Read Kambera LUHU 8 Bible Online

LUHU 8 - Kambera bible

LUHU 8

¹Ka panii-nanyaka i MIRI lai Muha, “Luawa kau hurungu la hanganji dàngu kau patàka-nya yiana na pulunggu, ‘Pulinya na banjaru-nggu ka nalaku palumu-ngga.

²Jàkau tebuku-ya, napa kupinu wànya kapaki yiana na tana ba jiaya na hukungu.

³Na Luku Nilu napa nambinu wàngu kapaki, hi lupa daluhu welingu la wai dàngu hi datama la uma, la kurungu ngia pa-katuda-mu, dàngu la uma tau ma-katangu paràma-mu hamanai la rayatu, lupa daa la ngia patunu roti dàngu la kanai pangamu.

⁴Da kapaki nuda napa da-kapunduhu hi da-kadàki lai nyumu, la mbuu ndàba na maningu wai ngabada dàngu la rayatu,’ wàmunya,” wànanya.

⁵I MIRI napanii-nya i Muha, “Paràha-nya i Harungu ka na-jakaru-nya na tokungu-na la pinuda da luku, da londa, da ramuku ka daluhu da kapaki ka dapinu-ya na tana Mehiru,” wànanya.

⁶Ka jakaru-duna-nyaka na tokungu-na i Harungu hu dita la pinu wai mbuu ndàbada, ka luhu-danyaka da kapaki hi dapinu-ya nggubulu-na na tana.

⁷Tàka da tau da mapingu kabeli mata, datumai duda ma-hamangu, hi daluhu da kapaki lai nu la tana nuna.

⁸Na hanganji napaau-nja i Muha dàngu i Harungu, napanii-nja, “Hamayangu àru lai MIRI ka na-pamuna-nja yiada da kapaki, napa kupuli-manya duku na banjaru-mu palaku ka dawotu-nya kameti maraku i MIRI,” wàna.

⁹Nahema i Muha, “Ku-mbuhangu-ma duku pa-hamaya-nggau ndumamu Miri. Peka bia rehi, napa ku-hamaya-manggau duku ndumamu nyumu, ndumada da maningu wai ngabada, ndumana na rayatu. Napa mumara-ma Miri welingu la kapaki, dàngu nda hilu ningu-apa hupuda, hinggilu-na la Luku Nilu,” wànanya.

¹⁰Nahema na hanganji, “Hamaya àrungga ndumanggu haromu,” wàna. Napaya i Muha, “Napa kuwunda-maya duku na pakarai-mu Miri. Ka pi wadumu-nyaka Miri, ba nda ningu hili hau Ala hama tuna i MIRI, na Alama nyuma.

¹¹Napa Nyuna na-pamara-kau Miri dàngu da maningu wai ngabada lupa na rayatu welingu la kapaki. Nda ningu-apa kapaki la uma - uma, hinggilu-na la Luku Nilu,” wàna.

¹²Hàla i Muha dàngu i Harungu damàta-nya na hanganji. Ka hamayangu-nanyaka i Muha lai MIRI, ka na-pamuna àrunja da kapaki da pa-patàka-nanya na hanganji.

¹³I MIRI nahema hàmuya na pakarai-na i Muha, handàka meti-maada da kapaki la uma, la talora dàngu la woka.

¹⁴Da tau Mehiru da-pauhi-nja da meti kapaki ba dapabu - bundungu, hi lupa kanjupu wauya la nggubulu-na nuna na tana.

¹⁵Tàka ba naita-ha metida da kapaki paraïna hanganji, hilu malihu beli-nanyai na katiku-na. Dàngu hama tuna ba mbàda wàna i MIRI, nyuna na hanganji nda na-wàrihu-ayapa na papanii-da i Muha dàngu i Harungu.

¹⁶I MIRI napanii-nya i Muha, “Paràha-nya i Harungu ka napalu-ya na tana wàngu tokungu-na, napa na kumburu tana la tana Mehiru nggubulu-na na-pambeli-ya kalomuhu,” wànanya.

