirailu, Nyuna I NINGGA NYUNGGA ba wàdanya, Nyunaka na ma-palewa-ka lai nyimi.

¹⁵Bobaru-mbunja Nyungga ba MIRI-ka, Alada da boku la mangilu-da, Alada i Ambarahàmu, i Ihàku dàngu i Yakupu, ma-palewa-kau nyumu lai nyuda. Nyungga MIRI-ka, nunaya na tamunggu lundu nu - nu. Nunaya na patiki wàdangga mbuu ndàbana na banjaru lundu ana umbuku-da.

¹⁶Luawa dàngu pauhi-njawa mbuu ndàbada da ma-pairungu la Ihirailu. Pakada-nja lai nyuda Nyungga, ba jiaka i MIRI, Alada da boku la mangilu-da, Alada i Ambarahàmu, i Ihàku dàngu i Yakupu, mambàda pa-itangu wikina lai nyumu. Pekanja ba mbàda maingguka Nyungga lai nyuda, dàngu mbàda ita manggu-nyaka ba na-pajàra-ha nyuda paraï tau Mehiru.

¹⁷Dàngu ba mbàda bota-nggunyaka la pa-karia-nja paluhu welingu la Mehiru, ngia pa-kapidihu-ha, dàngu hi ku-karia-nja la hau tana na ma-mbokaru dàngu na ma-kamboka, na tana banjaru Kanaàngu, Heti, Amori, Perihu, Hewi dàngu Yembuhu.

¹⁸Napa na banjaru-nggu da-patingi-manya duna da papanii-muka. Tunaka nu nyumu angumi da ngara ma-pairungu la Ihirailu kai lua pa-hurungu la hanganji Mehiru dàngu kai patàka-nya, ‘I MIRI, Ala tau Imbarani mbàda mai-naka pa-pajilikungu wikina lai nyuma. Nàhu puli-nggama ka malaku, ràkangu tailu mbua lodu-aya na pa-lakungu la maràda telangu, la pangàndi-nya kameti maraku i MIRI, Alama, ka wàmi,’ ” wànanja.

¹⁹Hili panii-nanya i Ala, “Kupi-manya napa na hanganji Mehiru ba nda napuli-nggai palaku, hinggilu-na jàka hàniya.

²⁰Na nyuna Nyungga duku napa kuwànya na mbihanggu dàngu kuhuku-nya na Mehiru wàngu pàda hidu ma-mbàringu lai nu. Hàlaka nu napa puli-nanggaika palaku.

²¹Nyungga napa ku-pamàja etiya na tau Mehiru hanggangu lai nyimi, hi lupa la rehi hadangu-na na banjaru-nggu, nyimi ndai laku lima jua-ami.

²²Nimbihu-na na kawini Ihirailu napa nakarai la kawini Mehiru lihi umana dàngu welingu la kawini Mehiru angu umana, paki dàngu ngaü àmahu mabara marara. Nyimi napa mi-panggàna-nja nuda da ana - anami. Ba timi nu ramba wadimi-nyaka na tau Mehiru,” wànanja.