Read Kambera NA MBUKUNA I AYUPU 22 Bible Online

NA MBUKUNA I AYUPU 22 - Kambera bible

NA MBUKUNA I AYUPU 22

¹Hi napanii i Elipàhu, “La honga tau pinu tana, nda ningumbu haàtu tau ma-palingu lai Ala. Jiapa ka nda nggiki manggàna-mana, palingu-nanya nduma wikima-ana.

³Ka ningu nu linguna lai Ala, jàkau nunjuya na pambuha-na Nyuna? Ka ningu nu utungu ndumana Nyuna, jàkau luri manundu?

⁴Nda ruku mangàdatu-munya i Ala-a, hi kàlakau dàngu hi panjala-kau,

⁵tàka ba lalu danguda da njalamu, dàngu ba lalu akatu-da da pawunda-mu dàngu na hurimu.

⁶Jàka nda namàka pa-mbayaru wutana na angu dedimu, muwàhi hàlaha da pakina.

⁷Na tau na manjili ndau wuanya pa-unungu, na tau ma-manjuu ndau wànda-aya pangangu.

⁸Upakiya na pakata dàngu na kawaha la papiti leranja na tanana nggubulu-na.

⁹Nda jia biaya ba ndau ndulaha da kawini meti lei mbuu ndàbada, tàka da ana mamila bau pa-mayila-mbuha.

¹⁰Tuna nuduka nàhu hi mbinu kalembangu-na la winggiru-mu, hi jia hulu bia-nanya mangàdatu na etimu.

¹¹Na lodu bonjangu-mananya pa-kapàtangu, nda peku ita-amupa; umumuhu ba nakauta-kau iwa obungu.

¹²Ka nda la awangu hupu majangga-aya duna na-ngiangu ningu i Ala, hi nangadu-ha mbara wawa da kandunu majangga halawàla?

¹³Tàka ba tuna paàrangu-munyai, ‘Nggàra papina Nyuna? Nyuna la hambeli karumangu biaya dàngu nda peku patanda-ananda wai ngeranda,’ wàmu.

¹⁴Bau kakaya na-pahangindi-nya karumangu ba na-tàngaru ba talànga nàhunya dàngu ba la padira awangu tana[33]-a nali ningu?

¹⁵Màla nu pa-daingu-mamunya pali ningu la ànda papindi tau akatu?

¹⁶Nyuda pa-hànditu-ha ba ndedipa natàka na rehi metida, hi na-pamili-ha iwa ma-pakauta.

¹⁷Jia-mahaka nyuda da matoru mbeni pa-tebuku-ya i Mahupu Mbiha Ala, dàngu makaka-ya nda jia nggàra-a pawunda-na lai nyuda.

¹⁸Làti duna bai Ala pàku na maruku-nya hi dawulu nyuda! Langatàka nda ku-jàngapu-maya na kanandingu tau akatu!

¹⁹Na tau hàmu, riki mbaha eti pàku-ananya, ba naita-ya na tau akatu ba hukunya.

²⁰Mbuu ndàba da mangu tau akatu da-làjaru da-tàlaru, hi na-pakehi pambuta-ha epi tuda da marihi.

²¹Ba tuna, Ayupu, papeku dànyawa i MIRI, kau ngalangu paluri mambiru. Jàkau nunjuya nuna, lupangu-ma ungalangu pautu wàngu.

²²Kataku-yawa nggàraya na pa-papeka-nanggau i MIRI; pakàpa hàla-yawa nuna daa la etimu.

²³Beliwa lai MIRI wàngu karàda eti[34] mu; màtawa kau jiaka-nya na akatu la umamu.

²⁴Wàru-nyawa na àmahu raramu na maihi mbàngi halawàla-na; kawuka-nya la kubu luku mihi manda ningu waina.

²⁵Màtawa i Hupu Mambiha ka àmahu rara-munya, dàngu ka àmahu bara-munya na mambana pa-wilingu.

²⁶Ka wai mànu-dumu-nyaka i Ala, hiu pinya ba jiaya Nyuna na pingi pola pa-ohangu-mu.

²⁷Jàkau hamayangu, jiangu-ma nahema-kau, hiu patutu-nya na panjanji-muka mbutana.

²⁸Na paràma-mu ningu mànu ihina, dàngu na harii napa na-handaraku-nya na àndamu.

²⁹Na tau na ma-ngànjangu[35] na-pawawa-ya paraïna i MIRI, tàka na ma-karàda etina hi pamara-ya.

³⁰I Ala nandula-kau jàka ndau njala, dàngu jàkau nunjuya na pambuha-na,” wàna.