¹⁷Ka palu-nanyaka na tana i Harungu wàngu tokungu-na, tàka na kumburu tanaka la Mehiru na-pambeli-ya kalomuhu, na ma-karunggi-ya na tau dàngu na banda.

¹⁸Da mapingu kabeli mata da-kamangu pawàngu kabeli matada pa-patumbu ma-hamangu, tàka nda da-ngalangu. La nggi - nggini ningu kalomuhu,

¹⁹hi lupa dapanii la hanganji da mapingu kabeli mata, “Yiana paruku-na i Alaya,” wàdanya. Tàka nyuna na hanganji jiapa-maya na malihu katiku-na, dàngu hama tuna ba mbàda wàna i MIRI, nyuna na hanganji nda na-wàrihu-aya na papanii-da i Muha dàngu i Harungu.

²⁰I MIRI napanii-nya i Muha, “Lua hada rudungu-ma kau tomanya na hanganji la rehi puruna la luku, dàngu kau patàka-nya na pulunggu yiana, ‘Pulinya na banjaru-nggu ka dalaku palumu-ngga Nyungga.

²¹Tàka jàkau tebuku-ya, napa Nyungga ku-patàka-nggaunja da kapelatu lai nyumu, la tau maningu wai ngabana dàngu na rayatu. Da uma tau Mehiru, dàngu nggubulu-na nuna na tana napa nambinu wàngu kapelatu.

²²Na nyuna napa Nyungga ku-pahinggilu-ya la ngabana la Nggohingu, na ngia pa-ngiangu-na na banjaru-nggu. Lai nu nda ningua kapelatu, màta kai pinya Nyungga ba MIRI-ka, na maruku-nya nuna mbuu ndàbana.

²³Napa Nyungga kutuya na pa-hekangu wàna,[8] na banjaru-nggu Nyungga dàngu na rayatu-mu nyumu. Nuna na pa-hangàtarungu haromu-maaka natumbu wàmunya,’ ” wànanya.

²⁴Ka patàka-nanjaka da kapelatu i MIRI, ma-kanjupu danguya la uma hanganji dàngu la umada da maningu wai ngabada. La tana Mehiru nggubulu-na naita ura dedina na tau rukuda da kapelatu.

²⁵Tunaka nu na hanganji hi napaau-nja i Muha dàngu i Harungu, hi napanii-nja, “Iluawa nu kai wotunya kameti maraku na Alami, na nyuna la tana yiahu-a,” wànanja.

²⁶“Rihingu hàmu ka màtangu,” hi wàna i Muha, “nadu da tau Mehiru napa da kudu eti wànya, jàka daita-ha da pa-maraku wàma, nda da-màtangu-apa la pa-nàhaku-nggama watu lupa mameti.

²⁷Malaku la maràda telangu-ma bàdi nyuma, pa-lakungu tailu mbua lodu-aya marauna la pawotu-nya kameti maraku i MIRI Alama, hama tuna na pareta na pawua-nanggama,” wànanya.

²⁸Napaya na hanganji, “Hàmu, kupuli-nggai palaku la maràda telangu la pawotu-nya kameti maraku i MIRI, Alami, mili àmbi laku marau. Namuya, hamaya-ngga dumanggu!” wàna.

²⁹Nahema i Muha, “Jàka kulaku-ka, kulu hamaya-manggau duku ndumamu lai MIRI, ka pekuna haromu da kapelatu ka da-yilangu welingu lai nyumu Miri, dàngu da maningu wai ngabada dàngu na rayatu. Na nyuna àmbu hili panyonga-kama, dàngu àmbu pabeta-nya na banjaru Ihirailu palaku la pawotu-nya kameti maraku i MIRI,” wàna.

³⁰I Muha na-dunjaku-nya na hanganji, hi na hamayangu lai MIRI,

³¹tàka i MIRI na-kataku-ya na hamayangu-na i Muha. Da kapelatu dahawu - wurungu ba da-yilangu welingu la hanganji, la maningu wai ngabana dàngu la rayatu. Nda hili ningu heu ma-ndàdiku.

³²Tàka la handàka-na yiana jia-mayai na hanganji ba na-malihu katiku-na dàngu ba nda napuli-nya na banjaru Ihirailu palaku.