Read Kambera LUHU 30 Bible Online

LUHU 30 - Kambera bible

LUHU 30

¹Nahili panii i MIRI lai Muha, “Pandoi hau ngia pawotu maraku ngia patunu dupa welingu la ai akahia.

²Na hadana lupangu-ma ka na-palarangu; na nunjuna dàngu na ndàbaru-na nimbihu-da 45 hiti-metiru-da, tàka na janggana 90 hiti-metiru-na. La patu mbua kabihu-na kau pandoi-nya kaduna na ma-panuangu dàngu na ngia pawotu maraku.

³La mangia dita, jia ndàbaha da patu mbua karaha-na dàngu da kaduna lupangu-ma kamburu wànja àmahu rara ihi mbangina dàngu ka tunya nggàpi àmahu rara winggiru-na.

⁴Pandoi-nya dàmbu kara la wawa nggàpina hapapa - hapapa ngia pa-pahau-nja da ai dukuna na ngia pawotu maraku.

⁵Da ai duku lupangu-ma ka pandoi-ha welingu la ai akahia dàngu kamburu-nja àmahu rara.

⁶Bànjalu-ya nuna na ngia pawotu maraku la hambeli tera pa-tiwalungu la hangga Pàti Pa-ràndingu, na ngia pa-pahàmburu dànggunggau nyumu napa.

⁷Nimbihu mbaru i Harungu ba namai pa-paloku-ha da palita, lupangu-ma ka natunu dupa hiritu la pinu ngia pawotu maraku nuna.

⁸Na matuna nu lupangu-ma ka nawà-manyai ba namai pa-paroka-ha da palita la malingu. Na hunggu maraku wàngu dupa tungu nu màta ka nawa mànunya lundu ngeru - ngeru.

⁹Àmbu maraku wàngudu la pinu ngia pawotu maraku nuna dupa pa-hiringu, kameti banda jàka ndia pa-mangejingu; màtangu-mbu paburi-nya wai angguru la pinuna.

¹⁰Handàkangu hau ndaungu lupangu-ma i Harungu na-paloku-ya na lii hawari ngia pawotu maraku, ba nawàngu pa-paiharu-nja wai ria banda kameti maraku jàmangu njala nu da patu mbungu kaduna na ngia pawotu maraku. Na matuna nu lupangu-ma na-pangala tilangu ba wànya nimbihu ndaungu lundu pirangu bia. Nuna na ngia pawotu maraku lupangu-ma na matua nggubulu-na dàngu ka panuda-ngganya ndumanggu Nyungga,” wàna.

¹¹I MIRI napanii-nya i Muha,

¹²“La rehi paloku-ya na diha nggubulu nimbihu-na na mini lupangu nawotu-ma bàdi lai Nyungga àmahu palohu pa-pahàla wàna wikina, ka àmbu nanggàna-ya ura pàda nu ba talànga paloku-ya na diha nggubulu.

¹³Nimbihu-na na tau na matama la diha nggubulu, lupangu na-wuangu-ma bàdi àmahu tundunya na pabota hama bilana na pakàli wàngu la Maünggu, nuda nu jia-haka da hunggu pa-panuda-ngga Nyungga.

¹⁴Nimbihu-na na tau na padiha nu la diha nggubulu, jia-duyaka na mini na mambàda dua kambulu ndauna jàka ndia rihi kai lupangu na-wuangu-ma bàdi hunggu panudangu tungu nu.

¹⁵Na tau na mawulu ka lupangu nawua pa-rihingu bàdi nda wànda-a, tàka na tau mila àmbu nawua pa-wawangu-du, nu la rehi wuangu-da àmahu palohu pa-pahàla wàda wikida.

¹⁶Pahuru-nja da àmahu nuda la banjaru Ihirailu, kai paloku wànya na lii pa-lumungu la Maünggu. Mbuu ndàbada nuda jia-haka da àmahu palohu pa-pamara wàda wikida, tàka Nyungga duku jiangu-ma napa ba kunamu mànuya la pakuru mangganja nyuda,” wàna.

