Read Kambera LUHU 9 Bible Online

LUHU 9 - Kambera bible

LUHU 9

¹I MIRI napanii-nya i Muha, “Luawa kau hurungu la hanganji, kau paniinya, ba napanii i MIRI, na Ala tau Imbarani, ‘Pulinya na banjaru-nggu ka nalaku ka peku lumu-dangga lai nàhu.

²Jàka ndau pulinja,

³napa Nyungga ku-patàka-nja panyaki pa-nggàbalungu mbuu ndàbada da bandamu la maràda, njara, kalandai, ota, hapi, mbimbi dàngu kamàmbi-mu.

⁴Napa Nyungga kuheka-nja da banda tau Ihirailu dàngu da banda tau Mehiru. Welingu la banda tau Ihirailu nda ningua heu mameti.

⁵Nyungga, MIRI, padai-manggunya haromu ba jia-yaka na rehi pahara-nggunya nuna,’ wàna,” wàmunya.

⁶Hadangu harii wunda-nanyaka i MIRI hama tuna ba mbàda wàna. Da banda tau Mehiru dameti hàla, tàka da banda tau Ihirailu nda ningu heu mameti.

⁷Na hanganji na-paàrangu jàka nggàraya na madedi hi napanii-nya tau, welingu la banda tau Ihirailu ba nda ningu ana heu mameti. Ba tuna nyuna na hanganji jia-maya na-malihu katiku-na, nda napuli-anya na banjaru Ihirailu palaku.

⁸I MIRI napanii-nja i Muha dàngu i Harungu, “Piti aü pi - pira wunggungu welingu la raü. La hanggana na hanganji màta i Muha ka na-hàbaru-nya nuna na aü la awangu.

⁹Napa nuna na aü na-tanyalangu la tana Mehiru nggubulu-na. Napa la tau dàngu la banda tumbu-danyaka da manggàri da mambera lupa da-manua hi dawitu,” wàna.

¹⁰Tunaka nu i Muha dàngu i Harungu hi daupu aü hi da-hurungu la hanganji. I Muha na-hàbaru-nya na aü la awangu. Ka tumbu-danyaka da manggàri la tau dàngu la banda da mambera hi da-manua hi dawitu.

¹¹Da tau mapingu kabeli mata nda dapeku-apa la pa-hurungu lai Muha, nadu ba mbinu wàngu-danyaka manggàri la ihida hama tuna na tau Mehiru hawiangu.

¹²Na nyuna i MIRI pa-malihu-mananya na katiku-na na hanganji, dàngu hama tuna ba mbàda wàna i MIRI, na hanganji nda nabihu-ma pa-wàrihu-ha da paniida i Muha dàngu i Harungu.

¹³I MIRI napanii-nya i Muha, “Luawa la mbaru hada rudungu kau hurungu la hanganji dàngu kau patàka-nya, ba napanii i MIRI, na Ala tau Imbarani, napeka-nggau, ‘Pulinya na banjaru-nggu ka peku lakuda palumu-ngga.

¹⁴La handàka-na nàhu patàka-nggunyaka na ura pàda nda mbulungu biana da mapawai ngaba, dàngu na rayatu, tàka lai nyumu wikima, ka peku pimunya Nyungga ba nda ningu menjanggu la pa-nggubulu awangu.

¹⁵Làti jàka ku-mbuhangu pahuku-wànggai nyumu dàngu na rayatu-mu, jiangu-maka ba mbàda mbuta ndàba-mika.

¹⁶Ba tuna ku-pahia bianggai paluri, ka peku pajiliku-nggunya na mbihanggu lai nyumu, hi na-kawulangu wàngu na tamunggu la pa-nggubulu awangu.

¹⁷Jiapa ba tuna nu, nyumu jia-mayapa na jangga etimu dàngu ba ndau bihu papuli-nya na banjaru-nggu palaku.

¹⁸Haromu la mbaru, ba tuna ni na lodu, napa patàka-nggunyaka na ura watu mboka na manda ngerina, na mandedi ningu hamangu matumbu la tana Mehiru piti weli àmangu lundu nàhu.

