Read Kambera LUHU 34 Bible Online

LUHU 34 - Kambera bible

LUHU 34

¹Tunaka nu napanii i MIRI lai Muha, “Kahebi dàmbu watu kapipi hama tuna la wungana. La watu nuda napa ku-tulihu-ha da pulungu hamada da maninja la watu da pambàda beramu.

²Hawa - wanjiru padua haromu la mbaru kau kandekalu la Palindi Hinai kau hurungu lai Nyungga la pinu palindi.

³Àmbu haàtu makiku-nggau nyumu jàka ndia na maninya la nggi mbara bia la palindi yiana. Àmbu pahia-dunja da hapi da mbimbi pangangu rumba la karaha palindi,” wànanya.

⁴Hàla i Muha hi na-kahebi dàmbu watu kapipi, tàka hadangu harii la mbaru hada rudungu hei ngàndi-nahaka hu dita la Palindi Hinai, hama tuna na pareta pawua-nanya paraïna i MIRI.

⁵Ka puru-nanyaka i MIRI[35] la hau karumangu; hi na-ndolaku dànya i Muha lai nu, hi natiki-ya na tamuna na ma-matua, nu i MIRI.

⁶Tunaka nu hi nali i MIRI la hanggana i Muha, hi napanii, “Nyungga MIRI, Alaka, na ma-kanjupu màjangu eti dàngu mila eti. Na mbuhangu-nggu nabundu làndangu. Ku-tuturu dàngu nda kurengga mbeni.

⁷Pa-daingu mbuha-nggunya na riu rata ana umbuku[36] dàngu kujàma-nya na nda pa-deningu dàngu na njala; tàka na nyuna nda jia pamara-anggunya welingu la hukungu-na na tau na manjala, dàngu kuhuku-mbunja da ana dàngu da umbuku-da lundu la tailu ndalaru dàngu la patu ndalaru ruku njalada da ina da amada,” wàna.

⁸La rehi numa ba na-patika pa-marubuku i Muha.

⁹Hi napanii, “MIRI, jàka tuba mbuha langatàka-dumungga, ku-kamahi-nggau, beli eti àrumu la palaku karia-nggama. Tubangu-ma ba na-malihu katiku-na na banjaru yiana, na nyuna jàma-arunja da akatu dàngu da njalama dàngu nggepi àru-kama ka banjaru wikumu-nggama,” wàna.

¹⁰Napanii i MIRI lai Muha, “Nàhu Nyungga tura-nggunya pa-ràndingu dàngu banjaru Ihirailu. La hangga matada nyuda napa Nyungga kutuha da pa-hangàtarungu da pandedi pa-patumbu la honga banjaru la nggi - nggini la pinu tana. Mbuu ndàbana na banjaru napa daita-ha da pa-hangàtarungu da patunggu, nadu Nyungga MIRI napa kutuya na ma-mbàringu ndumami nyimi.

¹¹Karadaku-nja da uku da pawua-nggunggai la lodu nàhu. Napa Nyungga kunyara-ha da banjaru Amori, Kanaàngu, Heti, Perihu, Hewi dàngu Yembuhu la rehi ndàharungu-mi nyimi.

¹²Àmbi turadu pa-ràndingu-mi dàngu da tau la tana patàka tomami, nadu na matuna nu jiaya na manjadi kambia na ma-pawiti-nya na meti ndumami nyimi.

¹³Jia ba tuna, màtangu àmbi tumi nu, màta kai nyungguru-ha da ngia pawotu maraku-da, kai pamija-ha da katoda hàrida kai pungguha da anduna i Ahera, marapu-da.

¹⁴Àmbi lumungu kamàla ala hawiangu, nadu Nyungga MIRI, Ala manda mbuhangu-ka ka pahama-ngga la ngga - nggàra bia.

¹⁵Àmbi turadu pa-ràndingu dàngu na banjaru la tana nuna, nadu la rehi lumungu-da dàngu ba dangàndi kameti maraku la kamàla alada, napa dawànda-dukai, ka kikungu-minyaka.

¹⁶Da anami jàka da-kanoma kawini hangàdangu, napa nyuda da-pamanda-nja paraïda nu da kawini la pa-dunjaku-ngga Nyungga dàngu hi da-maraku-nja da kamàla alada.

¹⁷Àmbi pandoi dàngu àmbi lumungu-du kamàla ala welingu la àmahu.

¹⁸Katanya na Remi Roti Nda Patai Wolungu, hama tuna na pareta pambàda wua-nggunggau, lupangu-ma bàdi kai ngangu roti nda patai wolungu la ngala pihu mbua lodu la wulangu Ambipu, nadu ba la wulangu nunadu bai dunjaku-nya la Mehiru.

