Read Kambera LUHU 32 Bible Online

LUHU 32 - Kambera bible

LUHU 32

¹Ba naita-yaka paraï banjaru Ihirailu ba lalu mandaiya i Muha ba nda napuru ndoku welingu la palindi, tàka ba hanii bia-napa lai nu, langgungguru-danyaka i Harungu hi dapanii dànya, “Nda tapi ndoku-nyapa nàhu jàka nggi - nggikina i Muha, na ma-karia-nda paluhu welingu la Mehiru; ba tuna pandoi-nggàmawa kamàla ala[33] mairu ngàndi-kama,” wàda.

²Ka panii-nanyaka i Harungu lai nyuda, “Pukalu-ha da pula àmahu rara papaki-da da papaha-mi dàngu da anami,” wànanja.

³Ka pukalu-dahaka da pula àmahu rarada haàtu - haàtu hi dangàndi-ha lai Harungu.

⁴I Harungu na pitiha nuda da pula, hi nalala-ha, hàla hi naburi-ya la watu ngia pawulu-ya ba nawulu-ya na hau kahala hapi àmahu rara. Ka panii-nanyaka nuna na banjaru, “Ha Ihirailu, yiana-yaka na kamàla alanda na ma-karia-nda paluhu welingu la Mehiru!” wàda.

⁵Hàla i Harungu na-pahada-nya na hau ngia pawotu maraku la hangga kahala hapi àmahu rara hi na-pakada-nya, “Haromu remi-ndanya ka ta-maraku-nya i MIRI,” wàna.

⁶Hadangu harii la mbaru hada rudungu, da tau Ihirailu ngàndi-danyaka ba pi - pira ngiuda da banda patuu kameti maraku patunu, dàngu ba pi - pira ngiuda da patuu kameti maraku papeku. Mandapu ngangu ngunungu-danyaka, hàla hadangu-danyaka la pa-hanggela hawola.

⁷Ka panii-nanyaka MIRI lai Muha, “Puru pa-renggangu, nadu na banjaru-mu na pairu ngàndimu paluhu welingu la Mehiru ba wunda-danyaka ma-akatu.

⁸Nyuda da-hiliru-ka welingu la pareta - pareta-nggu. Nyuda da-pandoi-ka kahala hapi àmahu rara palala, hàla hi da-maraku-nya dàngu hi dangàndi-nya kameti maraku patunu. Napanii-da ba nuna-yaka na kamàla alada na ma-karia-nja paluhu welingu la Mehiru.

⁹Ku pimanya na banjaru yiana ba lalu mbana malihu katiku-ya.

¹⁰Àmbu kamangu-du pa-dimbaku-ka. Nyungga nu hàngga-manggu-nyaka dàngu màta ka pamolu-nja wàngguka. Tàka nyumu dàngu da wàla wuamu napa ku-panjadi-kau hau banjaru bokulu,” wàna.

¹¹I Muha na-kamahi-nya i MIRI Alana, “Dou MIRI, nggiki-naika hi tumunu? Ka nda Nyumu ma-pamara-ha welingu la Mehiru bau wàngu mbiha mendimu dàngu kodi màkamu?

¹²Jàkau pamolu-nja, panii wàngu-nanyaka na tau Mehiru, hiu iru ngàndiya yiana na banjaru ka pameti-ha la ma-palindingu dàngu ka pamolu ailulu-nja wàna, jiangu-maka ba wàda. Màtangu àru patumu nu, ou MIRI, panjilu àrunya na pawuku-mu dàngu àmbu pa-hanggàmaru-duya na banjaru yiana.

¹³Pangàda-nja da atamu i Ambarahàmu, i Ihàku dàngu i Yakupu. Namuya bau paràndi wàngu harangu la pawua-nja wàla wuada hama dangu kandunu la awangu, dàngumbu mbuu ndàbana na tana paràndi-munja ba manguda da wàla wuada lundu nu - nu,” wàna.

¹⁴Ka panjilu-nanyaka i MIRI na pawuku-na dàngu nda na-pangala-anyapa na pangàdungu-na la pa-handàuni-nya ura pàda na banjaru nuna.

¹⁵Puru beli-nanyaka i Muha welingu la palindi ba dàngu ngàndi-nanja ba dàmbuda da watu na ngia pa-tulihu-ha da pareta-na i Ala la mbeli mbapada.

¹⁶I Ala wikima na ma-pandoi-ha nuda da watu dàngu na ma-tulihu-ha lai nu da lii pareta-na.

¹⁷Ba talànga puruna nu, rongu-nanyaka paraïna i Yuhua da tau Ihirailu ba dawa - wara hi napanii-nya i Muha, “Ningu kanyaüru pabera la ngia pa-pamaüngu,” wànanya.

