Read Kambera NA MBUKUNA I AYUPU 19 Bible Online

NA MBUKUNA I AYUPU 19 - Kambera bible

NA MBUKUNA I AYUPU 19

¹Tàka nahema i Ayupu, “Ka nggikina hii nutakungu la pa-panjala-ka, hi pajàra wàngga kareuku-mi?

³Nua naingu-ma bai paaka-ngga, dàngu ipamayila-ka wàngu nda makia-mi.

⁴Jàka nanjala làti na pawunda-nggu, nda na-parunggi-akai nyimi.

⁵Nyimi ingàda wikimi bai rihipa pahàmu welingu lai nyungga; ikakaya na haruinggu tanda-nanyaka ba tau njalaka.

⁶Pajia-yawa ba pajàra-nanggaka i Ala, dàngu ba yàpa-nangga la oka kahili-na.

⁷Nyungga ku-kawutaru ruku na mbana etina Nyuna, tàka nda haàtu-mbu maeti wàngga. ‘Nggiyaka na matànji,’ wànggu ba kuwara, tàka nda ningua marongu-ka.

⁸I Ala nabita-nya na àndanggu, nda peku li-anggu, da kanji - njilitu-ngguka na-pakapàta mitinja.

⁹Naramba hàlanja Nyuna da malanja-nggu, dàngu na-paruha-ya na hàmuna na tamunggu.

¹⁰Na-nàhaku-ka welingu la nggi - nggi bia, hama tuna tau mabuta amu welingu la pingi ai, hi namàta-nya pa-katehu dàngu pamalaï, tuna nu ba na-hànditu-ya mbutana-ka na pamonu-nggu.

¹¹Na hàngga-nangga i Ala ba dira mbàringu-ya; nakaka-ka nyungga beri hama tuna muhu-nangga.

¹²Da tanatara-na da-kaluluku-ngga nda pa-ngalangu-a pa-dimbaku-ha; da-dimbaku-ya na àndanggu, hi da-nggupulu-ya na uma teranggu.

¹³Da angu dedinggu na-pamarau-ha welingu lai nyungga; kunjadi tau tàka la hangga mbutada da tau patanda-nggu.

¹⁴Da kalembi nditaku-nggu mbutada da-pa-maraungu wikida; da angunggu nda dahili namu-akapa.

¹⁵Da atanggu kawini da-maromba-ngga nggamuka nyungga, mirida; tau panda tandaya wàda biangga.

¹⁶Kupaau-nya na atanggu, tàka nda nahema-a, jiapa-kai ku-pamanda wànya kareuku malijangu.

¹⁷Na papaha-nggu nalabu na etina ba napàda-nya na wau kayeku-nggu, da angu dedinggu nda da-mbuhangu palihi-ngga.

¹⁸Da-paaka-ngga anakeda la padua ànda; jàka ku-ndolaku, dariki-ngga.

¹⁹Ba daita-ka nyungga, da-haringgingu da angu làngginggu; da-maraungga paraï da pambuha-nggu.

²⁰Na ihinggu tika paita-ha da riinggu; kutika pameti-ka-amangu hi nambota na kayeku-nggu.

²¹Ha a - angu-ngguka, imila-kingga etimi, nadu ba limana i Ala-maka mapalu-ka.

²²I Ala duna ba nutakungu-mananya panoku-ngga; ka nggikina hi mikiku-nya Nyuna? Ndedi-mapa natoma bai pajàra-ka?

²³Ai, làti ka tulihu-ya na kareuku-nggu, hi napeku la panamu mànuya;

²⁴làti ka pàha wànya bàhi la watu, ka peku pa-daingu-na lundu nu.[29]

²⁵Kupinya ba ningu Makahiri-ka la awangu; la hupu njàpuna jiangu-ma namai pandula-ka.

²⁶Jiapa-kai ba napongu dàngu nawàka na manula-nggu, tàka la luringgu[30] yia, jiangu-ma kuita-ya i Ala.

²⁷Nyuna kuita wàmanya mata wikinggu, dàngu Nyuna jiaya-ka duku na kandua-nggu. Na-làjaru na etinggu rukuna bai panii,

²⁸‘Nggiki-ndanya bàdi ka takàla-ya?’ ba wàmi. Nyimi bai himbu latana la pawunda palakara.

²⁹Tàka, màtawa nàhu kai mangàdatungu hapanda! Nadu i Ala nahàngga-nya dàngu nahuku-nya na tau njala; ka pi-dimi-nyaka ba ningu Ala ma-patanda-nya[31] na tau,” wàna.