Read Kambera NA MBUKUNA I AYUPU 16 Bible Online

NA MBUKUNA I AYUPU 16 - Kambera bible

NA MBUKUNA I AYUPU 16

¹Tàka nahema i Ayupu, “Kukàli ronguya na tau na mawàna; na nggaüru etimu mayila-ma-aya.

³Ka pirangu-mapa ipànjangu pa-kakòlulu? Nggàra majuju-ha da etimi la pahema?

⁴Ngera hama tuna làti, nyimi ka jiaka nyungga, tàka nyungga ka jiakai nyimi, peku panii tunggu numbu. Kunjuungu wànggai hàngga nàrungu; kupimbi - pimbilu-nya na katiku-nggu.

⁵Ku-pamàndu-nja da etimi ba kupanau-nggai; na kareuku-ngguka na-panggaüru eti.

⁶Jàka kupanii, nda namàli-a na mayila-nggu dàngu jàka kukandii, ka nggàra-yaka na linguna?

⁷I Ala ma-pawiti-nya na jàranggu; mbuta-daka da ihi kuru umanggu mbàda pa-tàlaru-haka.

⁸Napapa-ngga hi nayàpa-ka. Nàhu ke - kepanggu pa-malakangu, dàngu la kanandingu tau dangu tanda-nanya ba mbàda wundanggu manjala.

⁹Wàngu karaü etina i Ala ba nahi - hiraya na ihinggu; wàngu kaburaü-na ba na-tàngaru-ka.

¹⁰Na-payudi-ka tau ba dawàngu pa-hanganga; da-nggukuru-ngga hi datàba-ka.

¹¹I Ala nawua-ka la tau akatu; napuli-ngga la lima tau kajàliku.

¹²Làti na-mambiru dàngu na-lànyapu na luringgu, tàka i Ala na-kaluluku harabànda-ngga. Na-njàkilu-ya na kahuki-nggu hi na-yàbahu-ngga; natuu-ka ngia pa-katutu pana tau ma-papekangu.

¹³Dàngu nda mila etina na-nutaku papana-ka, hi na-tanyalangu na ihi kambu-ngguka.

¹⁴Na-kaluluku hama tuna haàtu ma-kaborangu, dàngu na pa-manua ma - mànuka.

¹⁵Nyungga ku-kalambungu karungu tanda hawina-nggu, hi ku-uhuku la kumburu tana ruku ba pakàku-ka.

¹⁶Narara na matanggu paraï pahii; da tàda matanggu dambua dàngu da-ndiangu.

¹⁷Tàka nyungga duku nda ku-pajanggilu-a; lohangu-duna-nyaka na tànjina na hamayangu-nggu lai MIRI.

¹⁸Ha tana, àmbu kàpi-dunya na mawunda-ngga ma-akatu; dàngu la hambeli metimbu, àmbu pa-kandii-duya na kaladaku-nggu ba kukarai botangu matànji.

¹⁹Kupi-manya ba ninya la awangu na Ma-kahiri-ka; Nyuna ma-hakahii-ngga ba nda kunjala-a.

²⁰Nyungga na-payudi-ka angunggu hi dariki-ngga; dàngu hiinggu ku-hurungu lai Ala pakarai pa-ndulangu.

²¹Ai, màta-kiwa ka i Ala wiki ma-kahiri-ka la hanggana; hama tuna na haàtu tau na ma-mbuhangu pa-kahiri kandua-na.

²²Na nda - ndaungu-nggu na mani-inyapa nda nadangu-apa; nda pira-ama-napa laku-nggunyaka dàngu nda kuhili beli-apa.