Read Kambera NA MBUKUNA I AYUPU 13 Bible Online

NA MBUKUNA I AYUPU 13 - Kambera bible

NA MBUKUNA I AYUPU 13

¹Mbuu ndàbada nuda ita wiki-manggu-njaka, dàngu kupii hàmu-manja.

²Nggàraya na papimi, kupi-mbunya; àmbi kaka-duya ba kukàku-nggai.

³Tàka nyungga duku ku-mbuhangu pa-pabanjaru dànya i Hupu Mambiha; ku-rinjungu pa-kahiri wikinggu la hanggana.

⁴Nadu bai pahini wànya kambàliku na ndubami, nda na-pahilitu-a dàngu da ndotiru kabàli.

⁵Jàka ndai pa-banjarungu làti, tau manggàna-ha wànggu bianggai.

⁶Kai patingi-nyawa na panjala-nggunggai; ikatana-yawa na kahiri-nggu wikinggu.

⁷Napeku ihu nu bai kambàliku wànya na tamuna i Ala? Napeku ihu nu bai kambàliku-nya ndumana?

⁸Napeku ihu nu bai angunya i Ala, dàngu bai kahiri-ya ba hama tuna ma-pakatindi-kai?

⁹Jàka na-kanuturu-kai paraïna i Ala, mahàmu-ya ihu na pahunggu-na? Napeku ihu nu bai panyonga-ya hama tuna na panyonga-mi tau?

¹⁰Jàkai angunya, jiapa-kai bai wàngu pa-kangunduhu bia, napa nahuku-nggai dàngu na panjala-kai.

¹¹Màla nu na mangarangu-na i Ala nda na-pa-katàtaku-aha da hamangu-mi? Màla nu na mbàringu-na ka nda na-pa-mangàdatu-aha da etimi?

¹²Mbuta-naka na lii panaungu-mi beri hama kumburu tana manda ningu lingungu-ya; na kahiri-mi wiki beri hamana na tana wurungu mamuda la pambera.

¹³Jia ba tuna kandiiwa, màta ka ku-kareuku! Nda ku-wàrihu-aya nggàra biaya na hupu njàpuna!

¹⁴Hawanjiru-manggunya[24] patuuya na luringgu!

¹⁵Kita eti-manggunya ba mbàda mbota-dunaka na monungu-nggu! Jàka na-mbuhangu pa-pameti-ka i Ala, patiangu bia-nggunya, na nyuna napa ku-pamàna-nya na huri luringgu la hanggana.

¹⁶Rukuna ba kutoru mbeni tunggu nu talànga wanguna kumara lia wànggu, nadu na tau akatu ba nda natoru mbenia pa-hurungu la hanggana i Ala!

¹⁷Nàhu patingi hàmu-nyawa na kareuku-nggu; katana-yawa na lii kaloka-nggu.

¹⁸Na palakara-nggu mbàda hawanjiru-mangguka la pa-patàka-nya; kupi hàmu-manya, ba nda napeku-a pa-panjala-ka!

¹⁹Dou MIRI, jàkau mai pa-panjala-ka, ku-kandii-ma duku hi kunedi-nya na njàpu luringgu.

²⁰Tàka kau kataku àru-kiha yiada da pa-karai-nggu ba dàmbuda, ka peku toru mbeninggu pahili hurungu la hanggamu:

²¹upànjangu-wa pa-mayila-ka, dàngu àmbu pandàda-kingga wàngu mbàringu-mu!

²²Paniiwa, napa ka kuhema-kau. Jàka ndia màta ka kupanii nyungga, kau mangu pahema-ka!

²³Pira-madapa nu danguda da njala dàngu da akatu pawunda-nggu? Mbuta-daka da lii papangga-nggu kau peka-ngganjawa!

²⁴Ka nggikina hiu wiliru-ngga dàngu hiu hinggilu-ngga? Ka nggikina hi beri muhu bia-mungga bau tàngaru-ka?

²⁵Nyungga duku ba beri hama ruu ai munju-aka patimbu ngilu ma-maruru, nggiki hamana hiu pa-kandàndaku-ka! Nyungga duku rembi-aka na ma-malaï hi nameti, nggiki hamana hiu ya - yaulu-ka!

²⁶Ukawuku-ya na uranggu na mapuri paita; bau palimba-nja da njalanggu ba bidi mini-kapa.

²⁷Da wihinggu uhondu wànja nggili bàhi; na nggoda-nggàduku-nggu mbutana bau hamata-ya. Hamangui da tàbalu wihinggu, ba nda da-pahàlangu-a welingu la mbara matamu.

²⁸Hi kumobu hama tuna ai kamobu; hama tera pangaa ana kataru ba namobu.