¹⁹Nimbihu-da da anakeda mini da kawunga ana dàngu da banda mini da ma-kawunga dedi, mangunggu Nyungga-ha,

²⁰na nyuna lupangu-ma kai papuru-nja welingu lai MIRI da ana kalandai da ma-kawunga dedi, wàngu wotumi kameti maraku heu ana mbimbi hiluna. Jàka ndai bihu pa-papuru-nya, lupangu ipata-maya bàdi na nggoruna nuna na kalandai. Nimbihu-da da anami mini da kawunga anami lupangu-ma bàdi kai papuru-nja welingu lai MIRI. Àmbu ningudu haàtu mamai lai Nyungga dàngu nda ngàndina hunggu maraku.

²¹Ningu nomu mbua lodu la paràma; àmbi ràmadu la lodu papihu wàna, jiapa ka nda jiaya na rehi kabànda jàka ndia na rehi muti.

²²Katanya na Remi Muti la rehi pakiringu-mi pamuti uhu nggàndungu kawunga. Katanya na Remi Maü Ma-paraungu la hupu njàpu ndaungu, la rehi pàpu-miha da wua ai.

²³Pandailu wundangu la hau ndaungu mbuu ndàbana na tau mini ka namai pa-maraku-ngga Nyungga, MIRI Ala Ihirailu.

²⁴Ba kuhàla-ka panyara-ha da banjaru welingu la hanggami nyimi dàngu ba ku-palera-nyaka na tanami, nda ningua haàtu tau matoru mbeni pawàhi-ya na ngabami jàka jiaya nalua-mi pakata-nya na Remi Roti Nda Patai Wolungu, na Remi Muti dàngu na Remi Maü Ma-paraungu.

²⁵La rehi ngàndimi hunggu maraku banda parupu, àmbi hunggu maraku wàngudu ngga - nggàra maningu tai woluna. Na banda parupu nduma kameti maraku ba reminya na Paha lupangu-ma pambuta-maya bàdi la rudungu nuna; nda uku ba ningu pabili lundu hadangu harii.

²⁶Nimbihu ndaungu lupangu mingàndi-ma nyimi la Umana i MIRI ihi paraïmi da pa-kawunga ngalami la tanami. Da toluda da ana mbimbi jàka ndia da ana kamàmbi nda uku pa-manahu papohu-nya dàngu na wai huhuna na baina,” wàna.

²⁷Napanii i MIRI lai Muha, “Tulihu-ha da pulungu nuda, nadu ba palata-nja la pulungu nudadu Nyungga ba kutura pa-ràndingu dàngu nyumu hamanai na banjaru Ihirailu,” wàna.

²⁸Patu kambulu lodu patu kambulu ruduna i Muha ba engana lai nu dàngu i MIRI, ba mandai tuna nu nda nangangu nda na-ngunungu. Da pulu pa-ràndingu jiaha da Hakambulu Pareta-na i Ala da pa-tulihu-na la watu kapipi.

²⁹Ba napuru i Muha welingu la Palindi Hinai ba nangàndi-ha da Hakambulu Pareta, na-handaraku na matana nadu ba mbàda pabanjaru dànanya i MIRI, tàka nyuna i Muha nda napi-anya ba na-handaraku na matana.

³⁰I Harungu dàngu mbuu ndàbana na rayatu daita-ya na matana i Muha ba na-handaraku dàngu nda datoru mbeni palihi-nya.

³¹Na nyuna i Muha na-paau-nja nyuda, ka mai-danyaka i Harungu dàngu mbuu ndàbada da liku uru rayatu palihi-nya nyuna, tàka i Muha hi napanii dànja.

³²Hàlaka nu pauhi hàla-nanyaka na tau Ihirailu ba da-langgungguru-nya, ka patàka hàla-nanjaka paraïna i Muha mbuu ndàbada da uku da pawua-na i MIRI lai nyuna dita la Palindi Hinai.

³³Ba nahàla-ka papanii dànja nyuda, pa-lumburu wàna-nyaka tera na matana i Muha.

³⁴Hàndàka tama - handàka tamana i Muha la Maüna i MIRI papanii dànya i MIRI, na tera nuna na-bunggahu-ya lupa naluhu. Hàlaka patàka-nanyaka na banjaru Ihirailu mbuu ndàbada da paniina i MIRI,

³⁵tàka daita-ya na matana i Muha ba na-handaraku. Ka pa-lumburu beli-nanyaka na matana lupa toma la hili hau rehi jàka nahili panii dànya i MIRI.