Read Kambera LUHU 40 Bible Online

LUHU 40 - Kambera bible

LUHU 40

¹I MIRI napanii-nya i Muha,

²“Pahada-nyawa na Maünggu la kawunga lodu kawunga wulangu.

³Patama-nya daa na Pàti Pa-ràndingu, pangia-da da Hakambulu Pareta, dàngu hakalu-nya na tera dimbaku la hanggana.

⁴Tuya lai nu na menja dàngu da pamàtu wàna. Patama-mbunya na tandai palita dàngu pakehi-nja da palita-na.

⁵Bànjalu-ya na ngia pawotu maraku àmahu rara na ngia patunu dupa la hangga Pàti Pa-ràndingu, dàngu tiwalu-nya na tera dimbaku la pindu Maü.

⁶Tuya na ngia pawotu maraku nduma kameti maraku patunu la hangga pindu Maü.

⁷Tuya na karaba wai la manggawa Maü dàngu na ngia pawotu maraku, hàla paihi-nya wai.

⁸Tunaka nu wàlahu-ha da liru weli winggiru-nya na talora-na na Maü dàngu tiwalu-nya na tera dimbaku pindu bokulu talora.

⁹Tunaka nu na Maü dàngu mbuu ndàbana na pamàtu wàna lupangu-ma kau maraku wànya lai Nyungga bau wàngu pa-pamina wànya mina lii, nu mbuu ndàbada pa-panudangu-haka lai Nyungga.

¹⁰Maraku wànyawa na ngia pawotu maraku dàngu mbuu ndàbana na pamàtu wàna, bau wànya na matuna nu, ka panuda-ngganya Nyungga nggubulu-na.

¹¹Tumunya numai na karaba wai dàngu na latana.

¹²Hàlaka nu, paràha-nya i Harungu dàngu da anana ka da-hurungu la pindu Maü dàngu ka dabaha wikida.

¹³Panggàna-nya da paki ratuna i Harungu, dàngu kau pamina-nya ka peku panuda-ngganya la palumu-ngga Nyungga ba ratuya.

¹⁴Hàla kau paràha-nja da anana ka da-hurungu pa-mareni dàngu kau panggàna-nja kamenja nyuda.

¹⁵Hàla kau pamina-nja hama tuna bau pamina-nya na amada, ka peku lumu-dangga Nyungga ba ratuha. Wànya na lii pa-minangu nuna, na kabihu-da nyuda lundu wàla wuada, jia-haka da makata-nya na waingaba ratu,” wàna.

¹⁶I Muha nalaku hàla-manya hama tuna na pareta pawua-na i MIRI.

¹⁷La kawunga lodu kawunga wulangu, la ndaungu padàmbu wàna ba da-dunjaku-nyaka na Mehiru paraï da tau Ihirailu, pandàngi-danyaka na Maüna i MIRI.

¹⁸I Muha na-bànjalu-ha da latana, na-pahada-nja da karangga-na, natuha da ai borungu-na dàngu hi na-pandolaku-ha da punduku-na.

¹⁹Hàlaka wàlahu-nanyaka na toku ndiduna na Maü ba na-pandàbi-nya dita la hambeli-na hama tuna na pareta-na i MIRI.

²⁰Tunaka nu hi na-patama-nja da watu da madàmbu-da daa la Pàti Pa-ràndingu. Hàla i Muha hi natuya na ndàbi pàti, hi napahau-nja da ai duku daa la karana.

²¹Hàla hi na-bànjalu-ya nuna na pàti daa la Maü dàngu hi na-tiwalu-nya na tera dimbaku la hanggana, hama tuna na pareta-na i MIRI lai nyuna.

²²Tunaka nu i Muha hi na-bànjalu-ya na menja daa la Maü, la mbara dia la hambeli tera,

²³hàla la pinu menja na-bànjalu-ha da roti mangejingu, hama tuna na pareta pawua-na i MIRI lai Muha.

²⁴Na tandai palita na-bànjalu-ya daa la Maü, la mbara luru da-papapangu dàngu na menja,

²⁵hàla, hi paroka-ha da palita la hanggana i MIRI.

²⁶Na ngia pawotu maraku àmahu rara na-bànjalu-ya daa la Maü la hangga tera dimbaku,

²⁷hàla tunu-nanyaka dupa mbii kati hama tuna na pareta pawua-na i MIRI lai Muha.

²⁸I Muha na-tiwalu-nya na tera pindu Maü,

²⁹dàngu la hanggana na pindu natuya na ngia pawotu maraku nduma kameti maraku patunu. La pinu ngia pawotu maraku nuna na wotu hunggu maraku patunu dàngu hunggu pa-mangejingu.

³⁰Na karaba wudu natuya la manggawa Maü dàngu ngia pawotu maraku, hàla hi na-paihi-nya wai.

³¹I Muha, i Harungu dàngu da anana dabaha wihi dàngu limada lai nu,

³²handàka tama - handàka tamada la Maüna i MIRI dàngu jàka dalihi-nya na ngia pawotu maraku.

³³La winggiru-na na Maü dàngu na ngia pawotu maraku nyuna i Muha na-wàlahu-nya liru dàngu hi na-tiwalu-nya tera na pindu bokulu talora. Ka lundungu hàla-duna-nyaka nuna na paràma.

³⁴Tunaka nu puru-nanyaka na karumangu hi na-panggàbalu-nya na Maüna i MIRI, tàka na Maü hi na-hulungu wàngu handaraku ba ninya i MIRI.

³⁵Jia-duyaka hi nda peku tamana nu la Maü i Muha.

³⁶Handàka dita - handàka dita-naka na karumangu welingu la Maüna i MIRI, nyànggaru-danyaka na ngia pa-pamaüngu-da na banjaru Ihirailu hi da-lelingu la hau pangia.

³⁷Tàka jàka ndedi nadita na karumangu, nda jia hadangu-ada welingu lai nu.

³⁸Nu ba mandai tuna nu ba na-njadangu na banjaru Ihirailu, nimanya duna i MIRI ba na-pahada karumangu la lodu dàngu ba na-pahada epingu la rudungu.