Read Kambera NA MBUKUNA I AYUPU 2 Bible Online

NA MBUKUNA I AYUPU 2 - Kambera bible

NA MBUKUNA I AYUPU 2

¹Da tau awangu dahili hurungu lai MIRI, dàngu nimbunya i Pakamangu la hongada.

²Ka paàra-nanyaka paraïna i Ala, “Nggi welimu?” wànanya. Nanapa-ya i Pa-kamangu, “Welinggu pa-wenangu la nggi - nggini dàngu la panjada-nya na pinu tana,” wàna.

³Na-paàra-nya paraïna i MIRI, “Màla uhamata-duya nu na atanggu i Ayupu? La pa-nggubulu awangu nda ningua tau mahama-nya pa-tuturu dàngu pahàmu eti nyuna. Na-maraku-ngga dàngu nda ana wunda-mana ma-akatu. Daingu-mana pa-tuturu-ngga jiapa-kai bau pamanda-ngga la pa-hanggàmaru-ya nyuna la manda pa-latangu,” wànanya.

⁴Tàka na-kataku-ya i Pakamangu, “Na luri dàngu na hayandalu narihi pa-wilingu-pa welingu la banda. Na-mbuhangu na tau pawua hàlaha da manguna mili naluri pa-ngalangu nyuna.

⁵Jàka era pa-katiu-munya na toluna, lupangu-ma naràtu-nggau la hanggamu!” wànanya.

⁶Nanapa-ya i MIRI ba nahema-ya i Pa-kamangu, “Nahàmu-kai duna, palaku biaya nggàraya na pambuha-mu lai nyuna, mili àmbu pameti-ya nyuna,” wànanya.

⁷Ka laku-nanyaka i Pa-kamangu welingu la hanggana i MIRI, hi na-patumbu-nya manggàri mbana na ihina i Ayupu, welingu pàku la tàbalu wihi lupa la pinu katiku-na.

⁸Ka uhuku-nanyaka i Ayupu la lihi pabundu kangudu, hi napiti mbera loja la pa-kauru wànya na ihina.

⁹Tàka na papaha-na, “Ka ni, hi daingu tuturu biamu-nya i Ala? Màla, ràtu-nyawa kau mangu pameti!” wànanya.

¹⁰Na-kataku-ya i Ayupu, “Ukareuku hama tuna tau ndubakau! Nggiki hama peku biana nyuta la pa-mbuhangu pa-kataku mahàmu bia welingu lai Ala, tàka na manda hàmu hi jukaru-ndanyai?” wànanya. Jia ba tuna, jiapa-kai ba napàda hàlanya nuna na harui mayila paraïna i Ayupu, nda ana tiki-mana kareuku ma-ndubaku-ya i Ala.

¹¹Na handuka na manggàna-ya i Ayupu mbàda rongu-danyaka paraïda matailu da anguna, i Elipàhu welingu la parai Temàngu, i Mbilundàtu na tau Huwàhu, dàngu i Hopàru na tau Naama. Da-pahamangu nyuda la palua pa-tadalu-ya dàngu la paomba-ya na etina.

¹²Tàka ba daita marau biaya-pa, datika panda tandaya. Da-kaladaku hi dahira-ha da pakida dàngu hi da-hàbarungu kumburu tana la awangu dàngu la katiku-da.

¹³Pihu mbua lodu pihu mbua rududa pa-uhuku la tana, la lihina i Ayupu, nda ana nggàrama patiki-da, maa ba daita-duya ba dira mbotuya na harui mayila-na.