Read Kambera LUHU 37 Bible Online

LUHU 37 - Kambera bible

LUHU 37

¹I Mbahaleyilu na-pandoi-ya na Pàti Pa-ràndingu welingu la ai akahia, na nunjuna 110 hiti-metiru-na, na ndàbaru-na dàngu na janggana 66 hiti-metiru nimbihu-da.

²Na kuruna dàngu na liuna pa-patapu-nya àmahu rara ihi mbàngina, hàla hi pandoi-nya halaya àmahu rara la winggiru-na.

³Tunaka nu hi pandoi-nya patu mbua kara àmahu rara ndumada da ai duku, hi tuha la patu mbungu wihina na pàti, dàmbu kara la karaha-na hapapa - hapapa.

⁴Na-pandoi-mbunya ai dukuna welingu la ai akahia, tàka hi kamburu-nya àmahu rara,

⁵hàla da ai duku nuda hi pahaunja la kara la karaha-na hapapa - hapapa.

⁶Tunaka nu hi na-pandoi-nya nggàbina welingu la àmahu rara ihi mbàngina, na nunjuna 110 hiti-metiru-na, na ndàbaru-na 66 hiti-metiru-na.

⁷Na-pandoi-mbunya dàmbu patau awangu[40] àmahu rara patuku,

⁸hau la nimbihu hupuna nuna na nggàbina. Da kahala hada patau awangu patuu pa-nuangu-ha dàngu nuna na nggàbina

⁹dàngu da-kawara pa-hanggangu ba na-pandoi-ha, ba dàngu tawàlahu-da da ruu kàpada ba da-panggàbalu-nya na nggàbi pàti.

¹⁰I Mbahaleyilu na-pandoi menja ai akahia, na nunjuna 88 hiti-metiru-na, na ndàbaru-na 44 hiti-metiru-na, tàka na janggana 66 hiti-metiru-na.

¹¹Na menja nuna natapu wànya àmahu rara ihi mbàngina, tàka hi natuu winggiru-nya halaya àmahu rara.

¹²Hàla na-pandoi-nya halinggi-na na menja na mbàlaru-na 7,5 hiti-metiru-na. Nuna na halinggi-na na-pandoi-nya halaya àmahu rara la winggiru-na.

¹³Na-pandoi-nya patu mbua kara pangia-da da ai duku, da patuu la patu mbua kabihu-na la wihi menja.

¹⁴Da karana da ngia pa-pahau-nja da ai dukuna patuu la lihi halinggi menjaha.

¹⁵Nuda da ai duku papandoi welingu la ai akahia-ha, dàngu hi kamburu-nja àmahu rara.

¹⁶Napandoi-mbuha da kawinga, da kaba wai, da kadihi dàngu da moku nduma hunggu maraku wai angguru. Mbuu ndàbada da pamàtu wàna na menja, na-pandoi-ha welingu la àmahu rara ihi mbàngina.

¹⁷I Mbahaleyilu na-pandoi tandai palita welingu la àmahu rara ihi mbàngina. Na latana dàngu na polana pa-pandoi-ha welingu la àmahu rara patuku. Da wàla ai pa-manandangu wàna hamanai da kapunju-da dàngu da tanga wàlada pa-panuangu-hàlaha dàngu na tandaina.

¹⁸Nu la tandaina na-pandoi-nya nomu mbua kahanga, tailu mbua kahanga hapapa - hapapa.

¹⁹La nimbihu kahanga-na na-pandoi-nja pa-manandangu wàda tailu wàla ai mbandamu mangu kapunju dàngu tanga wàlada.

²⁰La tandaina na-pandoi-nya pa-manandangu wàna wàla ai mbandàmu mangu kapunju dàngu tanga wàlada.

²¹La lumbu kahanga ma-pambapangu na-pandoi-nya hau kapunju.

²²Mbuu ndàbana na tandai palita dàngu da kapunju-na dàngu da kahanga-na pa-pandoi-ha welingu la hapungu àmahu rara patuku maihi mbàngina.

²³Nu la tandai palita na-pandoi-nya pihu mbua palita dàngu pa-paili wànja da humbu palita dàngu na kaba pandemangu kalatu-da welingu la àmahu rara ihi mbàngina.

²⁴Ka pandoi wànya na wihi palita dàngu da pamàtu wàna 35 kilu àmahu rara ihi mbàngi-mana pa-payemangu.

²⁵I Mbahaleyilu na-pandoi welingu la ai akahia hau ngia pawotu maraku ngia patunu wàngu dupa. Na ngia pawotu maraku nuna na-palarangu; na nunjuna dàngu na ndàbaru-na marangga 45 hiti-metiru-da dàngu na janggana 90 hiti-metiru-na. Nu la patu mbua kabihu-na mbara dita na-pandoi-nja kadu ma-panuangu dàngu ngia pawotu maraku.

²⁶Mbara dita la pinu la patu mbua karaha-na dàngu da kaduna pa-kamburu wànja àmahu rara ihi mbàngina, tàka la winggiru-na natunya halaya àmahu rara.

²⁷Na-pandoi-mbunya dàmbu kara la lumbu halaya àmahu rara la karaha-na hapapa - hapapa ngia papahau-nja da ai dukuna na ngia pawotu maraku.

²⁸Nuda da ai duku pa-pandoi welingu la ai akahia-ha hi kamburu-nja àmahu rara.

²⁹I Mbahaleyilu na-pandoi-mbu mina lii dàngu dupa ihi mbàngina mambii kati, pa-pakorungu hama tuna mina mbii kati.