Read Kambera NA MBUKUNA I AYUPU 1 Bible Online

NA MBUKUNA I AYUPU 1 - Kambera bible

NA MBUKUNA I AYUPU 1

¹La tana Uhu[1] ninya na haàtu na tau mini ma-tamungu i Ayupu. Nyuna na-marubuku-nya i Ala dàngu na-tuturu-nya. Nyuna tau hàmu huriya dàngu nda ana wunda-mana ma-akatu.

²Da pihu da anana mini dàngu da tailu da anana kawini.

³La hambeli-da nu dadangu-mai da tau pa-palewa-na, 7.000-da da mbimbina, 3.000-da da ota, 1.000-da da hapi, dàngu 500-da da kalandai. Na kababa-na, nyuna marihi wuluya la honga tau ma-ngiangu la pahunga lodu.

⁴Da mapihu da anana mini i Ayupu dakàli mbabu la umada haàtu - haàtu ba dapahi - hilungu. La mbabuda nu dadunda-mbunja datailu da anana kawini i Ayupu, hi da-maràngga ngangu ngunungu.

⁵Jàka nanjàpu-ka na hau na mbabu, nakàli hada mbarungu i Ayupu hi nawotu hunggu maraku ndumada da anana haàtu - haàtu ka peku jàma-nanja paraïna i MIRI. Ba nakaka-ya i Ayupu hi era ningu bia njala pambàda wundada dàngu hi da-pawawa-ya i Ala la panda pida.

⁶La hau na lodu da-hurungu lai MIRI da tau awangu,[2] dàngu i Pa-kamangu[3] nimbunya la hongada.

⁷Na-paàra-nya paraïna i MIRI, “Nggi welimu nyumu?” wànanya. Nanapa-ya i Pa-kamangu, “Hina-ma-apa kuwena winggirungu dàngu kunjada hàlanya na pinu tanaka,” wàna.

⁸Hi nahili paàra-nya paraïna i MIRI, “Màla nu mbàda hamata-munyaka na atanggu i Ayupu? La ihi pinu tanaka nda ningua tau mahama-nya pa-tuturu dàngu pahàmu eti nyuna. Nyuna na-maraku-ngga dàngu nda ana nggàrama pawunda-na manjala,” wàna.

⁹Tàka nahema i Pa-kamangu, “Ràka-mana duna ba na-maraku-nggau i Ayupu, maa ba na-ngalangu-du himbalu-na na pawunda-na.

¹⁰Nyuna, da ihi umana dàngu da pawulu-naka mbuu ndàbada bau mangga mànu-dunja. Upa-maringu-ya na paràma-na dàngu uwua padanya banda hi ràka mbinuna na tana.

¹¹Tàka jàka era piti-munja da pawulu-naka mbuu ndàbada, lupangu-ma naràtu-nggau la hanggamu!” wàna.

¹²Na-kataku-ya i MIRI, “Hàmu, palaku biaya na pambuha-mu la pawulu-na i Ayupu, mili àmbu pahidu-duya nyuna!” wàna ba nahema-ya i Pa-kamangu. Ka laku-nanyaka i Pa-kamangu welingu la hanggana i MIRI.

¹³Ndedi nggi mandaina la malamiri-na mbabu pàku-adanya da anana i Ayupu la umana na aya matua-da.

¹⁴Hi jia nàmu bianya na haàtu na tau pa-palewa ba napalai la umana i Ayupu, “Umbu, da tau Heimba[4] damaika patuu kama ba talànga lukuda da hapi la woka dàngu ba talànga nganguda rumba da kalandai la lihida. Daramba-njaka nuda da banda, hi da-pameti-ha da atamu da maninja lai nu. Didi-maaka nyungga yia mamara hi kumai pa-lapuru lai nyumu umbu,” wàna ba na-lapuru.

¹⁶Ba talànga kareuku-napa nu, hili nàmunyai na ata padua wàna, “Da mbimbimu umbu dàngu da ma-pawangu-ka mbuu ndàbada mbàda hariku-nanjaka kabàla hi dameti hàla. Didi-maaka nyungga yia mamara hi kumai pa-lapuru lai nyumu umbu,” wàna.

¹⁷Ndedia nanjàpu na kareuku-na, tàka-nanyai na ata patailu wàna ba namai papanii, “Tailu banjaru-ha da tau rambangu welingu la Kàhandimu[5] da maramba-nja da otamu umbu dàngu hi da-pameti-ha da ata-muka. Didi-maaka nyungga yia mamara hi kumai pa-lapuru lai nyumu umbu,” wàna.

¹⁸Ba talànga panii-inapa nu, nàmunyai na ata haàtui na mangàndi pulungu, “Da ana-muka umbu talànga mbabu pàku-ada la umana na anamu na ma-maaya dehi.

¹⁹Hi jia tungu biana na ngilu mbangatu welingu la maràda telangu hi na-làndahu-nya nuna na uma hi lupa nanjoru hi na-pameti mbutaha da ana-muka umbu. Didi-maaka nyungga yia mamara hi peku mainggu pa-lapuru lai nyumu umbu,” wàna.

²⁰Ka ndolaku-nanyaka i Ayupu hi nahira-ha da pakina tanda handuka etina. Na-kikiru-ya na katiku-na, hi na-marubuku,

²¹“Ba na-paana-ngga na inanggu nda nggàra-a maningu-ngga, dàngu ba kumeti-mbu napa nda ngga - nggàrambui pangàndi-nggu. I MIRI-ma na mawuangu-ha dàngu i MIRI-mai na mapiti-ha. Pawotungu-ya na tamuna!” wàna ba napanii.

²²Jia ba tuna, jiapa-kai ba nangala-nja nuda da handuka mbuu ndàbada nyuna i Ayupu, nda nawunda-a manjala dàngu nda na-panjala-aya i Ala.