Read Kambera LUHU 39 Bible Online

LUHU 39 - Kambera bible

LUHU 39

¹I Mbahaleyilu dàngu i Ahuliapu dapandoi paki pa-lumungu wàngu tera hawulu kawuru, mbaü atu dàngu rara ndumada da ratu la rehi paloku-da la Rowa Matua. Da paki ratu ndumana i Harungu da-pandoi-ya hama tuna na pareta pawua-na i MIRI lai Muha.

²Na eputu pa-pandoi welingu la tera linangu tamainangu, tera hawulu kawuru, mbaü atu dàngu rara, dàngu lulu kamba àmahu rara.

³Datuku-ha da kambitaku àmahu rara hàla hi dairi - irihu-ha hi da-mirihu hama tuna lulu kamba, hàla hi datinu paangu-nja lulu kamba linangu tamainangu dàngu lulu kamba hawulu kawuru, mbaü atu dàngu rara.

⁴Hàlaka nu hi da-pandoi dua walangu liku kundu pahondu wànya na eputu na pautu la karaha-na.

⁵Na boru bànggi patinu pa-mapihungu da-pandoi-ya welingu la ma-hamangu tàka hi utuya la eputu hi da-mbulungu hama tuna na pareta pawua-na i MIRI lai Muha.

⁶Dadeli watu mata tawuru ndalima hi tuya la halaya àmahu rara. Ruku tanjiku-na na màhida da-huratu-ha da tamuda da hakambulu madua anana i Yakupu nu la watu.

⁷Tunaka nu nuda da watu datuha la liku kudu eputu ka tanda panamu wànja da hakambulu dàmbu kabihu Ihirailu, hama tuna na pareta na pawua-na i MIRI lai Muha.

⁸I Mbahaleyilu dàngu i Ahuliapu da-pandoi nggàbi kuru hamada da pawàngu ba pandoi-ya na eputu, dàngu na pa-hikungu-na hama-mbuda.

⁹Na hadana na-palarangu ba lapitu padua-ya, na mbàlaru-na dàngu na malaina hama-mada nimbihu-da ba 22 hiti-metiru-da.

¹⁰Nu la nggàbi kuru, datuha ba patu ndalaru-da da watu mata tawuru. La ndalaru kawunga, watu mata tawuru ndalima, topahu dàngu mbainduri ma-paninu.

¹¹La ndalaru padua wàna: watu jamurutu, watu nilamu dàngu itangu.

¹²La ndalaru patailu wàna: watu lanjuwandiru, akiku dàngu watu wàla mbunguru.

¹³La ndalaru papatu wàna: watu piruhu, yakutu dàngu ràtana ma-wingiru wàla. Nuda ba hakambulu dàmbuda da watu mata tawuru pahondu wàngu àmahu raraha.

¹⁴La nimbihu watu mata tawuru pa-huratu-ya na tamu haàtu welingu la hakambulu madua anana i Yakupu ba jiaha da tanda panamu wànja da kabihu Ihirailu.

¹⁵Hàla hi da-pandoi dua walangu lulu kanàtaru àmahu rara ihi mbàngina na pa-paputi likungu.

¹⁶Da-pandoi-mbu dàmbu kara àmahu rara da patuu la hupu dita hapapa - hapapa-na na nggàbi kuru.

¹⁷Hàla nu da dua walangu kanàtaru hi pahaunja la dàmbu kara àmahu rara nuda,

¹⁸tàka da hupu - hupu hapapa-da pahondu-ha la halaya ba dàmbuda, hi peku panuangu-na na nggàbi kuru la liku kundu ngia ngabana na eputu.

¹⁹Hàla hi da-pandoi dàmbu kara àmahu rara da patuu la nggàbi kuru, la hupu wawa mbara daluna na manggàna-ya na eputu.

²⁰Hàlaka nu da-pandoi dàmbu kara àmahu rara da patuu ngia ngaba la liku kundu eputu ba dua walada, la lihi ngia pa-pajàmburu utuna mbara wawa hawutu, la dita boru bànggi na patinu pa-màpihungu.

