Read Kambera NA MBUKUNA I AYUPU 28 Bible Online

NA MBUKUNA I AYUPU 28 - Kambera bible

NA MBUKUNA I AYUPU 28

¹[46] Ningu humuru ngia pahunggu àmahu bara; ningu pangia na ngia pa-paihi mbànginya na àmahu rara.

²Na bàhi paàki-ya welingu la tana; welingu la watu paluiya na wudu.

³Na ma-kapàta mitingu paita paràpangu-ya, na pangia ma-manjolungu halawàla pa-hajiwaru-ya. Lai nu, la kapàtangu, nahimbu watu ningu ihingu na tau.

⁴La ma-manjolungu hu dalu la manda ningu mangia-nya, na pandedi liti ndoku dàngu ndedi pali-maya, naràma na tau ba dawàngu pa-kanderungu la liku hu daa la paàki lumbu ma-kahàna.

⁵Na tana na-ihingu pangangu ndumana na tau, tàka hu daa la lumbuna na tana nunama, ba wàngu pake - kenggaru-ya mbutana hi na-taneparu na ihi kambuna na tana.

⁶Da watu daa la unu tana ningu watu àmahu rarada, tàka da aüda nu da-paihingu àmahu ihi mbàngina.

⁷Na ànda ma-hanggangu lai nu nda napi-anya ikitu, dita la tubana ndedima na-hawuru-nya mbaku.

⁸Na ànda ma-kahàna na ma-hanggangu lai nu ndedima naliya hinga hamangui banda bohu hawiangu.

⁹Na tau naàki watu kalatungu, na-nyungguru palindi patàka-nya la latana.

¹⁰Ba naàki lumbu-yaka nu daa na palindi watu, nahunggu watu matika pa-pawilingu.

¹¹Na patàka-nja matada da luku ba naàki,[47] hi na-tinggahu-ya na ma-kawiningu.

¹²Tàka ka nggika himbu niya na manggàna? Ka nggi ta-papekangu ningu ka ta-jàngapu-ya?

¹³Na manggàna nda nianya la honga tau; nda ningua mapinya na wili-mana duna.

¹⁴Dapanii da lata tehiku dàngu tehiku bokulu ba nda nianya na manggàna lai nyuna.

¹⁵Na manggàna nda pa-ngalangu-a pa-panjepa-nya jiapa-kai ka wànya àmahu rara ihi mbàngina, dàngu nda pa-ngalangu-mbu padingi wànya àmahu bara.

¹⁶Àmahu rara dàngu watu matika pa-pawilingu nda natoma-aya na wilina na manggàna.

¹⁷Àmahu rara jàka ndia kaha manipihu nda pa-ngalangu-a pa-pamenja - nja, nda napeku-a pa-mbayaru wànya kihi àmahu rara.

¹⁸Na manggàna duna narihi-pa pahei na wilina welingu la anahida, watu kaniniku, jàka ndia mutiara.

¹⁹Watu topahu weli wingungu dàngu àmahu rara ihi mbàngina, nawawa-pa na wilina welingu la eti diha.

²⁰Ka nggiyaka duna na ngia paweli-na na manggàna? Ka nggika tangala ninya na kanandingu ma-jàngapu?

²¹Nda ningua ngara maluri-ka mambàda itaya, hamangui ma-hawurungu la awangu nda danggàna mata-aya.

²²Na meti dàngu na tàlaru dapanii, ba rongu-danya kareuku ngilu-ma-a.

²³Mbulungu i Ala-a na mapinya pangia-na na manggàna, mbulungu Nyuna-a na mapinya na ànda lai nàhu,

²⁴ba naita duya na hu - hupuna na tana; mbuta-naka na maninya la lumbu awangu na-hamata-ya.

²⁵Ba nawua-nya pa-mbangatu wàna na ngilu, dàngu ba napadai-nja da padira tehiku;

²⁶ba na-kawuku-ya na ngia pa-kanabu urangu, dàngu na ànda ngia palina na kabilaku dàngu na kanduruku;

²⁷la rehina numaka ba naita-ya na manggàna, na-manginjiru-nya pawilingu-na, ka li hàmu-nanyaka na etina.

²⁸I Ala napanii-nya na tau, “Kai ngalanya na manggàna, itembi-maya bàdi i Ala. Kai ngalanya na kanandingu ma-jàngapu, imarau-manya bàdi na ma-akatu,” wàna.