Read Kambera NA MBUKUNA I AYUPU 21 Bible Online

NA MBUKUNA I AYUPU 21 - Kambera bible

NA MBUKUNA I AYUPU 21

¹Nahema i Ayupu, “Katàmbalu-nya nggàraya na papanii-nggu; didiya nuna-a na pakarai-nggu na pa-nggaüru eti wàngu.

³Pahia-kingga ka hili nyunggai duku ma-kareuku, hàlaka nu kai hili paaka bianggai duna!

⁴Nda taua angunggu pa-pahànggangu, hi nda nggàra ehia jàka nda kunàdi-ya na etinggu.

⁵Tàngaru-kawa, napa kai hangàtaru, indumuru dàngu iwunggunja da ngarumi.

⁶Jàka ku-kanandi-nya yia na ngeranggu ta - tàtanggu paraï pa-haringgingu hamangu.

⁷Ka nggikina da tau akatu hi nawua-nja malai luri paraïna i Ala, dàngu hi dabonja pa-ngalangu da bandada?

⁸Nyuda daluri mandaima hi lupa daita-ha da ana umbuku-da ba da-matua.

⁹Da kuru umada da-mambiru da-mànjaku; nyuda nda da-ngalangu-a hanggàmaru welingu lai MIRI.

¹⁰Da banda lurida daworu mbàmbaru, dàngu nda haruida, ba da-paana.

¹¹Da ana tau akatu punduhu - punduhu-da paraï pa-hawola, beri hama tuna kamboka mbimbi ma-hayidi.

¹²Pa-kariangu lingu lamba ha-kapapa, wàlanggiri, taleli dàngu jungga, nyuda daludu pa-remingu dàngu dare - renjaha.

¹³Da lodu lurida da-panjàpu wànja luri mbokaru, hi dameti mandangu.

¹⁴Tàka làti mbàda panii-danyaka i Ala, ‘Marau-nggamawa dàngu laku-kauwa! Nda ma-wàrihu-akau Nyumu dàngu nda ma-rinjungu-a papinya na pawuku-mu Nyumu dàngu na pambuha-mu nduma lurima,’ wàda.

¹⁵La kanandingu etida, ‘Ba lumunya i Ala nda ningua linguna, dàngu ba hamayangu lai Nyuna nda ningumbu nggunana.

¹⁶Ka nda ruku àtalu wikinda nyuta-a, hi tahunggu-ha da pawuku etinda-ka mbutada?’ wàda. Tàka nyungga duku nda ku-patunju ndoku-maya na pa-kanandi-da dàngu na patandangu matuna nu.

¹⁷Mbàda itangu-mika ba papàda-ha da palita tau akatu, hi natàka-nja hanggàmaru dàngu paharui wàngu? Mbàda erangu-daka hànggana i Ala, hi nahuku-nja nyuda?

¹⁸Mbàda hama rembi dàngu kumburu tana-haka ihu nyuda da patimbu ngilu mbangatu dàngu ngilu ma-maruru?

¹⁹‘I Ala na-hukungu ana ruku njala amana,’ wàmi nyimi. Tàka nyungga duku: Na tau njala nunama na-pahuku-na i Ala, wànggu ka peku pàda-danya ba rukuda da njalada, hi na-patàka-nja hukungu paraïna i Ala, wànggu.

²⁰Màtawa na tau njala ka natanggu-nja da njala wikina, màtawa ka napàda-nya na hànggana i Ala Hupu Majangga.

²¹Jàka nanjàpu-ka na lurina na tau la pinu tana, na-ihili-nyapa ihu na anana hi naluri hàmu, hi ndia?

²²Napeku ihu na tau pa-papeka-nya i Ala, ba i Ala wiki pàku làti ma-patanda-nja wai ngerada da pa-padikangu maninja la awangu?

²³Ningu tau ma-hayandalu la ngala lurina; lundu hodana ba nameti hawewa eti. Nameti mandangu dàngu mànjaku, ba dàngu àtalu bia-napa na ihina.

²⁵Tàka ningumai mameti harui mayila, ndedi napàda-makinya na luri hanggela hawola.

²⁶Tàka ba tuna napa la reti, hama tanggunggulu-mada; da-karunggi-ha kataru dàngu ngeli.

²⁷Ba kupi-manya nggàra pa-kanandi-mi hamanai mbuu ndàbada da akatu pa-lakunda-mi.

²⁸‘Nggiya na uma ma-kawaha mawunda-ya na ma-akatu?’ ba wàmi bai paàrangu.

²⁹Ka ndedi-mapa ipaàra-nja da tau laku mànu? Ka ndai wai-aha nu da papeka-da?

³⁰‘La lodu pa-hukungu-na i Ala, pa-pamara-ha da tau akatu,’ ba wàda.

³¹Nda ningua na makàla-ya na hurina; nda ningua na ma-pahimbalu-nya na akatu-na.

³²Nyuna pangàndi-ya la reti, hi puhiya hu daa la lambongu reti; na retina padai pahàmu-manya.

³³Riu ratana na tau na malaku ndutuya na metina; wàngu manjilungu ba pabundu-nya tana.

³⁴Jia ba tuna na lii paomba-mu nuna ma-kapopuku-ya dàngu mbuta-naka na pahema wàmu ma-kambàliku juaya!” wàna.