²¹Nunjuya na pareta-na i MIRI lai Muha, na kara nggàbi kuru panua wànya liku kawuru la kara eputu, hi lupa na-padaingu na nggàbi kuru la dita boru bànggi tàka hi nda na-pahàlangu.

²²Na kalembi pahàlangu na pahau la pinu eputu nggubulu-na pa-pandoi welingu la tera hawulu kawuru-ya.

²³Na mbowa nggoruna pautu pa-ndapilu-nya liku pa-tinungu ka àmbu namuda pa-kahira.

²⁴La weli winggiru hingi wawana pandoi-nya pa-manandangu wàna wua ndalima welingu la tera linangu tamainangu dàngu tera hawulu kawuru, mbaü atu dàngu rara, pahe - henaku-nja ana katàngu àmahu rara nunjuya na pareta-na i MIRI lai Muha.

²⁷Da-pandoi kamenja ndumana i Harungu dàngu da anana,

²⁸dàngumbu tera lenju hakalaki kababa welingu la tera linangu,

²⁹dàngu boru bànggi tera linangu tamainangu, tera hawulu kawuru, mbaü atu dàngu rara, pa-mananda wànya pa-hikungu, hama tuna na pareta-na i MIRI lai Muha.

³⁰Pa-pandoingu-mbuya pa-manandangu wàna welingu la àmahu rara ihi mbàngina, tandana ba pa-panudangu ndumana i MIRI-ha. Nu la pa-manandangu wàda pa-huratu-ya na matuna yia, “Pa-panudangu ndumana i MIRI-ya,” wàna.

³¹Na pa-manandangu wàngu patuya la tera lenju la tuba kaba mata nunjuya na pareta-na i MIRI lai Muha.

³²La malamiri njàpu hàla-nanyaka na paràma ba wuluya na Maüna i MIRI. Da tau Ihirailu da tutu hàla-maya hama tuna na pareta-na i MIRI lai Muha.

³³Nyuda dangàndinya i Muha na Maü dàngu mbu ndàbana na pa-pamàtu wàna, da ketuna, da ai boruna, da punduku dàngu latada,

³⁴na ndàbi manula kamàmbi bumbu na pandongu, na ndàbi manula malijangu, na tera pandàdangu.

³⁵Na Pàti Pa-ràndingu na ma-ihingu watu da madàmbu-da dàngu da ai duku dàngu na ndàbina,

³⁶na menja dàngu mbuu ndàbada da pamàtu wàna dàngu da roti mangejingu,

³⁷na tandai palita àmahu rara ihi mbàngina, da palita dàngu mbuu ndàbada da pamàtu wàda, mina nduma palita,

³⁸na ngia pawotu maraku àmahu rara, mina lii, dupa mbii kati, na tera dimba pindu Maü,

³⁹na ngia pawotu maraku wudu dàngu na lulu wudu pa-jilungu, da ai duku dàngu mbuu ndàbada da pamàtu wàna; na karaba ngia pabaha dàngu na latana,

⁴⁰da liru ndumana na talora dàngu da punduku dàngu latada, na tera dimba pindu bokulu-na na talora lupa da liku, da kandutuku Maü; mbuu ndàbada da kanaingu da pawàngu daa la Maü,

⁴¹dàngu da paki pa-lumungu wàngu ndumada da ratu jàka rehi paloku-da la Rowa Matua dàngu da paki pa-panuda-nja i Harungu dàngu da anana.

⁴²Na tau Ihirailu nanunju hàla-maya na paràma hama tuna na pareta-na i MIRI lai Muha.

⁴³I Muha na-pareha hàla-maha hi naita-ya ba mbàda ràma-danyaka ba jia pawingungu-ma hama tuna na pareta-na i MIRI. Ka pakanyuru-nanjaka paraïna i Muha.