Read Kambera NA MBUKUNA I AYUPU 20 Bible Online

NA MBUKUNA I AYUPU 20 - Kambera bible

NA MBUKUNA I AYUPU 20

¹Hi nahema i Hopàru, “Ha Ayupu, nyungga nakudu na etinggu rukumu nyumu, nàhu ku-mbuhangu pahema parenggangu.

³Na kareuku-mu ba paaka langatàka-mamungga, tàka kupi-manya nggiki wàna ba hemaya.

⁴Ka ndau pi-manya dumu ba weli la handàka-na, pakiringu ba hinapa bànjalu-ya na tau la pinu tana,

⁵na hanggela-na na tau kajàliku ba nda nggi tuana, dàngu na mbaha etina na tau akatu ba ha-kambàdiku-ana?

⁶Jiapa ka nda nggiki bokulu-mbuna, hi lupangu natoma la awangu dàngu hi na-jonggaru karumangu na katiku-na,

⁷na nyuna jiangu-ma na-molungu lundu nu - nu, namau welingu la pinu tana wàngu pa-makia wàngu. Da tau matanda-ya nyuna, da-paàrangu, ‘Ha, nggiyaka nalaku ningu ihu?’ wàda.

⁸Nyuna namau hama tuna na maü manggadipangu, na-munangu hama tuna ba ita la rudungu.

⁹Nyuna nda pahili ita wa-anyapa mata; nda pahili ni-anyapa la ngia pa-ndàdiku-na.

¹⁰Da pa-manganga-na àmangu welingu la tau manda ningungu lupangu-ma nahilu-ha paraï da anana.

¹¹Jiapa ka bidi tauya dàngu ka na-kaborangu, tàka ndedi mbàdiku-ana ba nanjadi kumburu tana.

¹²Kanjupu lànggaya na akatu daa la ngaruna! Panamu biaya la parengga kanggulaku-nya; jia ba tuna hi tuuya la lumbu làmana, ka peku pàda mandai-nanya.

¹⁴Tàka nu na pangangu daa la kambuna, na-pambeli-ya pameti wàngu mapaita.

¹⁵Da banda pa-manganga da pa-kanggulaku-na, namuta leranja; i Ala na-paluhu-ya weli dalungu la kambuna.

¹⁶Na tau akatu na-unungu pameti wàngu ma-patàparu, nyuna nameti rukuna nuna hama tuna pakati kataru mbana.

¹⁷Nda peku pàda-ana-nyapa na mina haitungu panda taü,[32] jàka ndia huhu dàngu manggaluangu na mambinu lembaru.

¹⁸Da utungu-na mbutada lupa na-pabeli-manja; da ihi paraï-naka nda jia pàda-ana-njapa.

¹⁹Nadu ba na-kapidihu-ha dàngu ba nda na-ihili-nja da tau manda ningungu; naramba-nja da uma da panda pahada-na.

²⁰Ba nda ningu dirana na mangàbangu-na, ka nda nali-aya na etina.

²¹Jàka nangangu na-panjàpu hàla-maha, jia ba tuna na luri mbokaru-na nda na-padaingu-a.

²²Ba talànga hàmu-napa na lurina, ka tàka-nanyaka mayila dàngu handuka.

²³Ba talànga paihi pàku-nanya na kambuna, ka dira hànggaya i Ala hi nahuku-nya.

²⁴Jàka napalai hinggilu-nya na hapanda waja, napa na-pamanua-ya pana wudu.

²⁵Nyuna nanggàna-ya pana, hi na-manua; na hupu pana na ma-kajilaku nalumbu làpahu la ihina, hi na-hulungu na mangàdatu la etina.

²⁶Talàpu-danyaka mbuu ndàbada da banda pa-pakàpa-na; nyuna dàngu da ihi uma-naka mbuu ndàbada danganja epi panda paroka tau.

²⁷Na awangu nabuwa-ya na akatu-na; na tana na-hadangu pa-rawaku-ya.

²⁸Mbuu ndàbada da pawulu-na jiangu dambuta, ruku mbàringu-na na hànggana i Ala.

²⁹Nuna-yaka na urana na tau kajàliku, na ura pa-panduma-nanya i Ala,” wàna.