¹⁹Màla wuangu-wa pareta, mbuu ndàbada da banda dàngu da mangu-mika da maninja la hambeli ka patama-nja la pangia ma-mambiru. Mbuu ndàbada da tau dàngu da banda da maninja la hambeli da manda ningu ngia pamaü-da napa dameti,’ ” wàna.

²⁰Ninja ba tau mapira-ya da maningu wai ngabada, da-mangàdatu-nya na puluna i MIRI. Da ngàndiha da atada dàngu da bandada la uma ka damaü ba wàda.

²¹Tàka hawiangu nda da-wàhiru-aya nuna na papanii-na i MIRI, hi damàta-nja da atada dàngu da banda la maràda.

²²Ka panii-nanyaka i MIRI lai Muha, “Jakaru-nya na limamu hu dita, napa ka napuru na ura watu mboka la tana Mehiru nggubulu-na. Napa nuna na urangu na-pinjalungu tau, banda dàngu na matumbu - matumbu-ka la woka,” wàna.

²³I Muha na-jakaru-nya na tokungu-na hu dita, nu ka papuru-nanyaka paraïna i MIRI na kanduruku dàngu na ura watu mboka, dàngu na kabàla na ma-nàhaku-ya na pinu tana. I MIRI na-patàka-nya

²⁴na ura watu mboka na manda ngerina pa-kariangu kabàla na mahe - herina. Nuna-duyaka na ura watu mboka na ma-kanjupu nda ngerina, na mandedi handàkangu patuna nu la tana Mehiru weli nungu.

²⁵La nggubulu-na nuna na tana na ura watu mboka na-palàjaru hàlaha da maninja la woka, hamanai da tau dàngu da banda. Mbuu ndàbada da matumbu la woka dàngu da pingi aimbu na-panjoru hàlaha.

²⁶Mbulungu la ngabana la Nggohingu-a, la ngia pa-ngiangu-da da tau Ihirailu, na pànda pinjalu ura watu mboka.

²⁷Na hanganji napaau-nja i Muha dàngu i Harungu, hi napanii, “Njala-manggu-nyaka nyungga, i MIRI duna na ma-deningu, nyungga dàngu na rayatu-nggu mbàda wunda-maka manjala.

²⁸Hamayangu àru lai MIRI; toma hàmu-mana-nyaka na mayila-ma, rukuna na kabàla dàngu na ura watu mboka. Puli-manggu-nggaika duku palaku. Àmbi hilu pa-engangu-dupa lai yiahu,” wànanja.

²⁹Napaya i Muha la hanganji, “Tiangu jàka kutàka-ka la hambeli paraingu, napa kuluma wulaku-ha da limanggu la pa-hamayangu lai MIRI. Napa na-pànjangu na kanduruku dàngu na-malàna na ura watu mboka, ka peku pimunya nyumu Miri yiana na pinu tana ba manguna i MIRI-ya.

³⁰Na nyuna kupi-manggau nyumu Miri dàngu da maningu wai ngabada ba ndedi-mapa mi-mangàdatu-nya i MIRI Ala,” wànanya.

³¹Da pingi rami dàngu kamànggihu dambuta, nadu da rami ba talànga wàlada dàngu da kamànggihu talànga wilida.

³²Tàka da uhu dàngu da ma-pakarohungu nda daruha-a, ba ndedi jiaya na wulada.

³³Nyuna i Muha namàta-nya na hanganji, hi nalaku la hambeli paraingu; lai nu hi na-wulaku-ha da limana ba na-hamayangu lai MIRI. La rehina nunama pànjangu-nanyaka na kanduruku, na ura watu mboka dàngu na urangu.

³⁴Tàka na hanganji ba naita-yaka na matuna nu, hilu njala-nanyai. Nyuna dàngu da maningu wai ngabada pa-daingu malihu katiku-da.

³⁵Hama tuna ba mbàda wàna i MIRI la ngaruna i Muha, na hanganji nda nabihu-ma papuli-nja palaku da tau Ihirailu.