Read Kambera LUHU 31 Bible Online

LUHU 31 - Kambera bible

LUHU 31

¹I MIRI napanii-nya i Muha,

²“Nyungga kupindi-yaka i Mbahaleyilu anana i Uri umbuku-na i Huru welingu la kabihu Yahunda,

³dàngu kuwua-nyaka na mbihanggu.[32] Nyuna kuwua-nya kanandingu ma-jàngapu, màpi dàngu pa-duluku wàna la paràma hangia - hangia na ma-manandangu:

⁴la pa-pandoi hahaya la kanandingu wàngu hupu pinguna la patuku àmahu rara àmahu bara dàngu wudu;

⁵la padeli watu mata tawuru ka pa-mananda-nya; la pa-huratu ai dàngu la paràma hangia - hangia ma-manandangu.

⁶I Ahuliapu anana i Ahihamàku welingu la kabihu Ndàngu mbàda pindi-nggunyaka ka na-pambapa dànya. Kuwua-mbunja pamàhi wàngu nda ningu hamada da tukangu mapingu ka da-ngalangu pa-pandoi-ya jàka nggàra biaya na pareta pawua-nggunja:

⁷na Maünggu, na Pàti Pa-ràndingu dàngu nggàbina, dàngu mbuu ndàbada da ihina na Maü,

⁸na menja dàngu da pamàtu wàna, na tandai palita àmahu rara ihi mbàngina dàngu da pamàtu wàna, na ngia pawotu maraku na ngia patunu dupa,

⁹na ngia pawotu maraku pangia kameti maraku patunu dàngu mbuu ndàbada da pamàtu wàna, na karaba wai dàngu na latana,

¹⁰da paki da pa-lumungu wàna i Harungu dàngu da anana, da papaki-da ba talànga paloku-danya na paratu wàda,

¹¹na mina palumu wàngu lii dàngu dupa mbii kati ndumana na Rowa Matua. Nuda mbuu ndàbada lupangu-ma da-pandoi-ha, nunju pawingu-nya na pa-paita-nggunggau nyumu,” wànanya.

¹²I MIRI nawua-nya pareta i Muha,

¹³la pa-pakada-nya la banjaru Ihirailu, “Mbabunya na lodu Hangahu, na lodu na pambàda kawuku-nggu ba lodu hangahu-ya. Lundu nu - nu na lodu nuna jiaya na lodu maràngga pangàdangu-nda nyimi dàngu Nyungga, ka peku piminya Nyungga ba MIRI-ka, dàngu ba mbàda panjadi-nggunggaika banjaru wikinggu.

¹⁴Na lodu hangahu nuna lupangu-ma kai tembiya ba lodu matua-ya. Nyimi kuwua-nggai nomu mbua lodu paràma wàmi, tàka na lodu papihu wàna lodu bokulu-ya na pa-panuda-ngga ndumanggu Nyungga. Nggamuya na manda tembiya, tàka hi ràma bia-nanya la lodu nuna lupangu-ma pa-hukungu metiya bàdi.

¹⁶Na banjaru Ihirailu lupangu dambabu-manya bàdi na lodu nuna lundu ana umbuku-da ba jiaya na tanda pa-ràndingu.

¹⁷Na lodu nuna pa-daingu-mananya ba lodu maràngga pangàdangu-ya la banjaru Ihirailu dàngu Nyungga, nadu Nyungga MIRI, ba mbàda padika-nggunyaka na awangu dàngu na tana la dalu nomu mbua lodu, tàka la lodu papihu wàna hi ku-pànjangu paràma dàngu hi ku-hangahu,” wàna.

¹⁸Ba nahàla-ka papanii dànya i Muha la pinu Palindi Hinai, nawua-nyaha i Muha paraïna i Ala da watu pipi da madàmbu-da da ngia pa-tulihu-naha i Ala da lii pareta-na.