Read Kambera NA MBUKUNA I AYUPU 27 Bible Online

NA MBUKUNA I AYUPU 27 - Kambera bible

NA MBUKUNA I AYUPU 27

¹I Ayupu na-pangala-nya na pa-kalokangu-na, “Parongu-na i Ala maluri, na mapàtu-ngganya na-mamola,

³ku-harangu: Ba nawua-i-nggapa kayeku i Ala, ba ni-i-nyapa na luri daa la ihinggu,

⁴na tàda ngarunggu nda jia tiki-ana ma-kambàliku, na làmanggu nda jia peka-ana ma-kaputingu.

⁵Jia ba tuna, nda ku-mbuhangu-a papanii-ya bai pa-deningu nyimi; lupa kumeti-mbu kupi langatàka-manya ba nda ku-marihaku-a.

⁶Nyungga duku pa-daingu-manggunya la tuturu-nggu, dàngu na unu eti-mbunggu ba yahangu mànu-mananya.

⁷Màta àruki da muhunggu ka hukunja hama tuna tau katadaku, dàngu da papanggu ka pajàra-ha hama tuna tau akatu.

⁸Ningupa pamonu-na na tau nda hàmu huri la rehi karuhi-nanya na ndewana paraïna i Ala?

⁹Jia tingi-nanya-kaka na hiina paraïna i Ala jàka natàka-nya ma-kaliutu?

¹⁰Làti duna narinju-manya bàdi na pambaha eti wàngu welingu lai Ala, dàngu ka na-hamaya mànungu lai Nyuna.

¹¹Ku-papeka-nggai nyimi na-bokulu kawaha-na i Ala, kupanii-nggainya na pa-kàkatu-na i Hupu Mambiha.

¹²Tàka, nyimi mbutami mbàda ita wiki-minyaka. Jia ba tuna, ka nggikina nyimi hii wuangu lii panaungu manda ningu lingungu?” wàna.

¹³[43]Hi napanii i Hopàru, “Tuna ni na pawàna i Ala Hupu Mambiha ba nahuku-nya na tau mbana eti dàngu ma-katadaku.

¹⁴Jàka dangu anana, dameti-ha la pabera dàngu da ana umbuku-na daluri nda patoma.

¹⁵Da kalembi-na da mani-i-njapa, dameti la tàparu, dàngu da kawini meti leida nda dahii-mbunja nyuda.

¹⁶Jàka da-pabundungu da àmahu barana dàngu da-patapungu da pakina,

¹⁷tàka nuda da àmahu bara dàngu da paki mbutada damangu-nja napa tau tànji eti.

¹⁸Na uma tau akatu namàja hama tuna lulu ngginggi,[44] uma mili uma-aya hama tuna maü tau madai.

¹⁹Nyuna na-mangguli hama tuna tau mawulu, tàka nda peku beli-ana-nyapa,[45] ba na-hadangu-ka welingu la katuda-na, mbàda mohu molungu-daka da pawulu-na.

²⁰Nanggàna-ya ma-halawàlangu hama tuna wai iwa matàka harabàndangu. Na ngilu mbangatu la rudungu na-hapuputu hi nakauta-ya.

²¹Nadendi-ya ngilu pahunga lodu, hi nawari-ya welingu la umana.

²²Na-nàhaku-ya nyuna dàngu nda pa-aïngu, tàka hi napalai lerangu pahimbu ngia pa-hangindingu.

²³Na-kapòkukungu limana na tau ruku ba nanjoru pa-paakangu-ya nyuna la nggi - nggini,” wàna.