¹⁷I MIRI napanii-nya i Muha,

¹⁸“Pandoi hau karaba wudu, tàka na latana ka wudu-mayai. Tuya nuna na karaba la manggawa Maü dàngu ngia pawotu maraku, hàla ka paihi-nya wai.

¹⁹Nuna na wai ndumada i Harungu dàngu da anana ka dabaha wàngu lima dàngu wihida

²⁰ba ndedi da tama la Maü dàngu la palihi-nya na ngia pawotu maraku ba dangàndi kameti maraku patunu. Na kalaratu nuna lupangu-ma ka danunju-ya nyuda dàngu da wàla wuada lundu nu - nu,” wàna.

²²I MIRI napanii-nya i Muha,

²³“Pitiwa rungu marihi hàmu, 6 kilu muru maningu waingu, 3 kilu kaninggu, 3 kilu tibu hiritu, dàngu 6 kilu ai mbii kati.

²⁴Mbuu ndàbada pa-timbangu-ha tundunya na timbangu na pakàli wàngu la Maünggu. Bonja wànya 4 litaru mina haitungu,

²⁵pandoi mina palumu wàngu lii, pakoru-nja hama tuna na mina mbii kati.

²⁶Jiaha nuda da pawàngu bai katua-ya na Maünggu, na Pàti Pa-ràndingu,

²⁷na menja dàngu mbuu ndàbana na pamàtu wàna, na tandai palita dàngu na pamàtu wàna, na ngia pawotu maraku ngia patunu dupa,

²⁸na ngia pawotu maraku pangia kameti maraku patunu dàngu mbuu ndàbana na pamàtu wàna, lupa na karaba wai dàngu na latana.

²⁹Tuna nu na pawàngu bàdi bau panuda-nggaha Nyungga mbuu ndàbada nuda ka peku matua-da mbuu ndàbada. Nggàra biaya na ma-jonggaru-ya nuna na ngia pawotu maraku lupangu wua-ngganya bàdi Nyungga MIRI, dàngu nggàmu biaya na ma-jonggaru-ya napa na-hanggàmaru ruku mbangatu-na na matua-na.[31]

³⁰Katua-mbuya i Harungu anguda anana ka peku undungu-na na pakata-da ba ratuha malumu-ngga Nyungga.

³¹Pekanya na banjaru Ihirailu, nuna na mina palumu wàngu lii ba pa-panudangu lai Nyunggaya lundu pirangu bia.

³²Na mina nuna nda uku paburi-nya la àtalu tau bia. Àmbu pandoi-du mina ma-hamangu ba nawàngu pa-pakorungu tungu nu. Nuna mina matua-ya, dàngu reki-maya ba ma-matua-ya.

³³Na tau na ma-pandoi mina ma-hamangu, jàka ndia na matunya na tau na manda ratu, nyuna nda pareki-ayapa ba anggota banjaru-nggunya,” wàna.

³⁴I MIRI napanii-nya i Muha, “Pitiwa ma - màtu rungu ma-pahama dangu, nu da rutuhu kàhi, da tàda njaki, da rutuhu ai mbii kati dàngu dupa weli wingungu.

³⁵Wànja nuda mbuu ndàbada ka pandoi pakoru-nja patuu dupa mambii kati. Bonjanya mehi ka na-padaingu ba ihi mbàngi-nanya bai wànya lai Nyungga.

³⁶Hawiangu welingu la dupa nuna lupangu-ma bai pa-kangudahu-ya. Ngàndiya nuna la Maünggu, ka wewaru-nya la hangga Pàti Pa-ràndingu. Na dupa nuna lupangu-ma kareki-ya ba ma-matua-ya na pa-panuda-ngga ndumanggu Nyungga. Àmbi pandoi-du dupa pa-pakorungu wàngu rungu ma-hamangu nduma wikimi nyimi.

³⁸Nggamu ma-pandoi mbii kati ma-hamangu, nda pareki-ayapa ba anggota banjaru-nggunya,” wàna.