Read Kambera LUHU 36 Bible Online

LUHU 36 - Kambera bible

LUHU 36

¹I Mbahaleyilu, i Ahuliapu dàngu mbuu ndàbada da mamàhi paràma da ma-ngalangu pamàpi wàngu, dàngu hupu màhi welingu lai MIRI, dapinya na huri paloku-ya mbuu ndàbana na paihi wàngu ba wuluya na Maüna i MIRI. Nyuda daràma hàla-maya bàdi hama tuna na pareta pambàda wuana i MIRI,” wàna.

²I Muha napaau-nja i Mbahaleyilu, i Ahuliapu dàngu mbuu ndàbana na tau na ma-ngalangu hupu màhi welingu lai MIRI dàngu na mawàngu etina pa-pambapangu, hàla hi na-paràha-nja pa-pakiringu.

³I Muha nawua hàlanja da pawotu-na na tau Ihirailu ndumana na paràma ba wuluya na Maüna i MIRI. Ba tuna na banjaru Ihirailu ngàndi - ngàndi biana-nyapa pawotu-na lai Muha hau mbaru - hau mbaru.

⁴Hàla da mamàhi paràma da ma-talànga paloku-ya na paràma

⁵da-patàka-nya i Muha, “Da malanja pa-pandulangu wàna na tau lalu rihi-daka welingu la paràma wànya na paràma na pa-patanggu-na-nggama i MIRI,” wàda.

⁶Ka pakada-nanyaka i Muha la nggubulu ngia pa-pamaüngu ba jàmu-daka da pa-ndulangu wàngu nduma Maüna i MIRI; jia-duyaka hi na-jiaka na tau pahili ngàndi ngga - nggàra.

⁷Da paràma wàngu da pambàda pa-ndulangu wàda darihi-njaka da pa-palundu wànya mbuu ndàbana na paràma - paràma-ka.

⁸Tunaka nu da marihi màhi welingu lai nyuda da mamàhi paràma wulu-danyaka na Maüna i MIRI. Na Maü nuna da wulu wànya hakambulu mbàla tera linangu tamainangu na patinu wàngu tera hawulu kawuru, mbaü atu dàngu rara, hàla hi pahiku-nya nggàmbaru patau awangu.[38]

⁹Hawàla - hawàla hama hukutu-mada; na malaina na hawàla hakambulu dua metiru-na, na mbàlaru-na dua metiru-na.

¹⁰Da lima mbàla pautu panuangu-ha hi hawàla liruna, tàka da lima mbàlai jia-manyai ba tuna nu.

¹¹La halinggi-da nuda da liru ba dua mbàlada tunja pa-kànangu-da tera kawuru,

¹²lima kambulu pa-kànangu la hawàla - hawàla liru hi lupa hamawa biada.

¹³Hàla hi pandoi lima kambulu ketu àmahu rara da ma-pandekilu-nja da liru da madua mbàlada.

¹⁴Hàlaka nu ràma-danyaka natoku ndiduna na Maü, wàngu hakambulu hawàla tera wulu ihi kamàmbi.

¹⁵Hawàla - hawàla hama hukutu-mada, na malaina na hawàla hakambulu tailu metiru-na dàngu na mbàlaru-na dua metiru-na.

¹⁶Da lima mbàla pa-panuangu-ha hi hawàla liru-ana, tàka da nomu mbàla anguda, tuna numai na pandoi-na.

¹⁷Da lima kambulu pa-kànangu pautu-ha la halinggi liru kawunga-na, tàka da lima kambulu pa-kànangu la halinggi liru na padua mbàla wàna.

¹⁸Hàla hi pandoi lima kambulu ketu wudu ka pandekilu wànja da liru ba dua mbàlada da patuu toku ndiduna na Maü.

¹⁹Hàla patuna nu hi da-pandoi dua mbàla pandàda-na na Maü, na hawàla manula mbimbi bumbu pandongu, tàka na hawàla manula malijangu.

²⁰Tunaka nu da-pandoi-nya kapambalu-na na Maü welingu la ai akahia da ma-ndolaku tinjangu.

²¹Hapungu - hapungu kapambalu na janggana patu metiru tàka na mbàlaru-na nomu kambulu nomu hiti-metiru-na.

²²La hapungu - hapungu kapambalu patungu kandutuku ma-papapangu hi peku pakeingu-da hapungu dàngu hapungu.

²³Ndumana la hapapa mbara luruna na Maü pandoi-nya dua kambulu kapambalu

²⁴dàngu patu kambulu lata àmahu bara, dàmbu la wawa nimbihu kapambalu ndumada da kandutuku-na da madua mbunguda.

²⁵Ndumana la hapapa mbara diana na Maü pandoi-nya dua kambulu kapambalu,

²⁶dàngu patu kambulu lata àmahu bara, dàmbu la wawa nimbihu kapambalu.

²⁷Ndumana la kajia Maü la patama lodu, pandoi-nya nomu kapambalu

²⁸dàngu dua mbungu kapambalu ndumana la kabihu-na.

²⁹Da kapambalu la kabihu pa-hàmburu-nja la pingida lupa tàka hu dita la hupu ditada. Da dua mbungu kapambalu da matunya kabihu-na tuna numai na huri pandoi-ha.

³⁰Jia ba tuna, mbuu ndàbada waluda da kapambalu dàngu hakambulu nomu lata àmahu bara, dàmbu la wawa nimbihu kapambalu.

³¹Hàla hi da-pandoi hakambulu lima ai borungu welingu la ai akahia, lima mbungu ndumana la hapapa karaha Maü,

³²lima la hapapa karaha hau, dàngu hi lima ndumana la kajia Maü la patama lodu.

³³Na ai borungu la padua datuya la padeni padua-na na janggada da kapambalu welingu la hupu lupa la hupu hauna na Maü.

³⁴Da kapambalu-na na Maü dàngu da ai borungu-na na Maü pa-kamburungu àmahu raraha, hàla hi tuha da kara àmahu rara da mapàtu-ha nuda da ai.

³⁵Da-pandoi-mbu tera pindu, tera linangu tamainangu da patinu wàngu lulu kamba kawuru, mbaü atu dàngu rara, hàla hi pahiku-nja nggàmbaru patau awangu.[39]

³⁶Ka tiwalu-nya nuna na tera da-pandoi patu mbungu punduku ai akahia da pa-kamburungu àmahu rara dàngu ketu àmahu rara, da patuu la pinu patu lata àmahu bara.

³⁷Da-pandoi-mbu tera dimbaku-na na pindu Maü welingu la tera linangu tamainangu na patinu wàngu lulu kamba hawulu kawuru, mbaü atu dàngu rara dàngu hi pa-mananda wànya pa-hikungu.

³⁸Ndumana nuna na tera pindu da-pandoi lima mbungu punduku ka panuwa wànja ketu. Da hupuda dàngu da ma-panua-nja nuda da punduku lima mbungu pa-kamburungu àmahu raraha, tàka da latada ba limada wuduha.