Read Kambera NA MBUKUNA I AYUPU 17 Bible Online

NA MBUKUNA I AYUPU 17 - Kambera bible

NA MBUKUNA I AYUPU 17

¹Na rehi metinggu mareni-mana-nyaka dàngu mareni mbota-nanya na kayeku-nggu; na mani-inyapa na ndumanggu didi-aya na reti.

²Datuu-ka pa-paakangu wàngu; kuita-ha ba dalibu-nya na payudi-dangga.

³Nyungga duku kutànji-ma, ou Ala. Waiyawa na kareuku-nggu! Hili nggamui-pa ma-ngalangu pandula-ya na kareuku-nggu?

⁴Ubitanja da etida hi nda dapingu; ka àmbu jia panyàku-dangga nàhu nyungga.

⁵Kikunya na lawiti, nggamu makàla-ya na anguna keha ka ku-utungu ba wàna, da ana wikida dangala-nya na himbalu-na.[26]

⁶Nàhu da-payudi wàngganya nuna na lawiti; nyuda damai pa-pangànji-ya na matanggu.

⁷Da-hambala da matanggu paraï pa-handuka; na ihinggu na-malakangu na-kariku.

⁸Na tau na ma-tuturu, na-katàtaku dàngu na-hangàtaru; na tau manda njala, nda na-pamiri-a, wànangga.

⁹Na tau na mahàmu dàngu na manda njala, napi hàmu-manya na huri lurina ba nambuha-nya i Ala.

¹⁰Tàka jàkai mai ndàba làti lai yiahu, nda ningumbu haàtu tau manggàna pangala-nggu.

¹¹Làpahu-mana-nyaka na rehinggu, nda da-hàrangu-apa da pawuku-nggu mbutada; da-mbudahu-mbu mbuu ndàba da parinju-nggu.

¹²Tàka da kandua-nggu, ‘Nuna na rudungu lodu-yaka dàngu na-hambila tàka-ama-naka,’ wàda. Na nyuna kupii-manya daa la etinggu ba daingu-mana pa-kapàtangu na luringgu.

¹³Jiama-aya na parai mameti na pamonu-nggu, lai nuyaka na ngia pa-katuda-nggu la kapàtangu.

¹⁴Na retinggu, jiaya na “amanggu”, wànggu, dàngu da ngeli da mangaanya na tolunggu “ina”-nggunya dàngu “ana wini”-nggunya, wànggu.

¹⁵Ka nggiyaipa na pamonu-nggu; nggamu maita-ya ba ninya na pa-ohangu ndumanggu?

¹⁶Jàka ku[27] puru la pangia tau meti, nda hili nggàra-a pamonu-nggu,” wàna.