Read Kambera LUHU 35 Bible Online

LUHU 35 - Kambera bible

LUHU 35

¹I Muha na-pauhi hàlanya na banjaru Ihirailu, hàla hi napanii-nja, “Yiana-ya na lii pareta-na i MIRI ndumami nyimi:

²Ningu nomu mbua lodu paràma wàngu, tàka na lodu papihu wàna lodu pa-hangahu wànguya, lodu mbabu pa-panuda-nya ndumana i MIRI. Nggamu na maràma la lodu Hangahu lupangu-ma pa-hukungu metiya bàdi.

³La lodu nuna àmbi paroka-du epi la umami,” wàna.

⁴I Muha napanii-nya mbuu ndàbana na banjaru Ihirailu, “Tuna yia na lii pareta-na i MIRI:

⁵Ngàndiwa hunggu maraku lai MIRI. Nggamu na mapàda-nya ba nawànda-ya etina lupangu-ma maraku wàngu àmahu rara, àmahu bara dàngu wudu;

⁶tera linangu tamainangu, tera hawulu kawuru, mbaü atu dàngu rara; tera wulu ihi kamàmbi;

⁷manula mbimbi bumbu pandongu, manula malijangu, ai akahia,

⁸mina nduma palita; rungu patuu mina lii dàngu patuu dupa mambii kati;

⁹watu mata tawuru ndalima dàngu mata tawuru hangia - hangia nduma patuu la kalembi eputu dàngu la nggàbi kuruna na Ratu Bokulu,” wàna.

¹⁰“Mbuu ndàbada da tukangu da mamàhi la hongami damaima bàdi pa-pandoi hàlaha da pareta pawua-na i MIRI, nu:

¹¹Na Maü, toku ndiduna dàngu ndàbina, ketuna dàngu karangga-na, ai patengangu-na, punduku pindu dàngu latana;

¹²na Pàti Pa-ràndingu dàngu ai dukuna, na ndàbina dàngu na tera dimbaku-na;

¹³na menja dàngu ai dukuna, mbuu ndàbada da pamàtu wàna, dàngu roti mangejingu

¹⁴tandai palita na pa-hambila wàngu, dàngu na pamàtu wàna, palita dàngu minana;

¹⁵na ngia pawotu maraku patunu wàngu dupa dàngu na ai dukuna, mina palumu wàngu lii, dupa mambii kati; tera dimbaku-na na pindu Maü,

¹⁶na ngia pawotu maraku nduma kameti maraku patunu, dàngu da ana punduku wudu, ai duku dàngu mbuu ndàbada da pamàtu wàna; na karaba ngia pabaha dàngu latana,

¹⁷da tera liru nduma talora, da kambaniru dàngu latada, tera ndàbi pindu bokulu talora,

¹⁸da kandutuku da liku ndumana na Maü dàngu ndumana na talora-na;

¹⁹da paki lumungu ndumada da ratu ba talànga paloku-da la Rowa Matua dàngu paki pa-panudangu ndumana na ratu Harungu dàngu da anana,” wàna.

²⁰Hàla mbuu ndàbana na tau Ihirailu na ma-pauhi nu pahewa-nanyaka,

²¹dàngu nggamu biaya na mapàda-nya ba nawànda-ya etina, ngàndi-nanyaka hunggu maraku lai MIRI nduma pamàtu wàna na Maüna i MIRI. Nyuda dangàndi-mbu mbuu ndàbada da paihi wàngu ba lumungu dàngu da pawàngu la pakida da ratu.

²²Nggamu biaya na ma-mbuhangu, ka miniya ka kawini-yakai, damai pangàndi paniti ngaü, pula, tawuru, kara dàngu mbuu ndàbana màtu - màtu ngaü àmahu rara la pahunggu maraku-nja lai MIRI.

²³Nimbihu-na na tau na maningu tera linangu tamainangu, tera hawulu kawuru, mbaü atu dàngu rara, tera wulu kamàmbi, manula mbimbi bumbu pandongu, jàka ndia manula malijangu, dahunggu maraku wànja nuda.

²⁴Nimbihu-na na tau na mapeku pa-pandulangu wàngu àmahu bara jàka ndia wudu, dangàndi-ha ndumana i MIRI. Jia-mbuyai na pawàna na tau na maningu ai akahiangu, ndumana nuna na paràma.

²⁵Da kawini da mamàhi pa-ndataru dangàndi lulu kamba linangu mirihu dàngu lulu kamba hawulu kawuru, mbaü atu dàngu rara, da pambàda ràmada.

²⁶Nyuda da-ndataru-mbu lulu kamba wulu ihi kamàmbi.

²⁷Ba hapajia-ha da liku uru dangàndi watu mata tawuru ndalima dàngu mata tawuru hawiangu ka tuha la eputu dàngu la nggàbi kuru.

²⁸Nyuda dangàndi-mbu rungu dàngu mina palita, mina lii dàngu dupa mambii kati.

²⁹Mbuu ndàbana na tau Ihirailu nawàngu etina pangàndi hunggu maraku lai MIRI ndumana na paràma nunjuya na pareta pawua-na i MIRI la ngaruna i Muha.

³⁰Tunaka nu i Muha napanii la tau Ihirailu, “I MIRI mbàda pindi-nanyaka i Mbahaleyilu anana i Uri, umbuku-na i Huru, welingu la kabihu Yahunda

³¹dàngu nawua-nya nyuna wàngu mbihana.[37] I Ala nawua-nya nyuna kanandingu ma-jàngapu, màhi dàngu pa-duluku wàngu la mbuu ndàbana na paràma hangia - hangia ma-manandangu,

³²la pa-pakaka hahanya na paràma paràka paràma tau màhi, dàngu la pa-pandoi-ya welingu la àmahu rara, àmahu bara dàngu wudu;

³³la padeli watu mata tawuru da pa-pawandalu napa; la pa-huratu ai dàngu la paràma hàlaya na ma-manandangu hangia - hangia.

³⁴Lai Mbahaleyilu dàngu i Ahuliapu, anana i Ahihamàku welingu la kabihu Ndàngu, i MIRI nawuanja pingu la pa-papeka-nja pamàhi wàngu la tau hawiangu.

³⁵Nyuda pa-wuangu-ha papingu wàngu la paràma hangia - hangia na paràma-da da mamàhi pa-pabola, mamàhi pa-pakaka hahangu, dàngu mamàhi pa-tinungu linangu tamainangu, tera hawulu kawuru, mbaü atu dàngu rara, lupa màtu - màtuka. Nyuda jia-haka da mini màhi la pa-pakaka hahangu dàngu da-duluku-ma la paràma hangia - hangia-ka.