¹⁸Napaya i Muha, “Ba wàngu parongu-ya nda hama tuna paoingu talu-aya dàngu nda kaladaku kàku-aya; nuna nu talia nggoru tau maludu-ya,” hi wàna.

¹⁹Ba na-mareni-nyaka na ngia pa-pamaüngu nyuna i Muha ita-nanyaka na kahala hapi àmahu rara dàngu na tau dangu ba talànga renjana, ka mbeni-nanyaka. Lai numa la karaha palindi i Muha ba na-dànjaku-nja da watu pangàndi-na hi lupa dambera kaha - habàru.

²⁰Tunaka nu piti-nanyaka na kahala hapi na pa-pandoi-da da tau Ihirailu, hi nalala-ya, hi nabaiya hi lupa namija hama kumburu tanaya, hàla hi na-pakoru-nya la wai. Tunaka nu na-paràha-nya na tau Ihirailu paunu-nya.

²¹Hi napanii lai Harungu, “Nggiki-danggau hi lupa upahia bianja pawunda njala bokulu?” wànanya.

²²Nahema i Harungu, “Àmbu hàngga ni-dungga nyungga; ba pi wiki-mamunja da tau yiada ba da-patidungu la pawunda ma-akatu.

²³Na paniida lai nyungga, ‘Nda tapi-anyapa nàhu jàka nggàra ehina i Muha, na mambàda karia-nda paluhu welingu la Mehiru; jia ba tuna pandoi bia-nggama kamàla ala mairu ngàndi-kama,’ wàda.

²⁴Hi ku-paràha-nja pa-wuangu-ha da ngaü àmahu rarada, hi dawua-nggaha. Mbuu ndàbada da ngaüda kutuha la epi, hi ninya yiana na kahala hapi!” wànaka.

²⁵I Muha na-pàdanya ba i Harungu-maka na ma-pahia-nya na banjaru Ihirailu hi beri njara maluhu welingu la okaya, hi lupa jia-haka da-pariki wàda da muhu.

²⁶Ka ndolaku-nanyaka la ngaru pindu bokulu ngia pa-pamaüngu hi na-warangu, “Nggamuya na mapulu angunya i MIRI lupangu-ma ka na-hurungu nàmu!” wàna. Ka hurungu-nanyaka na kabihu Lewi hi da-winggiru-nya i Muha,

²⁷hi napeka-nja nyuda, “I MIRI Ala Ihirailu nawua-nggai pareta nyimi nimbihu-mi la pa-butuhu-ha da hapanda-mi, kai lakunya yiana na ngia pa-pamaüngu, welingu la hau pindu bokulu lupa la hau pindu bokulu, dàngu kai pameti-ha da angu dedimi, da kandua-mi dàngu da lihi umami,” wànanja.

²⁸Da tau Lewi nunju-danyaka na paniina i Muha, nu la lodu nuna ràkangu tau 3.000 (tailu rata)-ya na mameti la banjaru Ihirailu.

²⁹Napanii i Muha la kabihu Lewi, “La lodu nàhu mbàda pa-hinggilu-minyaka na wikimi[34] la panjadi ratu malumu-nya i MIRI bai wàngu pa-pameti-ha da nua da kalembi-mi, ka wua-nanggai-nyaka na kanyuru i MIRI,” wànanja.

³⁰Hadangu harii panii-nanyaka i Muha la banjaru nuna, “Nyimi yia mbàda wunda-mika njala bokulu. Tàka nàhu hili kandekalu-nggunyaka na palindi la pa-hurungu la hanggana i MIRI; mili kungala àru-kinya na jàmangu njala ndumami nyimi,” wànanja.

³¹Ka hili lua-nanyaka i Muha pa-hurungu la hanggana i MIRI hi napanii, “Mbàda wunda-naka njala bokulu yiana na banjaru. Da pandoi kamàla ala àmahu rara.

³²Orangu àruki la pajàma-nja da njalada; jàka ndia-madu, podahu bia-yawa na tamunggu welingu la mbuku tau lurika,” wàna.

³³Nahema i MIRI, “Mbulungu da tau da mambàda njala lai Nyungga-a duku da pa-podahu-nggu tamuda welingu la mbuku nuna.

³⁴Lakuwa nàhu, dàngu kau iru ngàndiha nyuda la pangia na pambàda peka-nggunggau. Na pa-palewa-nggu ka na-kapipi-kau nyumu, na nyuna napa natàka na rehina ba kuhuku-nja da tau nuda rukuda da njalada,” wàna.

³⁵Hàlaka nu, patàka-nanjaka ura pàda da tau nuda paraïna i MIRI rukuna ba dahàni-ya i Harungu pa-pandoi-nja kahala hapi àmahu rara.