Read Kambera NA MBUKUNA I AYUPU 10 Bible Online

NA MBUKUNA I AYUPU 10 - Kambera bible

NA MBUKUNA I AYUPU 10

¹Hoda-nggunyaka dàngu kulabu-nya eti na luringgu, hi kuràba-ya na ura milana na ndewanggu.

²Dou Ala, àmbu panjala àru-kika; kaloka-ngganya jàka nggikina hiu rawaku-ka.

³Nggàraya na utumu ba tuna yia na kapidihu-mungga, dàngu jàkau wàrunya na ruku lima wikimu? Nggàraya na utumu jàkau ndulaya na pawuku dàngu na pauna-na na tau akatu?

⁴Na kanandingu-mu nda na-pahama-a dàngu kanandingu tau

⁵dàngu na malai lurimu ba nda hama dànggitu-ana na malai luri tau.

⁶Jàka tuna nu, ka nggikina hiu kanuturu-ha da njalanggu mbutada? Ka nggikina hiu ndutuha da nja - njalanggu-ka?

⁷Làti duna upiimanya dàngu upàda-manya, ba nda kunjala-a, tàka ku-mànangu. Hamanai ba nda haàtu-mbu tau mamàka pa-pahàla-ka welingu la limamu.

⁸Nyungga yia pawulu-mungga ka nggikina nàhu[21] hi pa-tàlaru-munggai?

⁹Ngàdaya ba welingu la tana wurungu[22] bau wuluka! Nggiki hamana hiu pa-kumburu tana belika?

¹⁰Upulinya na amanggu pa-patumbu-ka hiu pa-bokulu-ka la kambu inanggu.

¹¹Na ihinggu utuunya riina dàngu kalotu-na; da riinggu utuunja toluda dàngu manula kamburu-da.

¹²Upaluri-ka; umbuha-ngga, na luringgu umangga wànya kabubulu-munya.

¹³Tàka nàhu pi-nggunyaka ba mbàda, kaka kangunduhu bia-munya na hanggàmaru-nggu la rehina nu.

¹⁴Uhamata-ka hi kuwunda lia manjala ka peku nda wuangu-mu jàmangu njala.

¹⁵Jàka kuwunda manjala, kanjupu ura dedika! Tàka jàka nda ningu nyurana na pawunda-nggu, daingu biana ba panjala-ka! Nda kutoru mbeni pa-pawula, paraï pa-hawina dàngu papàda-nya na pawawa.[23]

¹⁶Jàka ku-ngalangu ihi paraïnggu, jiapa ka nda pira-ana, hama tuna hinga ma-payaulu-kau bau yaulu-ka. Hiu paita belinya na kuwaha-mu, ka pa-mangàdatu-ka nyunggama-a.

¹⁷Utuu mànungga hakahii la parawaku-ka nyungga; hi na-bonjangu pa-bokulu na hàngga-mungga. Upauhi-nja da tanatara - tanatara bidi la pa-kaluluku dàngu la pabera-ka.

¹⁸Ka nggikina hiu puli biangga padedi la pinu tana? Narihi hàmupa ka kumeti làti ba ndedipa naita-ka tau!

¹⁹Hi hama tuna nda pa-paanangu-ka, nadu ba ailulu taningga welingu la kambu.

²⁰Ai, nda namandai-apa na metinggu, puli meha-nggawa, ka peku pàda-kinggunya na hàmuna na rehi luringgu yia na mani-inyapa.

²¹Nda namandai-apa ba kulaku nda kabeli, ku-hanggangu paraingu ma-kapàta wuru wila,

²²na parai kapàtangu, ma-kapàta mitingu dàngu ma-panggibu-nggabungu, na hambila dàngu na kapàtangu ba hama biana lai nu,” wàna.