Read Kambera NA MBUKUNA I AYUPU 24 Bible Online

NA MBUKUNA I AYUPU 24 - Kambera bible

NA MBUKUNA I AYUPU 24

¹Ka nggikina i Ala hi nda na-kawuku-ya na lodu patandangu, ka peku ngalangu-da matànji da tau matanda-ya Nyuna?

²Ningu tau ma-palelingu padira, ka peku lerangu-na na tanana. Da-manganga kabàba mbimbi, hi dapuhi-ha la oka mbimbida.

³Da kalandai manguda da ana mamila, dapalai ngàndiha; na hapi kawini meti lei, dapiti leranya ka jiaya na handera-na.

⁴Da-pabeta-nja da tau mila la pa-ngalangu ngabada, ka kapàndi lerangu-danyaka da tau ndamu.

⁵Jia ba tuna, nuna na tau mila beri hama tuna na kalandai matàmba-ya na mahimbu pangaana la maràda pa-jemingu; ba didiya lai nu-ma-a maningu pa-ngangungu ndumada da anana-ka.

⁶Naràma lerangu la woka tau hawiangu;[37] lupa na-kanembu wua angguru tau akatu.

⁷Nda ningua pakina dàngu hinggina ma-pamamitu-ya na ihina la marau rudungu.

⁸Nambaha la ura kawalu la palindi, hi na-kadàmbi pa-pamaü la palindi watu.

⁹Na tau akatu natuu-ya ata na ana manda ningu ina amangu, dàngu napiti ana rara tau mamila na ma-wutangu lai nyuna.

¹⁰Na tau mila nalaku nda ningu pakingu; na manjuu ba talànga mutina uhu nggàndumu la woka.

¹¹Na-manahu lonahu welingu la wua haitungu dàngu na-pandoi pa-unungu welingu la wua angguru, tàka nyuna wiki hi dira kandànga biayai.

¹²La paraingu parongu-ya na ka-ihiku tau mareni meti, da tau ma-manua dawara ba da-kamahingu ka lumunja, tàka i Ala duna nda natingi-aya na hamayangu-da; nda na-mbuhangu-a pa-ihili-nya.

¹³Ningu tau na-mawiliru-nya na hambila, nda natanda-aya dàngu nda dandàki-aya na àndana.

¹⁴La marai romu na-hadangu na tau pameti tau welingu la ngia pa-katuda-na, hi naluhu pa-pameti tau ndamu, dàngu ba ndedipa naharii lundungu, lenggitu - lenggitu-na hama tuna tau bohu.

¹⁵Na tau njuraku na-patia-nya kalitu-na; na-patamali-nya na matana ka àmbu natanda-ya tau.

¹⁶Na tau bohu na-nyànggaru uma la rudungu; la lodu na-wiliru-nya na harii hi na-kawiningu.

¹⁷Lai nyuna duna, na mbaru pa-mangàdatu langatàka-maya, tàka na rudungu na ma-pa-haringgingu hamangu, na-pambaha eti,” wàna.

¹⁸[38]Hi napanii i Hopàru, “Na tau akatu na-pamili-ya wai iwa, na tana manguna naràtu-nya paraïna i Ala; na woka angguru-na na-malinggitu-ka nàhu; nda hili ningu-apa maràma lai nu.

¹⁹Hama tuna na ura kamba ba na-munangu jàka natàka-nya wandu dàngu lodu, tumbuna na tau njala ba wàlunya hu daa la parai tau meti.

²⁰Na-maromba-nya ina wikina, dàngu nanganya ngeli na toluna. Na tamuna nda pahili namu-ayapa; pa-pamunangu-yaka nyuna hama tuna pingi ai mambàpa.

²¹Hi natumbu nuna mbutana ba na-pamiyila-duha da kawini meti lei, dàngu ba nambana etina la ina manda pa-anangu mini.

²²Tàka i Ala, na-pameti wànya mbihana na tau kaborangu. I Ala na-paluangu limana, ka mbota monungu-nanyaka na tau kajàliku.

²³I Ala nawua-nya luri mànjaku, tàka nda na-pànjangu-a pa-hamata-ya.

²⁴Ndedi nggi mandaina ba naluri mambiru, tàka la malamiri-na nalaku-ya lundu nu - nu. Nyuna na-malaï hama tuna rumba nda ningu lingungu; hama tuna wili uhu pamuti welingu la polana.

²⁵Nggamu mapeku pa-pahini-nya nu na paita wàngu mata, jàka ndia na-majukaru-nya na pa-deningu-na na kareuku-nggu?” wàna.