Read Kambera LUHU 5 Bible Online

LUHU 5 - Kambera bible

LUHU 5

¹Tunaka nu i Muha dàngu i Harungu lua-danyaka pa-hurungu la hanggana na hanganji Mehiru, hi dapanii, “Patàka-nya wànanggau i MIRI, Ala Ihirailu, ‘Pulinya na banjaru-nggu palaku, ka peku lumu-dangga la maràda telangu,’ wànanggau,” wàdanya.

²Hi na-paàrangu na hanganji, “Nggamu-yaka nu na MIRI? Nggikina hi kutundu-manyaka bàdi la papuli-nya na banjaru Ihirailu? Nda kutanda-aya duku na MIRI nuna, dàngu na tau Ihirailu nda kupuli-anya duku palaku,” wàna.

³Napaha i Muha dàngu i Harungu, “Na Ala tau Imbarani na-paitangu-ka wikina lai nyuma. Puli-nggama ka malaku la maràda telangu, pa-lakungu tailu mbua lodu-aya, ka mangàndi-nya maraku i MIRI, na Alama. Jàka nda ma-palaku-ya nuna napa na-pameti wànggama panyaki jàka ndia pabera,” wàdanya.

⁴Napaya na hanganji lai Muha dàngu i Harungu, “Nggikina nyimi hi paamba-ya na tau la paràma? Paràha-nja nuda da ata ka daràma!

⁵Da tau nuda lalu mbana dangu-daka. Tàka nàhu na pambuha-mi nyimi ka da-pànjangu paràma! wàmi,” wànanja.

⁶La lodu nunama da tau Mehiru matanggu hamata dàngu da manduru tau Ihirailu da-ngalangu pareta welingu la hanganji,

⁷“Àmbi hili wua-dunjapa rembi da tau Ihirailu pa-pandoi wàda watu rara. Màta ka dahimbu wikika duda.

⁸Tàka paràha-manja ka da-pandoi watu rara àmbu da-kurangu-du na danguda welingu la wungana. Mbuhangu-danya paràma pa-mayòlurungu-ma-a nyuda; jia-duyaka hi da-kambunguku mànu ka pulinja palaku la pawotu-nya kameti maraku na Alada nyuda.

⁹Hàni-maha da tau nuda ka darihi pa-mbangatungu paràma, ka da-nutakungu ningu paràma dàngu ka àmbu ningu manggawangu-da pa-patingi ninya na kareuku kakòlulu,” wànanja.

¹⁰Ka luhu-danyaka duda da tau Mehiru da ma-hamata paràma dàngu da manduru tau Ihirailu, hi dapeka-nya na tau Ihirailu, “Na pareta-na na hanganji, nyimi nda pa-wuangu-akaipa rembi.

¹¹Màta kai himbu wiki-mika dimi la nggi - nggini, na nyuna namu-maya, da watu rara pa-pandoi-mi àmbu da-kurangu-du welingu la wungana,” wàdanja.

¹²Ka laku-kida-nyaka duda da tau Ihirailu, ba danjada-nya la nggubulu tana Mehiru la pa-pauhingu rembi.

¹³Da tau ma-hamata da-dàhiku-ha padua, ka da-ngalangu watu rara nimbihu lodu hama dangu-mada hama tuna ba wàngu pa-wuanja rembi.

¹⁴Da ma-hamata dapalu-ha da manduru Ihirailu da matanggu tanara-ha da paràma. Da-kandàharu-ha, “Nggiki-daka nàhu da angumi hi nda dahili ngalangu-pa watu rara hama tuna la kawunga-na?” wàdanja.

¹⁵Ka lua-danyaka da manduru Ihirailu papeka handuka-da la hanganji, “Nggikina Tamu Umbu hi tumu-nggama nu nyuma?

¹⁶Nyuma nda pawua-nggama rembi, tàka hi hàni bia-kama pa-pandoi watu rara! Nàhu nyuma da palu-kamaka, tàka làti duna da panggawi-mu nyumuma tamu umbu da manjala!” wàdanya.

¹⁷Nahema na hanganji, “Ba nyimima ma-mayòluru dàngu ba ndai bihu paràma. Jia-mayaka nu hi mikarai-ka nyungga kai laku pawotu-nya ka meti maraku na MIRI-mi.

¹⁸Lakuwa kai ràma. Rembi nda pawua-anggai, na nyuna dàingu-mana kai pandoi watu rara hama danguda la wungana,” wànanja.

¹⁹Da manduru dapàda-nyaka nyuda ba harui-danyaka, ba panii-njaka da tau Ihirailu ka da-ngalangu-ma bàdi watu rara hama danguda hama tuna la kawunga-na.

²⁰Ba daluhu-ka welingu la uma hanganji, hàmburu-danyaka i Muha dangu i Harungu da ma-patia-nja nyuda.

²¹Ka panii-danyaka da manduru, “Napinya i MIRI na pa-patumbu-mi! Napa Nyuna ka nahuku-nggai! Nyimi-maka màngu rukungu hi na-karaü-nggama eti na hanganji dàngu da panggawi-na, ka pameti-ha ba wàda-nggama,” wàdanja.

²²Ka lua-nanyaka i Muha pa-tangara-ya i MIRI hi napanii, “Dou MIRI, nggikina hi tika patumu-nya nu na tau Ihirailu bau pahunggu-nya ma-hanggàri? Nggikina hiu palewa-ka nyungga lai yiahu?

²³Kandai hurungunggu la hanganji dàngu ba kupanii-nya la tamumu Nyumu, pakiringu-ma-ana-nyaka la pa-mayila-ya na banjaru yiana. Tàka Nyumu nda ana nggàra wàmuma la pandula-ha nyuda,” wàna.

²⁴Ka panii-nanyaka i MIRI lai Muha, “Nàhu nyumu napa kau itaka jàka nggikina ba kuhada ngàndiya na hanganji. Nyuna napa ku-runggatu-ya la pa-pahàla-ya na banjaru-nggu. Langatàka, napa ku-runggatu-ya ka nawàngga-ha welingu la tana yiana,” wàna.